Baibolo nga yabomfya amashiwi ya kuti “ukuponya ifumo,” tailanda mu kulungatika pa fyo abantu abengi bacita pa kuponya ifumo. Na lyo line, yalilanda ifyo Lesa amona ubumi bwa mwana uushilafyalwa.

 Ubumi bupe ukufuma kuli Lesa. (Ukutendeka 9:6; Amalumbo 36:9) Alicindika ubumi ukubikako fye no bumi bwa mwana uushilafyalwa. Kanshi umuntu nga aponya ifumo ku mufulo fye ninshi aipaya umuntu.

 Ifunde Lesa apeele abena Israele lyaleti: “Kabili nga ca kuti abaume babili balelwishanya kabili bapunka no mwanakashi uuli ne fumo ica kuti no mwana wakwe afuma lelo takuli uufwile, uwa mulandu akafute ukulingana ne fyo umulume wa mwanakashi akamupingula; kabili ico bamupingula akacipeelele mu bapingushi. Lelo nga kwaba uwafwa, lyena mukapeele umweo pa mweo.”—Ukufuma 21:22, 23. *

•  Ni lilali ubumi bwa muntu butendeka?

•  Bushe Lesa kuti aeleela umuntu uwaponyapo ifumo?

•  Bushe calibipa ukuponya ifumo nga ca kuti ubumi bwa kwa nyina nelyo ubwa mwana uushilafyalwa buli mu busanso?

 Lesa amona ukuti lilya line fye umwanakashi aimita ninshi ubumi bwa mwana uushilafyalwa nabutendeka. Baibolo nga yalanda pa mwana uushilafyalwa ilanda ukuti muntu. Moneni ifya kumwenako fimo ifyaba mu Baibolo ifilanga ukuti Lesa amona ukuti tapaba ubupusano pa mwana uushilafyalwa no wafyalwa.

•   Umupashi wa mushilo walengele Imfumu Davidi ukulanda kuli Lesa ati: “Ilyo fye nalepangwa amenso yenu yalimwene.” (Amalumbo 139:16) Na lintu Davidi ashilafyalwa, Lesa alemumona ukuti muntu.

•   Na kabili ilyo Kasesema Yeremia ashilafyalwa Lesa alishibe ukuti ali no kumupeela umulimo uwacindama. Lesa atile kuli ena: “Ilyo nshilakupanga mu nda nalikwishibe, kabili ilyo ushilafuma mwi fumo nalikusalile pa kuti ubombe umulimo waibela. Nakusontele ukuba kasesema ku nko.”—Yeremia 1:5.

•   Kalemba wa Baibolo Luka uwali dokota abomfeshe ishiwi limo line ilya ciGriki pa kulanda pa mwana uushilafyalwa no mwana uwafyalwa.—Luka 1:41; 2:12, 16.

 Lesa kuti aeleela umuntu uwaponyapo ifumo. Nga ca kuti ino nshita alisambilila ifyo Lesa amona ubumi talingile ukutwalilila ukuipeela umulandu. “Yehova wa nkumbu kabili wa mutembo . . . Filya akabanga kaatalukisha ku masamba, e fyo na o atalusha kuli ifwe imembu shesu.” * (Amalumbo 103:8-12) Yehova aleleela umuntu nga alapila ku membu shakwe ukubikako fye no muntu uwaponyapo ifumo.—Amalumbo 86:5.

 Nangu ca kuti nyina nelyo umwana kuti afwa pa kupaapa, ukuponya ifumo kwalibipa ukulingana ne fyo Baibolo ilanda pa bumi bwa mwana uushilafyalwa.

 Nomba cinshi mwingacita nga ca kuti pa nshita ya kupaapa badokota bamweba ukuti mufwile ukusalapo uufwile ukupusuka pali nyina no mwana? Nga cabe fyo abene ba mwana e bafwile ukusalapo uufwile ukupusuka nga ca kuti ni nyina nelyo mwana.