Awe, Baibolo taisambilisha ukuti isonde lyalipaapaatala. * Nangu ca kuti Baibolo te citabo ca sayansi, ifyo ilanda filomfwana ne fyo abasambilila ifya sayansi basanga. Ifyo Baibolo ilanda lyonse kuti twaficetekela “kabili fya muyayaya.”—Amalumbo 111:8.

•  Bushe amashiwi ya mu Baibolo ayatila “impela shine ishe sonde” yalola mwi?

•  Bushe ifyacitike ilyo Satana atunkile Yesu filanga ukuti isonde lyalipaapaatala?

 Amashiwi ya mu Baibolo ayatila “impela shine ishe sonde” nelyo “impela sha pano isonde” tayalosha mu kuti isonde lyalikwata impela shine (amakoona yane) nelyo lyalikwata impela. (Esaya 11:12; Yobo 37:3) Aya mashiwi ni nsoselo fye isho Baibolo ibomfya pa kulanda pe sonde lyonse. Baibolo ilabomfya na mashiwi ya kuti ku kabanga na ku masamba, ku kapinda ka ku kuso na ku kapinda ka ku kulyo, pa kulanda pe sonde lyonse.—Luka 13:29.

 Cimoneka kwati ishiwi lya ciHebere ilyo bapilibula ukuti “impela,” ni nsoselo fye iyafuma kwi shiwi ilyo babomfya nga balelanda pa “mapindo.” Icitabo citila The International Standard Bible Encyclopedia cilanda ukuti, “apo icuni cilabomfya ipindo ku kufimba akana ka ciko, [ili ishiwi lya ciHebere] balalibomfya ku kulondolola impela ya cili conse ico bengafungulula.” Icitabo cimo cine cilanda no kuti, ishiwi lya kuti impela ilyaba pali Yobo 37:3 na pali Esaya 11:12 “lipilibula umwapeleela incende shonse isha pe sonde, nelyo imipaka ya ncende shonse isha pe sonde.” *

 Pa kutunka Yesu, “Satana Kaseebanya amutwele pa lupili ulutali sana, no kumulanga amabufumu yonse aya pano calo no bucindami bwa yako.” (Mateo 4:8) Bamo balanda ukuti ili ilembo lipilibula ukutila nga twaiminina pa ncende imo iyaba pe sonde ilyapaapaatala, kuti twamona fyonse ifyaba pe sonde. Na lyo line, “ulupili ulutali sana” ulo balandapo pali ili lembo lwa mampalanya fye, te lupili lwa cine cine. Natulande pali fimo ifilanga ukuti te lupili lwa cine cine.

•   Takwaba ulupili ulo twingemininapo pa kuti tumone amabufumu yonse aya pe sonde.

•   Satana alilangile Yesu amabufumu yonse e lyo no “bucindami bwa yako.” Umuntu te kuti amone ubucindami bwa mabufumu nga ca kuti eminine ukutali sana no ko yabelele, kanshi nalimo Satana abomfeshe icimonwa pa kulanga Yesu amabufumu no bucindami bwa yako. Kuti twapashanya ifyacitike kuli filya umuntu engabomfya projekita pa kumulanga ifikope fya ncende shalekanalekana isha pe sonde.

•   Baibolo pali Luka 4:5 ilanda ukuti Satana alangile Yesu “mu kashita akanono fye amabufumu yonse aya bantu ba pe sonde,” nomba umuntu te kuti amone amabufumu yonse aya pe sonde mu kashita fye akanono. Kanshi ici cilanga fye ukuti kwali inshila imbi iyo Satana abomfeshe pa kulanga Yesu amabufumu ya pe sonde.