Bethel lishina lya ciHebere ilyalola mu kuti, “Ing’anda ya kwa Lesa.” (Ukutendeka 28:17, 19) Lishina ilyalinga ilya fifulo apo Inte sha kwa Yehova mu fyalo fyalekanalekana babombela imilimo iilenga umulimo wa kushimikila ukulaenda bwino. Ibumba Litungulula lyaba pa maofeshi yakalamba aya Bethel ayabela mu citungu ca New York, ku U.S.A., kabili palya pene, e po batungulwila ne milimo ibombwa pa Bethel mu fyalo fyalekanalekana. Ababombela pa Bethel bonse betwa ati, ulupwa lwa pa Bethel. Baba ngo lupwa pantu bekala pamo, baliila pamo, babombela pamo no kusambilila Baibolo pamo.—Amalumbo 133:1.

Aba pa Bethel bali-ipeelesha ukubombela Lesa pali ici cifulo caibela. Pa Bethel mu fyalo fyalekanalekana paba Abena Kristu abaume na banakashi abaipeela ukulacita ukufwaya kwa kwa Lesa no kubomba umulimo wa nshita yonse uwa kutungilila Ubufumu. (Mateo 6:33) Tapaba uufola, lelo bonse balabapeela imiputule ya kwikalamo ne fya kulya, na kandalama akanono aka kushitamo ifyo balekabila. Bonse ababa pa Bethel balipeelwa imilimo, bamo babomba mu maofeshi, bambi mu kichini nelyo mu muputule wa kuliilamo. Kwaba na babombela ku kupulinta na ku kulonga ifitabo na magazini, na bawamya mu miputule, abacapa ifya kufwala, abalungisha ifileonaika, e lyo na babomba imilimo fye imbi.

Aba pa Bethel babomba imilimo iingi iyakuma ukushimikila pa Bufumu. Icikalamba ico kwabela ififulo ifiitwa ati Bethel, kulenga abantu abengi bakwata ifingabafwa ukwishiba icine ca mu Baibolo. Ino broshuwa yaba pa fyafwa abantu ukwishiba icine. Ibumba Litungulula e lyatungulwile umulimo wa kulemba ino broshuwa. Ilyo yalembelwe baitumine kuli bakapilibula pa Bethel mu fyalo fyalekanalekana ukubomfya kompyuta, kabili yalipulintilwe ukubomfya amamashini ayapulinta ifingi mu nshita iinono, na pa numa baliitumine mu filonganino ukucila 110,000. Aba pa Bethel balibombele imilimo yalekanalekana ukufuma pa nshita balelemba ino broshuwa mpaka yayafika mu filonganino, ne milimo yonse iyo babombele yatungilile umulimo wa kushimikila imbila nsuma uo tufwile ukubomba mu kwangufyanya.—Marko 13:10.

• Ni bani babombela pa Bethel, kabili babasakamana shani?

• Mulimo nshi tulingile ukubomba mu kwangufyanya, uo ababombela pa Bethel batungilila?