Ilyo kwashele inshiku shibili ukuti kube Icibukisho, munyinefwe umo ku Indonesia alipeele uubombela apo bemika imyotoka akapepala ka kwitilapo abantu ku Cibukisho. Apo amupeele fye akapepala kamo, uyu umuShilamu, alipwishe nga ca kuti na bambi kuti basangwako. Munyinefwe alisumine. Uyu mwaume aebele  munyinefwe ukuti ulupwa lwakwe lukalamba, e ico alilombelepo utupepala na tumbi. Munyinefwe alimupeele utupepala na tumbi 20 kabili alimulondolwelele ukuti alemwita ku Cibukisho ca mfwa ya kwa Yesu no kuti nampo nga Bena Kristu nelyo nga baShilamu, bonse kuti basangwako. Lyena uyu mwaume atile akaya na bantu 60 nelyo 70.

Ilyo papitile fye inshita iinono ukutula apo ilyashi lya Cibukisho lyatendekele ninshi abantu 248 nabekala kale, ulya mwaume alifikile na bantu nalimo 100, abaume, abanakashi, na bana ukubikako na bakoloci e lyo no mwanakashi uwali pa bukulu pa myeshi iingi. Pa kuya ku hotela ukwabelele Icibukisho, balipile fye abene ba myotoka isho babomfeshe. Ilyo bafikile pa hotela, bamalonda balefwaya ukubakaanya ukwingila. Baletwishika ico abaShilamu balefwaila ukusangwa ku kulongana kwa Bena Kristu. Nomba ilyo babalangile utupepala twa kwitilapo abantu ku Cibukisho, balibengishe. Abantu nalimo 60 pali aba e bo baingishe nangu ca kuti abantu balititikene mu cikuulwa.

Pa numa ya nshiku ishinono, munyinefwe aliilemona ulya mwaume no kumwipusha nga ca kuti abantu bakwe balitemenwe ifyo baumfwile pa kulongana. Amwaswike ukuti pa kubala, bonse baleshimunuka pa kuya, lelo pa mpela ya kulongana balitemenwe nga nshi pantu aba bwananyina bali abasuma, balebaposha na mu minwe. Lyena munyinefwe aitile uyu mwaume ukuyasangwa ku kulongana kwa lyashi lyaibela ilyaliko pa Mulungu. Uno muku aile na ba lupwa lwakwe na bena mupalamano, bonse pamo 40. Apo bafikile ilyo ukulongana kwali mu kupwa, baeluda baebele munyinefwe ukuti abwekeshepo  ukulanda ilyashi. Ceyamani alibwekeshepo umutwe wa lyashi, alondololako na panono ifyo ukulongana kwali no kuba, ukusanshako no ulwimbo e lyo ne pepo. Pa kwafwilisha aba abaShilamu ukumfwikisha Baibolo, kalanda alebomfya amashiwi ayo baishibe, pamo nga, “Icitabo ca Mushilo” mu nshita ya kulanda ukuti “Baibolo” no kuti “kasesema Isa” mu nshita ya kulanda ukuti “Yesu.”

Pa numa, eluda umo alitandalile uyu mwaume ku ng’anda ku mwakwe, kabili balitendeke ne sambililo lya Baibolo muli broshuwa ya Mulekutika Kuli Lesa. Abantu na bambi 12 balisangilweko, ukubikako na baShilamu abanakashi e lyo na bana.

Amabasi ayasenda abantu ukufuma ku Ulaanbaatar mu Mongolia, no kubatwala ku ncende shimbi isha muli ici calo, yenda nalimo inshiku shibili pa kuyafika. Ilingi line, abali pa bulendo balolesha fye pa mawindo nelyo ukusendama pantu tababapeelako ifya kubelenga nangu ca kuti abena Mongolia balitemwa ukubelenga. Apo balishibe ukuti ifi e fyo caba, bamunyinefwe bamo aba mu cilonganino ca Songinokhairkhan baile kuli banamutekenya ba basi no kubeba abati: “Tulefwaya ukumupeelako ica bupe icisuma. Mu ndeke, lyonse balabikamo ifya kubelenga. Nga ca kutila mulemona ukuti abo musendele kuti bafwayako ifya kubelenga, kuti twamubikilamo impapulo muli basi.” Banamutekenya 8 balisumine. E ico bamunyinefwe balibikile magazini 299 na mabroshuwa 144 mu mabasi kabili balipekenye no kuti balebikamo magazini iipya nga yafuma.

