Ukwambukilwa Bwangu ku Miti—Ubulwele Bwapesha Amano

Ing’anda ya kwa Pam yashingulwikwe na mabala ya butonge. Ilingi line indeke shalefuminisha imiti ya konawilako amankumba no tushishi; kabili umwela waleulula iyi imiti ukuitwala mu mayanda yabela mupepi, ukulundako fye ne ng’anda ya kwa Pam.

PAM atendeke ukulwala umutwe no kulaumfwo muselu, kabili atendeke ukulwalilila. Lyene pa numa, ifintu ifishali miti ya kwipailako utushishi pamo nga amapefyumu, amafuta ya kusuba pa mubili, imiti ya kuwamishako ifipe, penti, icushi ca fwaka, umuti uwanunkila bwino uwa kufuminisha mu ng’anda, e lyo na fimbi ifyashala fyatendeke ukumulwalika. Ifilwalako Pam e fimo pa fishibilo fya bulya bulwele bwa kwambukilwa bwangu ku miti ubwitwa multiple chemical sensitivity (MCS mu kwipifya). *

Pam alondolwelele abalemba Loleni! ukutila: “Ilyo naumfwa fye ifya miti miti ifi fine ifyabako lyonse, ntendeka ukuyumfwa uwanakuka nga nshi no kufulunganishiwa, ndomfwa ulunshingwa no muselu, kabili umubili ulafimba, inshita shimo ndatusaila pa kupeema, ukumfwa umwenso libili libili no kulila ukwabula ukuleka, e lyo umutima ulakulunkunta, kabili muli bapwapwa mulesula amenshi. Ici calindwalika na kalaso.”

Ifishibilo fya ubu bulwele bwitwa mu kwipifya MCS filapusanapusana ku bantu abalekanalekana, lelo ilingi line ifi fiba kukalipa kwa mutwe, ukunaka ukucila mu cipimo, ukukalipa kwa micincili, kabili no kumfwa ubukali umwalundanina amafupa, ifilonda, ifya kufuluma, icifuba ne cifine, asima, no bulwele bwa kucilika imyona, ukusakamikwa, ukupopomenwa, icilafi, ukufilwa ukupoosa amano ku fintu, ukufufiwa utulo, umutima ukuleka ukutunta inshita shimo, ukufimba, umuselu, ukuluka, ukukalipwa mu mala, no kwikatwa nacipumputu. Lelo kwena, ifingi pali ifi ifishibilo kuti fyaletwako na malwele yambi.

Ukwambukilwa Bwangu ku Miti —Ubwafya Bulekulilako

Mu United States, ukufwailisha ukwacitwa pa bantu kulangilila ukuti abantu amapesenti ukufuma kuli 15 ukufika kuli 37 balanda ukuti balalwala nga bapema ifya miti miti pamo nga icushi ca motoka, icushi ca fwaka, ubwema bwa penti, na kapeti umupya, e lyo na mapefyumu. Nangu cibe ifyo, pali bonse abo baipwishe pali  fye amapesenti 5 nelyo ayacepako, ukushintilila pa mishinku, abalandile ukuti balibekata no bu bulwele. Mupepi na bonse abalwala ubu bwine bulwele banakashi.

Abengi abalwala ubu bwine bulwele bwa kwambukilwa bwangu ku miti balanda ukuti icabalwalika miti ya kwipailako utushishi ne isungulula. Iyi imiti ibili ilasangwa sana umwikala abantu, maka maka isungulula. Imiti isungulula (iyanduluka bwangu) ni ilya isungulula ifintu fimbi. Iyi imiti ilasakanishiwa muli ba penti, imiti ya kusuba ku ifipe fya mbao, imiti ya kukambatikila, imiti ya tushishi ne ya kucapila.

Mu fipande fikonkelepo, tuli no kusambililako sana pali ubu bwine bulwele bwa MCS, tukalanda pa fyo abakwata ubu bulwele bengafwiwa, kabili tuli no kumona ifyo abalwala elyo na bashalwala ubu bulwele bengabombela pamo pa kwafwilisha abalwala ubulwele bwa MCS.

[Futunoti]