Tamwingafwaya Ukupuswako!

UKUPUSWA kuli cinshi? Kwi Bungano lya Citungu ilya “Bakacita wa Cebo ca kwa Lesa” ilya Nte sha kwa Yehova! Aya mabungano yakonkana ayatendekele mu United States mu mweshi wa May, yakatwalilila mu misumba iyalekanalekana ukushinguluke sonde mu myeshi iikonkelepo. Mu ncende ishingi uyu programu akatendeka ne nyimbo pali Cisano ne nshita ya 9:30 hrs.

Pa numa ya kwiswila na mashiwi ya kukoselesha aya kuti tulingile ukumfwile Cebo ca kwa Lesa, programu wa lucelo akatwalilila na malyashi ayaleti “Saminweni Ubusuma bwa kwa Yehova” ne lya kuti “Koseleleni nga Abamona Uushimoneka.” Lyene programu wa lucelo akasondwelela ne lyashi likalamba ilikalati, “Lumbanyeni Yehova—Kacita wa Fipesha Amano.”

Programu wa mu cungulo akatendeka ne lyashi ilileti, “Mwinenuka mu Kucite Cawama,” lyene kukaba amalyashi yatatu mu kukonkana ayakalanda pa fyo umo engasala uwa kuupana nankwe, ukukusha ulupwa ulwakosa lwa ku mupashi, no kusambilisha abana ukutemwa Yehova. Ilyashi lya kulekelesha bulya bushiku likalati, “Ukwendela Pamo no Kuteyanya kwa kwa Yehova,” likapituluka mu fyo ukumfwikisha imifwaile ya kwa Lesa kuleya kulelundulukilako muno nshiku.

Programu wa pa Cibelushi ulucelo akabamo iciputulwa calenga bubili ica malyashi ya kukonkana yatatu, icikaba no mutwe wa kuti “Abatumikishi ba Cebo ca kwa Lesa.” Ili lyashi likapayanya imitubululo pa fyo twingabomba umulimo wesu uwa kupanga abasambi. Lyene pakakonka ilyashi lya kucincimusha ilikalati “Ukukanabikila Lesa Ica Kukwatilapo Insoni.” Pa numa ya ico kukabe lyashi lya lubatisho, kabili ici cikaba lishuko lya kubatishiwa kuli abo abafikapo.

Mu cungulo, Programu akakwata amalyashi ya kukonkana ayalenga butatu ayakaba no mutwe uuleti “Bombesheni Ukulundulula Bumupashi,” ayakapeela imitubululo iisuma pa fyo twingalundulula bumupashi bwesu. Iciputulwa ca cungulo cikasondwelela ne lyashi lyaisulamo ifyebo ilikalati “Ukwendela mu Lubuuto lwa Cebo ca kwa Lesa Uluya Lulebutilako.” Ili lyashi likalanda pa fipandwa 25 na 26 ifye buuku lya kwa Esaya kabili likalondolola ifyo twingomfwikisha ili ibuuku lishaiwamina ilya mu Baibolo.

Pa Mulungu ulucelo, programu akasanshamo iciputulwa ca kulekeleshako pa malyashi ya kukonkana kabili cikaba na malyashi yatatu ayakaba no mutwe wa kuti “Ukusesema Kwabamo Ubupilibulo Ukwa kwa Sefania ku Bacita Ukufwaya kwa kwa Lesa.” Aya malyashi yakalondolola ifyo kulya kusesema kwabombele pa kale ku baYuda ne fyo kulebomba lelo, na kucilisha ku mipepele ya mwi sonde lyonse. Pa numa ya ico, mukaipakisha ukutamba icilangililo ca mikansu icikaba no mutwe wa kuti “Ifya Kumwenako Ifya Kutusoka Pali Lelo,” cikakomaila pali bucisenene bwa baume ba mu Israele ilyo fye bashilaingila mu Calo Calaiwe. Pa Mulungu icungulo kukaba ilyashi lya cintubwingi ilikalati, “Umulandu Tufwile Ukwangilwa ku Milimo ya kwa Lesa Iyapesha Amano.”

Ipekanishisheni libela ukuti mukasangweko inshiku shonse shitatu. Ipusheni Inte sha kwa Yehova nga mulefwaya ukwishiba incende ukukabela ibungano mupepi na ku mwenu nelyo kuti mwalembela abasabankanya uno magazini.