Kalata ya Kubalilapo ku Bena Korinti 13:1-13
-
Ukutemwa—kwalicila fyonse (1-13)
13 Nga ca kuti nandila mu ndimi sha bantu ne sha bamalaika lelo ukutemwa nshakwata, ninshi naba fye kwati cela ca mukuba icilelilalila fye nelyo nga malimba ya nyenjele.
2 Kabili nga nalikwata ica bupe ca kusesema, nangu nga nalishiba umwalola inkaama sha kwa Lesa, nalishiba ne fingi,+ kabili nga nalikwata icitetekelo icakosa ica kutila kuti nasesha ne mpili, lelo ukutemwa nshakwata, ninshi tapali ico naba.*+
3 Kabili nga napeela fyonse ifyo nakwata pa kuti ndiishe abantu,+ nangu nga naipeela ukufwilapo pa mulandu wa cilumba, lelo nshakwata ukutemwa,+ ninshi tapali ico nkamwenamo.
4 Mu kutemwa+ mwaba ukutekanya*+ ne cikuuku.+ Mu kutemwa tamwaba akalumwa,+ tamwaba ukuitakisha, nangu ukuituumika.+
5 Tamwaba ukucita ifishawama,+ tamwaba ukucita ifya kuisekesha fye,+ tamwaba ukukalifiwa.+ Tamwaba ukusunga ifilubo.+
6 Tamwaba ukusekelela pa fishalungama,+ lelo mwaba ukusekelela pa cine.
7 Mu kutemwa mwaba ukusuulako ku fyabipa fyonse,+ mu kutemwa mwaba ukusumina fyonse,+ ukusuubila fyonse+ no kushipikisha fyonse.+
8 Ukutemwa takupwa. Lelo nangu kwaba ifya bupe fya kusesema, ifya kulandila mu ndimi,* nangu ifya kwishiba ifintu mu cipesha amano, fyonse ifi fikapwa.
9 Pantu tatwaishiba fyonse+ kabili tatusesema fyonse,
10 lelo ilyo tukeshiba fyonse, kabili ilyo tukasesema fyonse, tukaleka ukwishiba fye fimo nelyo ukusesema fye fimo.
11 Ilyo nali umwaice, nalelanda ngo mwaice, naletontonkanya ngo mwaice kabili nalepelulula ngo mwaice; lelo apo nomba ndi mukalamba, nalileka ifya bwaice.
12 Pantu pali ino nshita tumwena mu cilola* ca cela icishilenga ifintu filemonekesha, lelo pali ilya nshita cikaba kwati tulemonana icinso ne cinso. Pali nomba nshaishiba fyonse, lelo pali ilya nshita nkeshiba bwino bwino* nga filya fine fye Lesa anjishiba bwino.
13 Nomba ifi fintu fitatu e fyashala: icitetekelo, isubilo no kutemwa, lelo icikalamba pali ifi fyonse kutemwa.+
Amafutunoti
^ Nelyo “ninshi ndi wa cabecabe.”
^ Nelyo “ukushishimisha.”
^ E kutila, ukulanda indimi shimbi mu cipesha amano.
^ Nelyo “mira.”
^ Nelyo “fyonse.”
