Amalumbo 69:1-36
Ku mukalamba wa bakemba; “Ulwimbo lwa Maluba.” Ulwa kwa Davidi.
69 Mpususheni mwe Lesa, pantu amenshi yalanjipaya.*+
2 Naibila mu matipa ayashika, umushaba umushili uwakosa uwa kwimininapo.+
Naibila mu menshi ayaba apashika,Kabili umukuku wansenda.+
3 Nanaka ukubilikisha abakungafwa;+Pa mukoshi pasesa.
Amenso yandi yanaka ilyo ndelolela Lesa wandi.+
4 Abampata apabula umulandu+Bengi ukucila umushishi wa ku mutwe wandi.
Abafwaya ukunjipaya,Abalwani aba bucenjeshi* nabafula.
Balimpatikishe ukubwesha ifyo nshaibile.
5 Mwe Lesa mwalishiba ubuwelewele bwandi,Kabili ifyo nacita ifyalenga mbe uwa mulandu tafyafisama kuli imwe.
6 Mwileka abamucetekela baseebane pa mulandu wandi,Mwe Shikulu Mulopwe, Yehova wa mabumba.
Mwileka abamufwaya baseebane pa mulandu wandi,Mwe Lesa wa kwa Israele.
7 Abantu balansaalula pa mulandu wa kuti ndi mubomfi wenu,+Umuseebanya naufimba icinso candi.+
8 Naba umweni kuli bamunyinane,Na ku bana ba kwa mayo+ naba umwina fyalo.
9 Nalitemwisha+ ing’anda yenu,Kabili umuseebanya wa bantu abamuseebanya wishile pali ine.+
10 Ilyo naicefeshe* kabili ilyo nafungile,Balinsaalwile.
11 Ilyo nalefwala insamu,Balempumya.*
12 Abekala mu mpongolo ya musumba balanda pali ine,Kabili bacakolwa bemba pali ine.
13 Nomba ipepo lyandi nalifike kuli imwe,Mwe Yehova, pa nshita yalinga.+
Apo mwaliba no kutemwa ukushipwa mwe Lesa,Njasukeni kabili nangeni ukuti nimwe kapususha+ uwacetekelwa.
14 Mpususheni ku matipa,Mwileka njibile mu matipa.
Mpususheni ku bampataNa ku menshi+ ayaba apashika.
15 Mwileka umukuku unsende,+Nelyo amenshi ayaba apashika yamineNangu icishima* cinjisalile+ mu kanwa ka ciko.
16 Njasukeni mwe Yehova, pantu ukutemwa kwenu ukushipwa kusuma.+
Alukileni kuli ine+ pantu mwalikwatisha uluse,
17 Kabili mwifumya icinso cenu pa mubomfi wenu.+
Njasukeni bwangu pantu ndecula.+
18 Palameni kuli ine kabili mpususheni;*Ndubuleni ku balwani bandi.
19 Mwalishiba ifyo naseebana, ifyo abantu bansaalula no kumpumya.+
Abalwani bandi bonse mulabamona.
20 Umusaalula naucena umutima wandi kabili icilonda te kuti cipole.*
Nale-enekela ukuti kwalaba aba kunangulukilako, lelo takwali nangu umo,+Kabili nalefwaya aba kunsansamusha, lelo nshasangile nangu umo.+
21 Lelo mu cifulo ca kumpeela ifya kulya, bampeele sumu,*+Kabili ilyo nali ne cilaka, bampeele umwangashi uwakantuka.+
22 Lekeni itebulo lyabo libe ulukose lwa kubekata,Kabili ifintu ifingi ifyo bakwata fibe iciteyo.+
23 Lekeni amenso yabo yabe na kafifi pa kuti baleke ukumona,Kabili lengeni intungu shabo shiletutuma.
24 Pongolweleni pali bena ubukali bwenu,Kabili ubukali bwenu ububilima ngo mulilo nabubasange.+
25 Lekeni inkambi* yabo ishale icibolya;Lekeni mu matenti+ yabo mwilaikala umuntu nangu umo.
26 Pantu bacusha uo mwaumine,Kabili lyonse balanda pa fyo abo mwacenene bacula.
27 Lundenipo umulandu pa milandu bakwete,Kabili mwileka banonkelemo mu bulungami bwenu.
28 Lekeni bafuutwe mwi buuku lya ba mweo,*+Kabili amashina yabo yelembelwa pamo na ya balungama.+
29 Lelo ine ndecula kabili ndekalipwa.+
Mwe Lesa lekeni amaka yenu ayapususha yancingilile.
30 Nkembila ishina lya kwa Lesa amalumbo,Nkamucindika kabili nkamutootela.
31 Ici cikalenga Yehova akasekelele, ukucila ifyo engasekelela nga bamutuulila ilambo lya ng’ombe iilume,Ukucila ifyo engasekelela nga bamutuulila ilambo lya ng’ombe iyana iilume iya insengo kabili iya mabondo.+
32 Abafuuka bakamona ubusuma bwa kwa Lesa kabili bakasekelela.
Mwe bafwaya ukuti Lesa alemutungulula, lekeni imitima yenu ishipe.
33 Pantu Yehova alekutika ku bapiina,+Kabili takalekeleshe abantu bakwe bankole.+
34 Lekeni imyulu ne sonde fimulumbanye,+Babemba e lyo na fyonse ifyabamo.
35 Pantu Lesa akapususha Sione+Kabili akakuula cipya cipya imisumba ya mu Yuda,E mo bakekala kabili ikaba yabo.*
36 Ikaba ubupyani+ bwa bakatuntuka mu babomfi bakwe,Kabili abatemwa ishina+ lyakwe bakekalamo.
Amafutunoti
^ Nelyo “nayesa ku mweo wandi.”
^ Nelyo “Abalwani abampata apabula umulandu.”
^ Nelyo “umweo wandi waicefeshe.”
^ Mu ciHebere, “Balelanda pali ine mu mapinda.”
^ Nelyo “icilindi.”
^ Nelyo “Palameni ku mweo wandi kabili ulubuleni.”
^ Nelyo “kabili ndi no bulanda nga nshi.”
^ Nelyo “ifinkolwankolwa.”
^ Nelyo “inkambi iyo bashingulushako ilinga.”
^ Nelyo “ibuuku lya mweo.”
^ E kutila, impanga.
