Ku Babila Imbila ya Bufumu:

Elenganyeni ukuti muli pa batumwa abeminine pa Lupili lwa Miolife. Awe mwamona fye Yesu aisa apo muli. Lilya line fye ali mu kunina ukuya ku muulu, amweba ati: “Mukapokelela amaka ilyo umupashi wa mushilo ukesa pali imwe, kabili mukaba inte shandi mu Yerusalemu na mu Yudea monse na mu Samaria, na ku mpela ya pano isonde.” (Imil. 1:8) Kuti mwacita shani?

Nalimo kuti mwamona kwati uyu mulimo wamukulila nga nshi. Napamo kuti mwayipusha amuti, ‘Fwe basambi abanono fye kuti twabila shani imbila nsuma ukufika ku “mpela ya pano isonde”?’ Mufwile mulebukisha amashiwi ya kusoka ayo Yesu alandile ilyo kwashele fye ubushiku bumo ukuti afwe, ayatila: “Umusha tacila pali shikulu wakwe. Nga bacushishe ine, na imwe bakamucusha; nga bakonkele amashiwi yandi, bakakonka na mashiwi yenu. Lelo bakacita fyonse ifi kuli imwe pa mulandu we shina lyandi, pantu tabaishiba uwantumine.” (Yoh. 15:20, 21) Nga mwatontonkanyapo pali aya mashiwi, nalimo kuti mwayipusha amuti, ‘Kuti nabila shani imbila nsuma ilyo baletukaanya no kutucusha?’

Na muno nshiku, tulayipusha aya mepusho. Umulimo twapeelwa na ifwe fwe Nte sha kwa Yehova wa kubila sana imbila nsuma ukufika ku “mpela ya pano isonde,” kabili ku bantu “aba nko shonse.” (Mat. 28:19, 20) Bushe uyu mulimo kuti twaubomba shani, maka maka apo kwaliba abatukaanya nga fintu casobeelwe?

Ibuuku lya Imilimo ya Batumwa lyalilondolola bwino bwino ifyo Yehova aafwile abatumwa na Bena Kristu banabo mu mwanda wa myaka uwa kubalilapo ukubomba umulimo bapeelwe. Icitabo mulebelenga pali ino nshita calembelwa ukumwafwa ukwishiba bwino ifyo abatumwa balebomba kabili mukatemwa ukumfwa ifintu ifingi ifisuma ifyo ili buuku lyalandapo. Mwalamona ukuti ifingi ifyalecitika mu nshita ya batumwa e ficitika na ku babomfi ba kwa Lesa muno nshiku. Ifyo tubomba umulimo wesu ne fyo ulukuta lwesu lwateyanishiwa, fyalipalana sana ne fyo cali mu nshiku sha batumwa. Nga mwatontonkanya pali uku kupalana, tatuletwishika ukutila mukacetekela sana ukuti Yehova Lesa acili alatungulula ukuteyanya kwakwe ukwa pe sonde.

Tulesubila no kumupepelako ukuti ilyo mukalasambilila ibuuku lya Imilimo mukacetekela sana ukuti Yehova akamwafwa kabili umupashi wakwe uwa mushilo ukalamukosha. Kanshi twalilileni ‘ukulabila sana’ pa Bufumu bwa kwa Lesa no kwafwa abantu bambi ukuba mu nshila iitungulula ku kupusuka.—Imil. 28:23; 1 Tim. 4:16.