Imbila nsuma iya kuti abantu bakekala umuyayaya pano calo yalembwa muli Baibolo. (Amalumbo 37:29) Muli Baibolo mwaba amabuuku 66. Lesa abomfeshe abaume ba cishinka nalimo 40 ukulemba aya mabuuku. Uwalembele amabuuku ya kubalilapo 5 ni Mose, kabili napapita nalimo ne myaka 3,500 apo alembele. Umutumwa Yohane e walembele ibuuku lya kulekeleshako, kabili apo alembele napapita imyaka ukucila 1,900. Bushe ni kwi abalembele Baibolo bafumishe ifyebo? Ni Lesa e wabebele ifya kulemba kabili abomfeshe umupashi wa mushilo pa kulanda nabo. (2 Samwele 23:2) Balembele fyonse ifyo Lesa abebele, tabalembele ifya mu mitwe yabo. Kanshi Yehova e mwine wa Baibolo.—Belengeni 2 Timote 3:16; 2 Petro 1:20, 21.

Tambeni vidio ileti: Nani Umwine wa Fyebo Fyaba mu Baibolo?

Twalishiba ukuti Baibolo yafuma kuli Lesa pantu nga yalanda pa fikacitika ku ntanshi, fisa mukucitika filya fine fye yalandile. Takwaba umuntu uwingeshiba ifikacitika ku ntanshi. (Yoshua 23:14) Ni Lesa fye Uwa Maka Yonse e wingeshiba bwino bwino ifikacitikila abantu ku ntanshi.—Belengeni Esaya 42:9; 46:10.

Baibolo tayaba nga mabuuku yambi pantu yena yafuma kuli Lesa. Baibolo yalipulintwa mu fitundu ifingi sana. Nangu ca kuti yalembelwe kale sana, ifyalembwamo filomfwana ne fyo basayantisti basanga. Kabili abalembele Baibolo bali 40, lelo ifyo balembele filomfwana. * E lyo kabili mu Baibolo emo tusanga ifyo Lesa atemwa abantu. Nangu ca kuti Baibolo ya kale, yalikwata amaka ya kwalula abantu. Ifi fishinka fyalilenga abengi ukusumina ukuti Baibolo, Cebo ca kwa Lesa.—Belengeni 1 Abena Tesalonika 2:13.

Tambeni vidio ileti: Bushe Kuti Twashininkisha Shani Ukuti Ifyo Baibolo Ilanda fya Cine?

Imbila nsuma iyaba mu Baibolo ya kuti Lesa afwaya ukucitila abantu ifisuma. Baibolo ilatweba bwino bwino icalengele Lesa afumye abantu mu paradaise, ne fyo Lesa akacita pa kulenga isonde ukuba paradaise na kabili.—Belengeni Ukusokolola 21:4, 5.

Na kabili Baibolo yalikwata amafunde e lyo ilatupanda na mano. Muli Baibolo mwaba ne lyashi lya fyo Lesa aleumfwana na bantu kale. Kabili ili lyashi lilalenga twaishiba ifyo Lesa aba. Kanshi, nga mulebelenga Baibolo e lyo mwingeshiba Lesa. Ilalondolola ne fyo mwingacita pa kuba cibusa wakwe.—Belengeni Amalumbo 19:7, 11; Yakobo 2:23; 4:8.

Nga mulebelenga kano katabo mukomfwikisha ifyalembwa muli Baibolo. Inshila ya kusambililamo kano katabo naipalana ne fyo Yesu alecita pa kusambilisha abantu. Alebelenga Icebo ca kwa Lesa no kubalondolwela “umwalola Amalembo.”—Belengeni Luka 24:27, 45.

Kwaba ifintu ifisuma, lelo imbila nsuma iyafuma kuli Lesa yalicilapo ukuwama. Nomba abantu bamo tabafwaya ukukutikako, e lyo bambi bali-ipata icine cine. Te kwesha ukubakonkelesha. Pantu pa kuti mukakwate umweo wa muyayaya kano mwaishiba Lesa.—Belengeni Yohane 17:3.