Icipandwa 35

Kuti Nacita Shani pa Kuti Ndeke Ukubomfya Imiti Ikola?

BUSHE walitekwa ubusha ku imiti ikola? Nalimo walishiba ukuti ilonaula umubili ne mitontonkanishishe. Limbi kuti walyesha sana ukuti uleke ukuibomfya, lelo ulatendeka na kabili. Nga e fyo caba, wisakamana. Abengi abalebomfya imiti ikola balileka ukuibomfya, kanshi na iwe kuti waleka! Ku ca kumwenako, belenga ifyo abantu batatu aba ku fyalo fyapusanapusana balekele ukubomfya imiti ikola.

ISHINA Marta

IFYO NAKULILE Bamayo tabaupilwe ilyo nafyelwe, e co ine na nkashi inandi twakulila ukwabula batata. Ilyo nali ne myaka 12, natendeke ukuya ku madisco na bamayosenge abatemenwe sana ukucinda. Apo nshali uwaifinya naishilekwata abanandi abali ne mibele yabipa. Natendeke ukubomfya imiti ikola ilyo nali fye ne myaka 13. Kabili natendeke no kubomfya cocaine. Pa kubala, nalitemenwe sana imiti ikola. Lelo mu kuya kwa nshita, natendeke ukulamona ifinjelengwe kabili naletiina fye ifili fyonse. Imiti ikola nga yapwa mu mutwe, ninshi kutendeka ukulatontonkanya fye pa kuipaya. Nalefwaya ukuleka ukubomfya imiti ikola lelo nalefilwa.

IFYO NALEKELE Natendeke ukulatontonkanya pali Lesa kabili limo naleya na ku Calici. Lelo nshalesanga icisansamushi. Ilyo nali myaka 18, natampile ukwikala no mwaume nale-enda nankwe kabili naishilekwata umwana umwaume. Ukukwata umwana kwanengele ukufwaya ukwalula imibele  yandi. Uwali cibusa wandi kale akuukiile mupepi na po twaleikala. Ilyo antandalile, alipwishe ifyo nali. Namwebele fyonse ifyo nalepitamo. Anjebele ukuti nomba ni Nte ya kwa Yehova kabili anjebele ukuti ndesambilila Baibolo nankwe. Nalisumine.

Nasambilile ukuti ifyo nalecita tafyalesekesha Lesa kabili nalekabila ukuleka ukubomfya imiti ikola. Lelo nalitekelwe ubusha ku miti ikola. Nalipapeete Lesa ukuti angafwe. Nalefwaya ukulacita ifingamusekesha. (Amapinda 27:11) Pa numa ya kusambilila Baibolo pa myeshi 6 no kulasangwa ne Nte sha kwa Yehova, nalilekele ukubomfya imiti ikola. Pali ino nshita ubumi bwandi bwaliwama. Nshaba nge fyo nali. Nalyupwa ku Mwina Kristu umusuma. Nalisambilisha umwana wandi ukulakonka ifyaba mu Baibolo. Ndatasha sana ukuti Yehova alyasuka ipepo lyandi!

ISHINA Marcio

IFYO NAKULILE Nakulile mu Santo André, umusumba umwaba abantu abengi mu citungu ca São Paulo ku Brazil. Natendeke ukupeepa, ukubomfya imiti ikola no kwiba ilyo nali fye umwaice. Abanandi abengi baleiba bamotoka, no kushitisha imiti ikola. Umunandi umo alepeela abaice twaleikala nabo ku ncende imo ine imiti ikola. Ilyo batendeke ukubomfya iyi miti, baleya mu kushita kuli ena.

Bakapokola lyonse balelonda icifulo cesu kabili ilingi balenjikata pa milandu iyabula no kulondoloka e lyo umuku umo balinjikete pantu baletunganya ukuti naleshitisha imiti ikola. Ilingi nine nalesunga mu ng’anda yandi ifipe fya kwiba.

 Abantu balentiina sana. Amenso yandi yali ayakashika sana kabili nshalemwentula. Na kuba, lyonse nalemoneka fye ngo ulefwaya ukwipaya umuntu. Balenjita ati “Tufão” (e kutila Inkuuka) pantu konse uko naleya nalebuusha ifyongo. KabiIi nalenwa sana no kucita ubulalelale. Abanandi abengi balifwile e lyo bambi balibakakile. Naleba fye uwabombomana ica kuti nalefwaya no kuipaya.

IFYO NALEKELE UKUBOMFYA IMITI IKOLA Nalombele Lesa ukuti angafwe. Mu kuya kwa nshita, nakumene na ba Nte kabili natendeke ukusambilila Baibolo. Nasambilile ukuti Lesa alikwata ishina, ni Yehova, no kutila alasakamana no kwafwa abafwaya ukucita ifyo afwaya. (Amalumbo 83:18; 1 Petro 5:6, 7) Nalekabila ukwaluka mu fingi. Icankosele sana kusambilila ukumwentula.

