Ba Rafael Pared, ababombela pa Bethel na bena mwabo ba Francia, baali bakasabankanya mu 1957 ninshi bali fye ne myaka 18. Balebukisha ifyo bakapokola balebakonka  luto numa nga baleshimikila pa kuti fye babekate pamo na abo baleshimikila nabo. Ba Rafael batile, “Limo pa kubutuka bakapokola, twaleciluka impango no kwendela mu tushila utunono utwaba pa kati ka fikuulwa.” Ba Andrea Almánzar bena balondolwele ifyo bena na bambi balecita pa kubutuka bakapokola. Batile: “Twalingile ukuba abashilimuka pa kushimikila. Nga tuli mu butumikishi, twalebala twashimikila pa ng’anda imo e lyo twacililapo amayanda 10 pa kuyashimikila pa ng’anda imbi.”

Ilyo calefika mu 1959, ninshi Trujillo alitekele imyaka mupepi na 30, lelo ifyo abantu balemona mitekele fyaile fileyaluka. Pa 14 June, 1959, abena Dominican abasendelwe bunkole balibwelele mu Dominican Republic pa kuti bafumye Trujillo pali bukateka. Nangu ca kuti aya mapange tayabombele kabili bamo abalelwisha imitekele ya kwa Trujillo nga tababepeye, balebakaka, kwali na bambi abapampamine pa kupwisha imitekele ya kwa Trujillo, e co balitwalilile ukumulwisha.

Pa numa ya kubombela pamo no buteko bwa kwa Trujillo pa myaka iingi, pa 25 January, 1960, baKatolika balilembele kalata umo balondolwele ukuti tabatemenwe ifyo ubuteko bwalecusha abantu. Bernardo Vega, kalemba wa lyashi lya kale umwina Dominican, atile: “Mu June 1959, kwalicitike fimo ifyalengele baKatolika balukile Trujillo pa muku wa kubalilapo; icimfulunganya mu buteko mwine, abantu baliimine ubuteko kabili ubuteko nabo bwalikandile bonse ababimbilwemo.”

Icawemeko ca kuti mu May 1960, ca kuti ubuteko bwalifumishepo icibindo pa mulimo wa Nte sha kwa Yehova. Trujillo umwine e wafumishepo icibindo pa numa ya kupusana na baKatolika, icintu ico tushaleenekela. Na mu kulekelesha, twasukile twalubuka.