Mu Baibolo mwaliba ifyebo ifisuma nga nshi ifilanda pa fyo tulingile ukulaikala. Kanshi nga mulebelenga Baibolo lyonse no kulatontonkanya sana pa fyo mulebelenga e lyo no kulafikonka, ‘mukatunguluka.’ (Yoshua 1:8; Amalumbo 1:1-3) Na kabili mukeshiba Lesa no Mwana wakwe Yesu, kabili ici kuti calenga mwaisapusuka.—Yohane 17:3.

Bushe mufwile ukucita shani pa kubelenga amabuuku ya mu Baibolo? Kwaliba ifingi ifyo mwingasalapo ukucita. Programu ya kubelenga Baibolo kuti yamwafwa ukubelenga amabuuku ya mu Baibolo ukulingana ne fyo yakonkana, nelyo ukulingana na malyashi yalandapo. Ku ca kumwenako, kuti mwabelenga ifipandwa fimo ifya mu Baibolo ifilanda pa fyo Lesa aletungulula abena Israele. Nelyo nga mulefwaya kuti mwabelenga ifipandwa ifilanda pa fyo icilonganino ca Bena Kristu catendeke ne fyo cakulile. Nga ca kuti cila bushiku mulebelengako ifipandwa fya mabuuku ya mu Baibolo ukulingana ne fyo bafitantike pali programu ya kubelenga Baibolo, mukapwisha ukubelenga Baibolo mu mwaka umo.

Nampo nga mulefwaya ukutantika ifya kukonka pa kubelenga Baibolo cila bushiku, ifya kukonka pa kubelenga Baibolo mu mwaka umo, nelyo ifya kukonka nge lyo mutendeke fye ukubelenga Baibolo, iyi programu ya kubelenga Baibolo kuti yamwafwa. Kopololeni iyi programu ya kubelenga Baibolo iyo mwingapulinta, no kutendeka ukubelenga Baibolo lelo line.