Nalepepa kuli Yehova ukuti angafwe, kabili nalekonka fyonse ifyo nalesambilila mu Baibolo. Ku ca kumwenako, nalilekele ukulasangwa ne “fibusa” fyabipa kabili nalilekele no kuya ku fikulwa fya bwalwa. Nasalilepo ukulasangwa na bantu abalekonka ifyo Baibolo isambilisha. Nalishomboka sana lelo nalyaluka, nalileka ukwiba no kuleta ifimfulunganya. Napapita imyaka 10, ukwabula ukubomfyapo imiti ikola.

ISHINA Craig

IFYO NAKULILE Nakulile pa farmu yabelele ku kapinda ka ku kulyo ku Australia. Batata balenwa sana, kabili bapatukene na bamayo ilyo nali ne myaka 8. Bamayo balyupilwe kumbi kabili e bo natendeke ukwikala nabo ukufika ilyo nakumenye  imyaka 17. Pali iyi nshita nasambilile ifya kubeya amasako ya mpaanga kabili natendeke ukusangwa na babomba iyi ncito ica kuti twale-endauka ukuya mu kufwaya incito ukuli konse. Natendeke ukulabomfya imiti ikola iyalekanalekana no kunwa sana. Naleteka umushishi no ku-uluka. Natendeke ukufulilwa abantu bambi kabili imilandile yandi tayaweme kabili nali sana ne cifukushi. Limo balenjikata no kunkaka mu cifungo.

Nakukiile kwi tauni linono ilyabela ku Western Australia e ko natendeke ukwikala no mukashana uo nale-enda nankwe. Uyu mukashana alebombela mu cikuulwa ca bwalwa ica pe hotela lya ku ncende twaleikalila. Bonse babili twalepeepa no kunwa, kabili twaleilimina fye ibange.

IFYO NALEKELE UKUBOMFYA IMITI IKOLA Ilyo twapwishishe fye ukusombola ibange twaumfwile Inte sha kwa Yehova shilekonkonsha pa mwinshi wa ng’anda yesu iyalemoneka fye iyalekeleshiwa. Nalikutike ku fyo banjebele kabili mu kuya kwa nshita  nalishininkishe ukuti ifyo Baibolo ilanda fya cine. Panono panono natendeke ukulwisha ukuleka ifyabipa fyonse ifyo nalecita.

Bwangu bwangu fye nalishibe ukuti mfwile ukuleka ukupeepa ibange. Finshi fyali no kubimbwamo? Nalibikileko sana amano ku kulima ibange, e co intanshi natontonkenye ukuti mpeele fye bambi. Lelo namwene ukuti tacali bwino ukucita ifyo kabili napingwilepo fye ukulyonaula. Ipepo lyalingafwile sana pa kuti ndeke ukubomfya imiti ikola no kunwensha ubwalwa. Napepele ukuti Lesa angafwe no mupashi wakwe pa kuti nkwate amaka ya kuleka imibele yabipa. Nalekele no kusangwa na bantu abalefwaya ndecita ifyabipa. Ilyo naleya ndesambilila Baibolo no kulakonka ifyo isambilisha, nalilekele ukusakamikwa sana pa filubo fyandi. Umukashana nale-enda nankwe na o atendeke ukusambilila Baibolo no kwaluka mu mibele yakwe. Kabili twalyupene. Nomba papita imyaka 21 apo twa-alwila imibele yesu kabili twalikwata ubumi busuma, twaliba ne nsansa ukukwata abana babili. Ndomfwa umwenso nga natontonkanya ifyo ubumi bwandi bwali no kuba Yehova nga tangafwile ukwalula imibele.

ILEMBO ILIKWETE ICISHINKA CIKALAMBA

“Yehova e bukose bwandi kabili e maka yandi.”—Esaya 12:2.

IFYO WINGACITA

Nga cingacitika, wilasangwa na abantu, nelyo ukuya ku ncende ukwingalenga wafwaya ukubomfya imiti ikola. Abafwilisha basanga ukuti, ifi twalandapo kuti fyalenga walafwaya ukubomfya imiti ikola.

BUSHE WALISHIBA UKUTI . . . ?

Imiti ikola kuti yayalula ifyo bongobongo yaba.

IFYO NDEFWAYA UKUBOMBELAPO!

Nga nabomfya imiti ikola na kabili, nkacita ifi

Ifyo ningatemwa ukwipusha abafyashi pali ili lyashi ni fi

AMEPUSHO YA KUTONTONKANYAPO

● Mulandu nshi umuntu alingile ukwalwila imibele yakwe nga alefwaya ukuleka ukubomfya imiti ikola?

●Bushe ukusambilila icine pali Lesa kuti kwa-afwa shani umuntu?

[Amashiwi pe bula 253]

“Pa mulandu wa kuti ndakonka ifyo Baibolo ilanda, naliba ne nsansa kabili ubumi bwandi bwalikwata ubupilibulo.”—E fyalandile Marta

[Icikope pe bula 256]

Ukucimfya ukukunkuma ku miti ikola kwaba kwati kufulumuka mu ng’anda iilepya—kuti washa ifipe fyonse, lelo kuti wapusuka