Sala #1: Magpaimpluwensiya sa media sa kun ano an dapat na magin itsura mo.

 “Kun minsan naeengganyo akong magsunod sa sarong uso ta dakulon akong nahihiling na advertisement manungod diyan,” an sabi kan tin-edyer na si Theresa. “Pag pirmi kang nakakahiling nin mga ritrato nin mga tawong nakasulot nin sarong partikular na uso, puwedeng masakitan kang dai mag-arog sainda.”

 Bako lang mga babayi an apektado kan mga advertisement. “An mga lalaki madali man na naiimpluwensiyahan kan mga usong pagbado,” an sabi kan librong The Everything Guide to Raising Adolescent Boys. “Dawa hoben pa sindang marhay, puntirya na sinda kan mga advertiser.”

 An mas magayon na gibuhon: An Bibliya nagsasabi: “An tawong inosente sa buhay pinapaniwalaan an lambang tataramon, pero an saro na alisto an isip pinag-iisipan an lambang lakad.” (Talinhaga 14:15) Kauyon kan prinsipyong iyan, makanuod na pag-isipan na marhay an mga nahihiling mo sa mga advertisement. Halimbawa, pag nakakahiling ka nin mga advertisement nin bado na nagsasabing “mapang-akit” o “seksi” iyan, haputon an sadiri:

•  ‘Kun susunudon ko an usong iyan, siisay talaga an makikinabang?’

•  ‘Anong istilo nin pamumuhay an ipinapahiling kaiyan?’

•  ‘Ipinapahiling daw kan istilong iyan nin pamumuhay kun siisay talaga ako asin kun anong mga pamantayan an sinusunod ko?’

 Tip sa pagbado: Sa laog nin sarong semana, hilingon na marhay an mga advertisement nin bado saka an ibang media na nakapokus sa pagbado. Anong istilo nin pamumuhay an itinatampok kan mga iyan? Nagtatao daw iyan nin daing gayo risang mensahe na nagpapamati saimo na kaipuhan mong sumunod sa sarong partikular na uso? “Grabe an pressure na dapat magin perpekto an itsura mo, an pagbado mo, saka ipagpasikat an ‘perpekto’ mong hawak,” an sabi kan tin-edyer na si Karen. “An mga advertiser na aram iyan madalion sanang maiimpluwensiyahan an mga hoben.”

Sala #2: Pagsunod sa uso para lang makasabay sa iba.

 “Pag nauso an sarong istilo nin bado,” an sabi kan tin-edyer na si Manuel, “iyan na an isusulot kan gabos. Kun dai ka masulot kaiyan, kakantiyawan ka kan mga tawo.” Uyon diyan an tin-edyer na si Anna. “Bako na man talaga iyan manungod sa pagbado kundi sa kagustuhan na makasabay sa iba,” an sabi niya.

 An mas magayon na gibuhon: An Bibliya nagsasabi: “Dai na kamo magpamolde sa sistemang ini nin mga bagay.” (Roma 12:2) Kauyon kan sadol na iyan, hilingon an mga bado mo tapos haputon an sadiri:

•  ‘Ano an mga pinakanakakaimpluwensiya sako pag nagpipili nin bado?’

•  ‘Gurano kaimportante sako an pagkaigwa nin branded na mga bado?’

•  ‘Gusto ko daw na pahangaon an mga tawo sa pagbado ko?’

 Tip sa pagbado: Imbes na duwang opsiyon lang an pagpilian—an uso (na gusto kan mga tawo) o an dai na uso (na dai gusto kan mga tawo)—idagdag an ikatulong opsiyon: magkaigwa nin kumpiyansa asin magin komportable sa sadiri. Kun arog ka kaiyan, dai ka gayong mahahadit na dai makasunod sa uso.