Uyon sa sarong dai pa sana nahahaloy na surbey a na ginibo sa manlain-lain na parte kan kinaban, mga saro sa apat na tawo an nakakamati na nagsosolo.

•   “An kawaran nin interaksiyon asin komunikasyon sa iba puwedeng mangyari maski kiisay, ano man an edad niya o sain man siya.”—Chido Mpemba, co-chairman kan Commission on Social Connection kan World Health Organization.

 Kabaliktaran kan tibaad iniisip kan dakul, bako lang mga maedad na o mga tawong napapasuway an nakakamati na nagsosolo sinda kundi pati man mga hoben, mga tawong may marahay na salud, mapanggana sa buhay, asin mga may agom. An kawaran nin interaksiyon asin komunikasyon sa iba saka an pakamating nagsosolo puwedeng makaapektar na marhay sa pisikal asin emosyonal na salud nin saro.

•   “An pakamati na nagsosolo bako lang basta sarong negatibong pagmati,” an sabi ni Dr. Vivek Murthy, sarong surgeon general sa U.S. Sinabi niya pa: “An peligro na magadan huli sa dai pakikiiba-iba o pakikikomunikar sa kapwa kaagid kan sa pagsigarilyo nin sagkod sa 15 sigarilyo kada aldaw.”

 Habo kan satong Kaglalang na kita dai makiiba-iba asin dai makikomunikar sa iba. Puon pa kaidto, an katuyuhan nin Diyos para sa mga tawo iyo na magkaigwa sinda nin marahay, nakakaugmang relasyon sa lambang saro.

•   Prinsipyo sa Bibliya: “Sinabi [nin Diyos]: ‘Bakong marahay para sa lalaki na padagos na magsolo-solo.’”—Genesis 2:18.

 Gusto nin Diyos na magkaigwa kita nin dayupot na relasyon sa saiya. Nangangako siya na marani siya sa sato pag hinihinguwa tang rumani sa saiya.—Santiago 4:8.

•   Prinsipyo sa Bibliya: “Maugma an mga nakakamating kaipuhan ninda nin espirituwal na mga bagay, huli ta sa sainda an Kahadian kan kalangitan.”—Mateo 5:3.

 Gusto nin Diyos na sambahon ta siya kaibanan an iba. Pag ginigibo ta iyan, nakakatabang iyan sa sato na magin mas maugma.

•   Prinsipyo sa Bibliya: “Isipon ta an kada saro sa katuyuhan na mapahiro an lambang saro na magpahiling nin pagkamuot asin marahay na mga gibo, na dai pinapabayaan an satuyang pagtiripon, . . . kundi pinapakusog an lambang saro.”—Hebreo 10:24, 25.

 Para sa iba pang impormasyon manungod sa kun taano ta mahalagang labanan ta an pakamati na nagsosolo kita, basahon an artikulong “Malungkot Kahit na Masulong ang Teknolohiya sa Komunikasyon.”