Ukwesha Ukufumyamo Vatican mu United Nations

AKABUNGWE ka bakalemba ba lyashi aka ku Rome ba Inter Press Service (IPS) kacitile lipoti ukuti “utubungwe tushili twa buteko (NGO) ukucila pali 70 ukufuma mu fyalo fyalekanalekana natupuminkana no kwimya lulu wa calo conse uwa kufumyamo Vatican mu cisaka ca United Nations.” Pali nomba, Vatican ibebetako fye, nangu tutile tayabamo mu cisaka ca United Nations. Vatican yalitwalilila ukucite ci ukufuma mu 1964.

Mulandu nshi ili bumba lya tubungwe tushili twa buteko ilyalundulwike ukufika ku tubungwe 100 mwi sonde lyonse pa mpela ya mweshi wa April, twakanina icifulo Vatican yakwata mu cisaka ca United Nations? Utu tubungwe tupaasha atuti, Vatican atungulula ifya mipepele tatungulula buteko bwa mapolitiki. Umukalamba wa kabungwe ka baKatolika aka Catholics for a Free Choice, Frances Kissling, aebele ba IPS ukutila utu tubungwe tatulelwisha insambu sha kulanda isha Vatican, lelo tulelanda pa kuti “bushe cisuma kuli Vatican iishaba buteko bwa bupolitiki, ukukwate cifulo cimo cine na mabuteko.”

Ba Anika Rahman, abakalamba ba cipani ca International Programmes at the Center for Reproductive Law and Policy balasumina. Ba IPS bayambwile amashiwi ayo basosele aya kuti “nga ca kuti icisaka ca United Nations cimona ici Cifulo ukwikala Papa [Vatican] ngo buteko bwa bupolitiki e lyo no kupeela imilimo ku beminishi babebetako fye pa mulandu wa maka ya kutungulula mu fya mipepele, lyene ninshi icisaka ca United Nations cileimika ica kumwenako ca kuti imipepele na imbi ikafwaye ukubamo [mu United Nations].” Alundilepo ukuti: “Pa kushininkisha ukuti United Nations talesumbula ukupepa ukuli konse, imipepele imo pamo nge calici lya ciKatolika tailingile ukusuminishiwa ukulalandapo nga ubuteko bwa mapolitiki ubushabamo.”

Lelo ni shani pa lwa kupaasha kwa kuti Vatican yaba buteko na kabili yalikwate nsambu sha kupeelwa cifulo cabo? Ba Kissling abo baipwishe bayaswike ukuti: “Ukulande fyo kulanda mu manshoko kabili kulufya. Kuli ifwe ukusosa ukuti [Vatican] buteko e bupilibulo bumo bwine ne mitekele ya mu mwanda wa myaka uwa 15 kabili no kuti Ubulashi bwa kwa Papa e buletungulula imipepele.” Balundilepo ukuti ukusoso kuti “Vatican” na “Ukwikala Papa” “e cimo cine no kusoso kuti icalici lya Katolika.”

Icilengele utubungwe tushili twa buteko ukuilishanya pa lwa cifulo ca ndakai ica Vatican mu cisaka ca United Nations caba mimwene ya Vatican mu milandu ikumine ku kufula kwa bantu pe sonde. Ku ca kumwenako, Vatican yalibomfya Ukukumana kwa cisaka ca United Nations pamo ngo kwali mu 1994 mu Cairo ukwa pa kati ka Fyalo ukwalandile pa Kufula kwa Bantu mwi sonde na pa fya Kulunduluka, kabili na pa Kukumana na kumbi ukwa mu 1995 mu Beijing ukwa Banamayo. Kuli uku kukumana, Vatican yalisuushishe sana ukulapangila libela ubwingi bwa bana umo alefwaya. Ba IPS basosele ukuti: “Apo icisaka ca United Nations cipingula imilandu ukupitila mu basuminisheko, abapaashishe pamo nga Vatican balibwesesha pa numa ukumfwana kwakumine ku milandu ya kufula kwa bantu pe sonde, ukucilikilo bufyashi, insambu sha banakashi no kusakamana ubufyashi.”

Ukulingana na ba Kissling batile: “Incito yalinga Vatican ya kuba nga kabungwe kashili ka buteko—kwati fye tubungwe tumbi utwimininako abaShilamu, abaHindu, abaBuddha, baBahai na mateyanyo yambi aya mipepele.” Utu tubungwe tulefwaya kalemba mukalamba uwa cisaka ca United Nations, Kofi Annan pamo pene na United Nations General Assembly ukupitulukamo cipya cipya mu cifulo ico Vatican yapeelwa muli ici cisaka cikalamba ica mapolitiki ya calo.

[Ifikope pe bula 31]

Umulashi wa Vatican alelanda ku cisaka ca United Nations

[Abatusuminishe]

UN/DPI Cakopelwe na Sophie Paris

Icikope ca UN 143-936/J. Isaac