Ilyo bafumine ku bwinga ku Kana, Yesu aile ku Kapernahumu. Aile na nyina e lyo na Yakobo, Yosefe, Simone, na Yuda, bamunyina.

Cinshi Yesu ailiile ku Kapernahumu? Uyu musumba wali uwalumbuka sana ukucila Nasarete nelyo Kana kabili ufwile wali uukalamba. Abasambi ba kwa Yesu abengi abo asalile baleikala mu Kapernahumu nelyo lwa mupepi. E ico Yesu ali no kubasambilisha ifya kubomba umulimo kulya kwine baleikala.

Ilyo ali mu Kapernahumu, Yesu alicitile ifipesha amano. Kanshi abantu abengi mu Kapernahumu na mu fifulo fyali lwa mupepi balyumfwile ifipapwa ifyo acitile. Lelo Yesu na basambi bakwe abaYuda abatemenwe ukupepa balingile ukuya ku Yerusalemu ku Ca Kucilila icaliko mu 30 C.E.

Ilyo bali pe tempele mu Yerusalemu, abasambi ba kwa Yesu balimwene icintu caibela ico bashatalile abamonapo.

Amafunde Lesa apeele abena Israele yatile, balingile ukupeela amalambo ya nama pe tempele, kabili abeni abaleisa balekabila ifya kulya pa nshita baleikala mu Yerusalemu. E ico Amafunde yalisuminishe abalefuma ku fifulo fya kutali ukusenda indalama sha kushitamo “ing’ombe, impaanga, imbushi,” e lyo ne fintu fimbi ifyo bali no kulabomfya ilyo bali mu Yerusalemu. (Amalango 14:24-26) E calengele aba makwebo mu Yerusalemu baleshitisha inama ne fyuni mu lubansa lwe tempele ulukalamba. Bamo baleibila abantu pantu balebashitisha ifintu pa mutengo uukalamba.

Yesu alifulilwe icine cine ica kuti alipoosele indalama sha balekabula indalama, apenuna na matebulo no kubatamfya. Lyena atile: “Fumyeni ifi muno! Mwilacita ing’anda ya kwa Tata ing’anda ya makwebo!”—Yohane 2:16.

Ilyo abasambi ba kwa Yesu bamwene ifyo Yesu acitile, balibukishe amashiwi yasobelwe pa Mwana wa kwa Lesa aya kuti: “Nalitemwisha ing’anda yenu.” Lelo abaYuda bena bamwipwishe abati: “Cishibilo nshi uletulanga, apo ulecita ifi fintu?” Yesu abaswike ati: “Bongololeni itempele ili, kabili nkalimya mu nshiku shitatu.”—Yohane 2:17-19; Amalumbo 69:9.

AbaYuda balemona kwati Yesu alelanda pe tempele lilya ilyali mu Yerusalemu. E ico bamwipwishe abati: “Itempele ili lyakuulilwe mu myaka 46, bushe iwe ukalimya mu nshiku shitatu?” (Yohane 2:20) Lelo ilyo Yesu alandile pe tempele, alelanda pa mubili wakwe. Ilyo papitile imyaka itatu, abasambi bakwe balibukishe aya amashiwi ilyo abuushiwe.