An mga nag-iisip manungod sa kun taano ta nabubuhay kita naghahapot man nin arog kaini. Taano ta yaon kita digdi? o May katuyuhan daw an buhay? Ipinapahiling kan Bibliya na an dahilan kaya nabubuhay kita iyo na para magin amigo nin Diyos. Pag-isipan an nagkapira sa mga pundamental na katotoohan na ihinahayag kan Bibliya.

•   An Diyos an satong Kaglalang. An Bibliya nagsasabi: “[An Diyos] an naggibo sa sato, asin sadiri niya kita.”—Salmo 100:3; Kapahayagan 4:11.

•   May katuyuhan an Diyos sa gabos na linalang niya, kaiba na kita.—Isaias 45:18.

•   Linalang kita nin Diyos na “kaipuhan [an] espirituwal na mga bagay,” kaiba na diyan an kagustuhan ta na maaraman kun ano an kahulugan nin buhay. (Mateo 5:3) Gusto niya na itao sato an kaipuhan tang iyan.—Salmo 145:16.

•   Napapaniguan ta an pangangaipo tang iyan sa espirituwal na mga bagay pag hinihinguwa tang magin amigo an Diyos. Para sa iba, garo baga imposible na magin amigo nin Diyos, pero sinisigurado sa sato kan Bibliya: “Rumani kamo sa Diyos, asin marani siya sa saindo.”—Santiago 4:8; 2:23.

•   Para magin amigo nin Diyos, dapat kitang mamuhay kauyon kan saiyang kabutan para sa sato. Sinasabi iyan sa sato kan Bibliya sa Eclesiastes 12:13: “Matakot ka sa Dios, asin otobon mo an saiyang mga togon, huli ta iyo iyan an katongdan nin tawo.”—An Marahay na Bareta Biblia.

•   Sa maabot na panahon, lubos ta nang magigibo an orihinal na katuyuhan nin Diyos para sa sato pag hinali na niya an pagsakit asin itinao na niya an buhay na daing katapusan sa saiyang mga amigo na nagsasamba sa saiya.—Salmo 37:10, 11.