Awe, ubushiku tukafwa tabwalembwa. Baibolo itila, ifilenga abantu ukufwa, ilingi line, “fintu fyabula ukwenekela” ifibacitikila, tailanda ukuti kutantika kwa kwa Lesa.—Lukala Milandu 9:11.

Bushe Baibolo te yalanda ukuti kwaliba “inshita ya kufwa”?

 Ee, pali Lukala Milandu 3:2 patila “kwaliba inshita ya kufyalwa ne nshita ya kufwa; inshita ya kulimba ne nshita ya kunukula icalimbilwe.” Na lyo line, ico Baibolo ilandapo pali ici cikomo, fintu fyalekanalekana ificitika ku bantu. (Lukala Milandu 3:1-8) Lesa tatwimikila inshita ya kufwa nga filya fine temikila umulimi inshita ya kubyala. Kanshi ico ili ilembo lilandapo ca kutila tatufwile ukubika sana amano ku fintu ifishacindama ica kuti twalaba na kuli Kabumba wesu.—Lukala Milandu 3:11; 12:1, 13.

Kuti twatantalishako ubumi

 Nangu ca kuti ifintu ifyabipa filacitika ukwabula ukwenekela, kuti twatantalishako ubumi nga tulecita ifintu ifisuma. Baibolo itila: “Amafunde ya wa mano kamfukumfuku ka mweo, ku kutalusha umuntu ku fiteyo fya mfwa.” (Amapinda 13:14) Na kabili Mose aebele abena Israele ukutila ‘inshiku sha mweo wabo shali no kufula’ nga balekonka amafunde ya kwa Lesa. (Amalango 6:2) Na lyo line, nga ca kuti tulecita ifyabipa, te kuti twikale inshiku ishingi.—Lukala Milandu 7:17.

 Lelo, nangu twingaba na mano ya musango shani, tapali ico twingacita icingalenga imfwa yatutaluka. (Abena Roma 5:12) Na lyo line, ifintu fikaaluka pantu Baibolo yalitulaya ukuti “imfwa tayakabeko.”—Ukusokolola 21:4.