“Cila bushiku ifyo umulume no mukashi batekanya fileshiwa. Ukutekanya nalimo te kuti kube ukwacindama ilyo umuntu ali umushimbe, lelo pa kuti abalume na bakashi batunguluke mu cupo cabo balingile ukuba abatekanya.”—E fyalandile ba John.

•  Mulandu nshi mulingile ukubela abatekanya?

•  Kuti mwalanga shani ukuti mwalitekanya?

•  “Ukutekanya kwalicindama”

•   Nga ca kuti mwaupa nelyo mwaupwa kulaba ukwishiba sana abena mwenu ica kutila kuti mwatendeka no kumona ifyo bashicita bwino ifingalamukalifya.

   “Nga ca kuti pakokola ukutula apo mwaupanina, cilanguka sana ukutendeka ukubika amano ku fyo abena mwenu bashicita bwino. Nga ca kuti mulebika sana amano ku fyo abena mwenu bashicitamo bwino cilafya sana ukuba uwatekanya.”—E fyalandile ba Jessena.

•   Nga ca kuti tamuli abatekanya kuti mwalanda ukwabula no kutontonkanyapo.

   “Ndangufyanya ukulanda ifyo ndeumfwa ica kuti limo nsanga fye ni nanda ne fyo nshacilinga ukulanda. Nga ca kuti nda tontonkanya pa fyo ndefwaya ukulanda pa kuti imone nga fili fye bwino nelyo iyo, nga ndamona ukuti nshilingile ukufilanda.”—E fyalandile ba Carmen.

   Baibolo itila: “Mu kutemwa mwaba ukushishimisha [ukutekanya] ne cikuuku.” (1 Abena Korinti 13:4) Kanshi abantu babili abatemwana balingile ukuba abatekanya. Lelo ifi te ficitika lyonse. Ba John abo tulandilepo batile: “Nga filya fine caba na ku mibele imbi iisuma, taca-anguka ukuba uwatekanya nga filya ca-anguka ukuba uushatekanya. Tulingile ukubombesha pa kuti tube abatekanya.”

•   Nga ca kuti kwacitika ifyo mushile-enekela ifingalenga camukosela ukuba abatekanya.

   Ica Kumwenako: Tutile abena mwenu bamweba amashiwi ayashili bwino. Kwena ukulingana fye ne fyo fwe bantu twaba, na imwe kuti mwafwaya ukubeba amashiwi ayashili bwino.

   Ishinte lye funde: “Wilakalipa bwangu, pantu ubukali bwaba mu fifuba fya bawelewele.”—Lukala Milandu 7:9.

   Ifyo mwingalanga ukuti mwalitekanya: Mulelolelako panono. Ilyo tamula-asuka mufwile ukwishiba ukuti abena mwenu tabaciminina fye pa kumukalifya nelyo pa kumusaalula. Icitabo ca Fighting for Your Marriage citila: “Fwe bengi tubika sana amano ku fyo tulemona ukutila e fyacilenga abena mwesu balande fimo, ukucila ukubika amano ku fyo bacilanda nelyo ku fyo bacilapilibula.”

   Nangu ca kuti abena mwenu bacilafwaya fye ukumukalifya, kuti cawama ukuba abatekanya no kukanabweseshamo amashiwi ayabipa. Nga mwacita ifi ubwafya bukapwa, tabwakakulileko. Baibolo ilanda ukuti: “Umulilo ulashima apashili inkuni.”—Amapinda 26:20.

   “Nga ca kuti watendeka ukulamona umukashi obe ngo mulwani ufwile ukuleka no kutendeka ukutontonkanya pa calenga umutemwe, kabili ilyo line fye ufwile ukumucitilako ifisuma fimo.”—E fyalandile ba Ethan.

   Ifyo mufwile ukutontonkanyapo:

  •  Bushe mucita shani nga ca kuti abena mwenu bacita nelyo balanda amashiwi ayabipa?

  •  Kuti mwalanga shani ukutila mwalitekanya nga ca kuti umuku ukonkelepo abena mwenu bacita nelyo balanda amashiwi ayabipa?

•   Nga ca kuti abena mwenu balebwekeshapo ukucita ifintu ifimukalifya.

   Ica kumwenako: Nga ca kutila lyonse ilyo muli mukuya kumo abena mwenu balacelwa sana ica kuti nga mulebalolela mulaya mulekalipilako fye.

   Ishinte lye funde: “Muleshipikishanya no kubelelana uluse.”—Abena Kolose 3:13.

   Ifyo mwingalanga ukuti mwalitekanya: Mule-esha ukubika amano ku cupo cenu ukucila ukubika amano ku fyo mulefwaya pa lwenu. Yipusheni amuti, ‘Bushe nga nafulwa nelyo nga naumana no mwina mwandi pa mulandu ne fya cicitika, calalenga icupo cesu ukukoselako nelyo iyo?’ Na kabili mufwile ukwibukisha ukuti “bonse tulaipununa imiku iingi.” (Yakobo 3:2) Ici cilepilibula ukuti kwalibako umo na imwe bene mushicita bwino.

   “Inshita shimo ndaba uwatekanya sana ku munandi ukucila ku balume bandi. Nalimo icilenga ni co ndaba na bena mwandi inshita shonse kabili ndamona ne filubo fyabo fyonse. Lelo nga ca kuti ndi uwatekanya ninshi ndelanga ukuti nalitemwa abalume bandi kabili nalibacindika.”—E fyalandile ba Nia.

   Ifyo mufwile ukutontonkanyapo:

  •  Bushe mulatekanya abena mwenu nga balufyanya?

  •  Finshi mwingacita pa kuti ku ntanshi mukabe sana abatekanya?