Mu calo cimo ica ku Asia, baeluda babili balibatumine ku kuyamona nkashi umo uwanakile pa myaka 8. Ilyo bafililwe ukumonana nankwe, balimutumine foni pa kuti bakumane pe shitolo lyakwe pa maliketi. Balyendawike mu tushila utwafyenenkana, basukile bafika pe shitolo ilyo balembelepo adresi iyamoneke kwati yalilingene ne ya kwa nkashi. Ilyo baingile, umwanakashi umo alibaposeshe, kabili alikwete na Baibolo iinono pe tebulo lyakwe. Ilyo umwanakashi abebele ishina lyakwe, itauni uko afumine ne myaka ya bana bakwe babili, bamunyinefwe batontonkenye fye ukuti e uyu wine. Bamwebele abati, “Ni we nkashi yesu, tuli Nte sha kwa Yehova.”

Abaswike ukuti, “Ndi mwina Kristu” ninshi alemoneka uwapelenganishiwa. Ifyo abaswike fyalibapapwishe. Na lyo line, balimupeele impapulo kabili alitashishe sana. Ilyo bamunyinefwe bafumine pali uyu mwanakashi balilwike ukuti baile pe shitolo limbi! Mu nshita ya kuya pe shitolo apalembelwe 2202, bena baile pe shitolo apalembelwe 2200. Umo pali aba bamunyinefwe atile: “Naumfwile umubili waenda kwati fye ni malaika e watutumine kuli lilya ishitolo. Uyu mwanakashi akwata ishina limo line na nkashi kabili bekala mwi tauni limo line, abana babo nabo bali ne myaka nalimo imo yine. Nga ca kuti uyu mwanakashi akwete ishina limbi, aleikala mwi tauni limbi, nga twalishibe ukuti te nkashi uo twalefwaya.”  Ukufuma pali uyu mwanakashi ukufika pe shitolo lya kwa nkashi uwalebalolela, pali fye amashitolo yabili.

Pa mulandu ne fi ifyacitike, umwanakashi uo balandile nankwe akatanshi alitendeke ukusambilila Baibolo no kulongana. Nkashi uwali uwanaka na o, alitampile ukulongana no kulashimikila lyonse. Atile, “Nalyumfwile bwino sana pantu nangu ca kuti nalinakile pa myaka iingi, Yehova tandabileko.”

Ba Greg na ba Alma bakuukile ku cishi ca Catanduanes ku Philippines ukwali ukukabila kwa bakabila ba Bufumu. Mu ncende shimo isha muli ici calo, mwaliba sana impili, kanshi ba Greg na ba Alma baleenda amakilomita 19 pa kuyafika ukwa kushimikila. Limo, baleoba ubwato pa maawala yabili pa kuyashimikila ku fishi fimbi. Mu nshita ya mainsa, cilabakosela ukwenda. Kanshi, mu nshita ya kwikala fye pa ng’anda ukwabula ukuya mu kushimikila, baletuma amameseji pantu kampani ya mafoni yalesuminisha abantu ukutuma amameseji apo balefwaila no kubalipilisha fye indalama ishinono.

Ba Greg batile ico babalilapo ukulemba muli meseji lishina lyabo. Lyena balalemba ukuti, “Ndefwaya ukumwebako ilyashi limo ilyaba mu Baibolo.” Ilembo bamona ukuti e libomba bwino ni Yohane 17:3. Pa numa ya kwambula ili ilembo, balepusha amepusho yabili, pamo nga: Bushe Lesa wa cine nani? na Bushe Yesu Kristu nani? Lyena balalomba umuntu ukuti abatumine icasuko. Nga ayasuka, ba Greg balalundapo ilembo na limbi pamo nga Amalumbo 83:18. Nga atwalilila ukwasuka, ba Greg balamwipusha nga kuti bakonkanyapo ukulanda nankwe pa foni. Ba Greg na ba Alma batile abengi balatemwa ukulanshanya nabo.

Umwanakashi umo uo ba Greg na ba Alma balandile  nankwe alibepwishe amepusho ayengi pali Baibolo, e co balitumishenye amameseji ayengi. Basukile batendeka ne sambililo lya Baibolo. Uyu mwanakashi aleebako umwanasenge wakwe no munankwe uo alebomba nankwe ifyo alesambilila. Ne ci calengele ukuti bonse batatu babatishiwe.