Ukulingana ne fyo Mateo Ailembele 14:1-36
14 Pali ilya nshita, Herode kateka wa citungu, alyumfwile ifyo Yesu acitile+
2 kabili aebele ababomfi bakwe ati: “Uyu ni Yohane Kabatisha. Alibuuka ku bafwa, kabili e mulandu wine alecitila ifi ifipesha amano.”+
3 Herode* alikete Yohane, amukaka, amupoosa na mu cifungo pa mulandu wa kwa Herodia muka Filipi uwali umukalamba+ wa kwa Herode.
4 Pantu Yohane alemweba ati: “Ukulingana ne funde taufwile ukumuupa.”+
5 Lelo nangu ca kuti alefwaya ukwipaya Yohane, aletiina abantu, pantu baishibe ukuti ni kasesema.+
6 Lelo ilyo balesefya ubushiku bwa kufyalwa+ ubwa kwa Herode, umwana mwanakashi uwa kwa Herodia alicindile kabili Herode alitemenwe nga nshi+
7 ica kuti alilapile ukuti aali no kumupeela conse ico aali no kulomba.
8 Lyena alyangufyenye ukuyalomba ifyo nyina amwebele. Atile: “Mpeeleni nomba line umutwe wa kwa Yohane Kabatisha+ pa mbale.”
9 Nangu ca kuti imfumu yalyumfwile ubulanda, yalandile ukuti bamupeele umutwe pa mulandu wa kuti yalilapile, na pa mulandu wa bantu abo yalelya nabo.*
10 E ico yatumine abakuyaputula Yohane umutwe mu cifungo.
11 Awe baletele umutwe wakwe pa mbale no kupeela umukashana, na o autwele kuli nyina.
12 Pa numa abasambi bakwe baishilesenda icitumbi cakwe bayashiika, e lyo bayaeba Yesu ifyacitike.
13 Ilyo Yesu aumfwile ifi, alifumineko anina ubwato aya ukwali tondolo pa kuti abe fye eka. Lelo ilyo amabumba yaumfwile ifi, yalifumine mu misumba+ yamukonka na makasa.
14 Ilyo afikile ku lulamba, amwene ibumba ilikalamba, kabili alibomfwilile uluse,+ lyena aundepe abantu babo abalwele.+
15 Lelo ilyo cali icungulo, abasambi bakwe baishile uko ali e lyo bamweba abati: “Pano tuli ni pa mpanga na kasuba nakawa; ebeni abantu baleya pa kuti bayeishitila ifya kulya+ mu mishi.”
16 Lelo Yesu abebele ati: “Tabafwile ukuya; imwe bene bapeeleni ifya kuti balye.”
17 Nabo bamwebele abati: “Tatukwete nangu fimo, lelo tukwete fye imikate 5 ne sabi libili.”
18 Na o abebele ati: “Leteni kuno.”
19 Lyena aebele amabumba ukuti yekale pa cani. E lyo abuula imikate 5 ne sabi libili, alolesha mu muulu, apepa no kupepa,+ lyena amokawile imikate apeela abasambi, e lyo nabo bapeela amabumba.
20 E ico bonse baliliile no kwikuta, kabili ilyo balongenye ifyashelepo, fyaiswile imiseke 12.+
21 Abaliile bali abaume nalimo 5,000, ukwabula ukupendelako abanakashi na bana abanono.+
22 Lyena apo pene, aebele abasambi bakwe ukuti banine ubwato bamutangilile kwi shilya. Ilyo baleya ena ashele alesalanganya amabumba.+
23 Ilyo apwile ukusalanganya amabumba, aile ku lupili eka mu kupepa.+ Kabili ilyo cafikile icungulo bushiku, aliko fye eka.
24 Pali iyi nshita ubwato bwali ukutali sana* ukufuma ku mulundu, kabili bwalesunkana ku mabimbi, pantu umwela walefumina ku ntanshi yabo.
25 Lelo mu bulinde bwalenga 4* ubwa bushiku, aile kuli bena ale-enda pali bemba.
26 Ilyo abasambi bamumwene ale-enda pali bemba, balitiinine, kabili batendeke ukulanda abati: “Moneni icapala umuntu!” Lyena balipundile pa mulandu wa mwenso.
27 Lelo apo pene Yesu abebele ati: “Shipeni, nine; mwitiina.”+
28 Lyena Petro amwebele ati: “Shikulu, nga nimwe njebeni njise kuli imwe pa menshi.”
29 Na o amwebele ati: “Isa!” E ico Petro alifumine mu bwato, atendeka no kwenda pa menshi ukuya kuli Yesu.
30 Lelo ilyo amwene icikuuku ca mwela alitiinine. Kabili ilyo atendeke ukwibila, apundile ati: “Mwe Shikulu mpususheni!”
31 Ilyo line fye Yesu atambike ukuboko kwakwe, amwikata e lyo amweba ati: “Cinshi wacitwishikila?+ Icitetekelo cobe cinono.”
32 Ilyo baninine mu bwato, icikuuku ca mwela calilekele.
33 Lyena abali mu bwato balimufukamine* e lyo balalanda abati: “Cine cine uli Mwana wa kwa Lesa.”
34 Kabili balyabwike bafika na kwi shilya ku cifulo ico beta ukuti Genesarete.+
35 Ilyo abantu abaleikala kuli ilya ncende bamwishibe, balyebeleko abaleikala mu mishi iyali mupepi, kabili abantu balimuleteele bonse abalwele.
36 Nabo baile mu kumupaapaata ukuti bakumyeko fye ku nsenkebele sha ca kufwala+ cakwe ica kunse, na bonse abakumisheko balipolelele.
Amafutunoti
^ E kutila, Herode Antipa. Moneni Amashiwi ya mu Baibo ne fyo Yapilibula.
^ Nelyo “abo yalelya nabo pe tebulo.”
^ Mu ciGriki, “ifibansa ifingi.” Icibansa cimo calelepa amamita 185.
^ Pa nshita balelemba Baibo ubushiku babwakenye mu fipande 4. Ica kubalilapo caletampa 6 koloko ya cungulo ukufika pa 9 koloko ya bushiku, ica bubili 9 koloko ukufika pa 12 koloko ya bushiku, ica butatu 12 koloko ukufika ku 3 koloko ya lucelo, e lyo icalenga 4, 3 koloko ukufika 6 koloko ya lucelo.
^ Nelyo “balimukontamine.”
