Malaki 2:1-17
2 “Nomba ndepeela imwe bashimapepo ili ifunde.+
2 Nga mwakaana ukukutika, mwakaana no kubika amano ku kucindika ishina lyandi, nkamutiipa+ kabili nkaalula amapaalo yenu yakabe ifitiipu.+ Na kuba ninjalula kale amapaalo yenu, yaba fitiipu pantu tamubikako amano.” E fyo Yehova wa mabumba alanda.
3 “Moneni! Ifyo mucita fikalenga nkonaule* imbuto isho mwabyala,+ kabili nkamukantaika amafi ya nama pa menso, amafi ya nama isho mwipaya ilyo mulesefya imitebeto yenu; kabili bakamupoosa pa miina ya aya yene amafi ya nama.
4 Lyena mukeshiba ukuti nine namupeele ili funde pa kuti icipangano candi na Lebi citwalilile,”+ e fyo Yehova wa mabumba alanda.
5 “Icipangano ico napangene na Lebi calengele atwalilile ukuba no mweo, kabili aleba no mutende. Ifi namupaalile fyalengele alentiina.* Apo alecindika ishina lyandi, talefwaya ukucita nangu cimo icingankalifya.
6 Alesambilisha ifunde lya cine kabili talelanda ifyabipa.+ Pali ine na ena pali umutende. Kabili ali mulungami,+ alilengele na bantu abengi baleka ukucita ifyabipa.
7 Pantu shimapepo afwile ukulasambilisha abantu ifyo aishiba pali Lesa, kabili abantu bafwile ukulaya kuli ena pa kuti abasambilishe amafunde,*+ pantu ni nkombe ya kwa Yehova wa mabumba.
8 “Lelo imwe mwalifuma mu nshila. Mwalilenga abantu abengi baleka ukukonka* amafunde.*+ Tamukonka icipangano ico napangene na Lebi,”+ e fyo Yehova wa mabumba alanda.
9 “E ico nkalenga abantu bakamusuule, kabili bakalemumona ukuti muli ba panshi pa bantu bonse, pantu mwalifumine mu nshila shandi, kabili tamwalekonka bwino amafunde pa kupingula abantu.”+
10 “Bushe ifwe bonse tatwakwata fye shifwe umo?+ Bushe te Lesa umo wine atubumba bonse? E ico, cinshi tubela no bucenjeshi ku banensu?+ Ifi tucita, tulatoba icipangano ca fikolwe fyesu.
11 Yuda alicita ubucenjeshi, kabili aba mu Israele na mu Yerusalemu balicita icintu ica bunani; pantu Yuda alikowesha umushilo* wa kwa Yehova+ uo umwine atemwa, kabili Yuda alyupa umwana mwanakashi wa kwa lesa wa bena fyalo.+
12 Onse* uwa mu matenti ya kwa Yakobo uucita ifi, Yehova akamulofya, nangu fye alatuula Yehova wa mabumba imituulo.”+
13 “Kabili kwaliba na cimbi* ico mucita, icalenga iciipailo ca kwa Yehova cisulepo ifilamba, ukulila no kulilishika, ica kuti alileka ukubika amano ku mituulo mumutuula nelyo alileka ukupokelela ifyo mumuletela.+
14 Kabili mutila, ‘Cinshi calenga?’ Ni co Yehova ni nte pali iwe no mukashi obe uo waupile ilyo wali umulumendo, uo wapondokela, nangu ca kuti munobe kabili mukashi uo wapangana nankwe icipangano.*+
15 Lelo kwali bamo pali imwe abashalefwaya ukulacita ifi. Cinshi calengele? Ni co balefwaya abakatuntuka* muli bena bakabe abantu ba kwa Lesa. E ico na imwe mufwile ukulafwaisha ukucita ifisuma kabili mwilapondokela abakashi ba ku bulumendo bwenu.
16 Pantu nalipata ukulekana,”+ e fyo Yehova Lesa wa kwa Israele alanda, “kabili nalipata* umuntu umunkalwe,” e fyo Yehova wa mabumba alanda. “Mulingile ukulafwaisha ukucita ifisuma kabili mwilaba no bucenjeshi.+
17 “Mwalilenga Yehova atendwa amashiwi yenu.+ Lelo mutila, ‘Bushe amashiwi yesu yamutendusha shani?’ Ni co mutila, ‘Onse uucita ifyabipa musuma mu menso ya kwa Yehova, kabili alimutemwa,’+ nelyo mutila, ‘Bushe Lesa wa mulinganya aba kwisa?’”
Amafutunoti
^ Mu ciHebere, “nkakalipile.”
^ Nelyo “alencindika.”
^ Nelyo “ifya kukonka.”
^ Mu ciHebere, “baleipununa.”
^ Nelyo kuti yapilibula no kuti, “pa mulandu ne fyo mubeba.”
^ Nelyo kuti yapilibula no kuti, “icifulo ca mushilo.”
^ Mu ciHebere, “Uulelola no uleasuka.”
^ Mu ciHebere, “icalenga bubili.”
^ Nelyo “uo waupa ukulingana ne funde.”
^ Mu ciHebere, “ulubuto.”
^ Mu ciHebere, “alipata.”
