Mona akalumendo pa cikope. Kalemoneka kwati kali no mwenso kabili nakatalalilwa. Bushe walyumfwapo ifi?— Limo, bonse tulomfwapo ifi. Baibolo yalilandapo pa bantu ba kwa Lesa abaleumfwa umwenso no kutalalilwa. Eliya e fyo aleumfwa, kanshi natulande pali ena.

Eliya aleikala mu Israele ninshi Yesu talafyalwa. Ahabu, imfumu ya mu Israele tayalepepa Lesa wa cine, Yehova. Ahabu no mwina mwakwe Yesebele, balepepa lesa wa bufi Baali. Ici e calengele abengi mu Israele ukulapepa Baali. Namfumu Yesebele ali umubi sana kabili alefwaya ukwipaya bonse abalepepa Yehova, ukubikako fye na Eliya. Bushe walishiba ifyo Eliya acitile?—

Eliya alibutukiile mu mpanga no kuyafisama mu lucengo. Bushe cinshi acitile  ifi?— Ni co alyumfwile umwenso. Lelo Eliya talingile ukumfwa umwenso. Mulandu nshi? Pantu alishibe ukuti Yehova aali no kumwafwa. Yehova alyafwilepo Eliya. Inshita imo Yehova alyaswike ipepo lya kwa Eliya ilyo atumine umulilo ukufuma ku muulu. Kanshi Eliya alishibe ukuti Yehova aali no kumwafwa.

Ilyo Eliya aali mu lucengo, Yehova alimwipwishe ati: ‘Cinshi ulecita muno?’ Eliya alyaswike ati: ‘Nine fye neka ncili ndemupepa kabili ndetiina pantu balefwaya ukunjipaya.’ Eliya alemona kwati bonse abalepepa Yehova balibepeye. Lelo Yehova amwebele ati: ‘Awe, te bonse bepeye. Kuli na bambi 7,000 abacili balempepa. E co shipa pantu kuli imilimo na imbi iyo ufwile ukubomba.’ Bushe Eliya alitemenwe ukumfwa ifi?—

Finshi wingasambilila ku lyashi lya kwa Eliya?— Taulingile ukutiina nangu ukumfwa ukuti waba weka. Walikwata abanobe abakutemwa kabili abatemwa na Yehova. Na kabili Yehova alikwatisha amaka e co akulakwafwa. Bushe watemwa ukumfwa ukuti tawaba weka?—