Finshi Baibolo Yalandapo pa Kupwishishisha Umuntu Uulwele Sana Nelyo Uuicenene Sana Kabili Uushakapole?
Icasuko ca mu Baibolo
Baibolo tayalandapo pa kupwishishisha umuntu uwalwala sana pa nshita ntali kabili uushakapole. * Na lyo line, ifyo ilanda pa mweo ne mfwa kuti fyatwafwa ukwishiba ifya kucita. Baibolo yalilesha ukwipaya umuntu, lelo tayalanda ukuti tufwile ukwesha na maka yonse ukutantalisha ubumi bwa muntu twishibe ukuti alefwa.
Baibolo itila Lesa e Kabumba wesu, e “ntulo ya mweo.” (Amalumbo 36:9; Imilimo 17:28) Lesa alicindika sana ubumi. Uyu e mulandu wine Lesa akaanisha abantu ukwipaya umuntu e lyo no kuipaya. (Ukufuma 20:13; 1 Yohane 3:15) Na kabili, Baibolo itila tulingile ukwesha apo twingapesha pa kuti tuicingilile, tucingilile na bantu bambi. (Amalango 22:8) Ukwabula no kutwishika, Lesa afwaya tulecindika ubumi ubo atupeela.
Bushe caliba fye bwino ukupwishisha umuntu uwalwala sana?
Baibolo yalilesha ukwipaya umuntu na lintu uyo muntu ali mu kufwa. Ifyacitikile Imfumu Shauli e filanga ukuti ici cine. Ilyo bamucenene sana mu bulwi, aebele uwalemusendela ifyanso ukumupwishishisha. (1 Samwele 31:3, 4) Uwalemusendela ifyanso alikeene ukwipaya Shauli. Pa numa, umwaume umbi alandile ukuti alicitile ifyo Shauli alefwaya. Davidi alisangile uyu mwaume no mulandu wa kwipaya umuntu, ifyo Davidi acitile filanga ukuti alemona ukuti ubumi bwalicindama filya fine Lesa abumona.—2 Samwele 1:6-16.
Bushe tulingile ukucita icili conse pa kuti tutantalisheko ubumi?
Nga ca kuti nacimoneka apabuuta tuutu ukuti umuntu alafwa, Baibolo tailanda ukuti tulingile ukucita icili conse pa kuti tutantalisheko ubumi. Lelo ifyo itweba kuti fyatwafwa ukumona apo twingapelela. Imfwa mulwani wesu umukalamba, ulubembu e lwalenga tulefwa. (Abena Roma 5:12; 1 Abena Korinti 15:26) Nga ca kuti tatufwaya ukufwa, tatulingile ukutiina ukufwa pantu Lesa alilaya ukuti akabuusha abafwa. (Yohane 6:39, 40) Umuntu uwacindika ubumi alafwaya imyundapilwe iisuma sana. Na lyo line, talingile ukusala imyundapilwe iingalenga atantalisha ubumi bwakwe nangu ca kuti nacimoneka ukuti ali mu kufwa.
Bushe umuntu nga aipaya ninshi acita ulubembu ulo Lesa ashingelela?
Awe, Baibolo tayalanda ukuti umuntu nga aipaya Lesa te kuti amwelele. Nangu ca kuti ukwipaya umuntu lubembu ulukalamba sana, * Lesa aleshiba ukuti kulaba ifilenga umuntu ukuikulika pamo nga ukupena, amasakamika, e lyo bamo bafyalwa fye no kufwaya ukuipaya. (Amalumbo 103:13, 14) Lesa alabomfya Baibolo ukusansamusha abali no bulanda. Na kabili, Baibolo itila “kukaba ukubuuka kwa balungama na bashalungama.” (Imilimo 24:15) Kanshi kwaliba isubilo lya kuti na bantu abacita imembu ishikalamba pamo nga ukuipaya bakabuushiwa.
^ Amalyashi ya bantu abaipeye ayaba mu Baibolo yalanda pa bantu abashalecita ifintu ukulingana no kufwaya kwa kwa Lesa.—2 Samwele 17:23; 1 Ishamfumu 16:18; Mateo 27:3-5.
^ Nga ca kuti badokota bapwishishisha umuntu uwalwala pa kuti aleke ukucula batila dokota ayafwa umuntu ukuipaya.
Nalimo Kuti Mwatemwako ne fi
ULUPUNGU LWA KWA KALINDA
Ifyo Mwingacita nga ca Kuti Lupwa Nelyo Cibusa Wenu Nalwala Ubulwele Ubushipola
Bushe aba mu lupwa kuti bacita shani pa kusansamusha no kukoselesha lupwa uulwele sana? Bushe abalesakamana umulwele kuti bacita shani pa kuti belaumfwa sana ububi ilyo baletensha umulwele?
AMALYASHI AYALEKANALEKANA
Ifyo Mwingacita nga Mwalwala mu Kupumikisha
Bushe amashiwi ayaba mu Baibolo kuti ya mwafwa shani nga ca kuti mwalwala mu kupumikisha?
AMASAMBILISHO YA MU BAIBO AYACINDAMA
Mulandu Nshi Lesa Asuminishisha Ukucula?
Abantu abengi balepusha ico mu calo mwafulila ulupato no kucula. Mu Baibolo mwaliba amasuko kuli aya mepusho.
AMASUKO KU MEPUSHO YA MU BAIBOLO
Bushe Baibolo Kuti Yamwafwa nga Mulefwaya Ukuyipaya?
Finshi Baibolo ilandapo ifingafwa umuntu uulefwaya ukufwa?
PA NTE SHA KWA YEHOVA
Lombeni Ukumutandalila
Lanshanyeni icipusho ca mu Baibolo, nelyo ishibilenipo na fimbi pa Nte sha kwa Yehova.