Manungod sa sarong tawo na nakakamati nin pagkapurisaw, a tibaad maisip mo an sarong tawo na dahil sa grabeng takot mayo nang magibo, saro na haros habo nang magbangon pagkaaga, o saro na sigeng sabi kan mga ikinakahadit niya.

 May mga tawo na arog kaiyan an nagigin reaksiyon pag napupurisaw. Pero nadiskubre kan mga researcher na may mga indibidwal—lalo na an mga lalaki—na iba man an reaksiyon. Sinabi sa sarong report na an mga lalaki “mas posibleng marhay na bumaling sa arak o sa droga para makayanan an pagkapurisaw ninda, kaya an garo baga pagkaadikto ninda sa arak puwedeng senyales palan nin grabeng pagkapurisaw. Pag an mga lalaki napupurisaw, sa parati nagigin arangguton sinda saka uruyamon.”

 Siyempre, bakong parareho an reaksiyon kan mga lalaki. Pero ano man an reaksiyon diyan nin saro, an totoo iyo na padakul nin padakul an nakakamati nin pagkapurisaw sa “delikado asin masakit na mga panahon” na ini. (2 Timoteo 3:1) Kun napupurisaw ka, matatabangan ka daw kan Bibliya?

 Dakul nin mapagtitiwalaan na mga sadol sa Bibliya na makakatabang sato pag napupurisaw kita. Pag-isipan an tulong halimbawa.

1.  1. “Dai kamo nuarin man maghadit manungod sa masunod na aldaw, huli ta an masunod na aldaw magkakaigwa kan sadiri kaiyan na mga kahaditan. Tama na sa kada aldaw an sadiri kaiyan na mga problema.”—Mateo 6:34.

    Buot sabihon: Mas madunong kun lilikayan na magparahadit manungod sa mga posibleng (o posibleng dai) mangyari. Sa parati, dai man talaga nangyayari an mga ikinakatakot ta. Asin kun minsan, mas marahay pa ngani an nangyayari.

    Purbaran ini: Girumdumon an mga pagkakataon kaidto na sigurado ka talagang may mangyayaring maraot—pero bako man iyan an nangyari. Tapos pag-isipan an mga ikinakahadit mo ngunyan, asin hilingon kun talagang magigin dakulang problema iyan.

2.  2. “Lansang an minapatarom sa lansang, asin [an sarong] tawo an minapatarom sa [saiyang amigo].”—Talinhaga 27:17, An Marahay na Bareta Biblia.

    Buot sabihon: Matatabangan kita kan iba na makayanan an mga ikinakahadit ta—kun mapatabang kita sainda. Tibaad makatao sinda sato nin nagkapirang praktikal na suhestiyon base sa mismong eksperyensiya ninda. Asin tibaad matabangan ninda kitang hilingon an sitwasyon sa ibang anggulo.

    Purbaran ini: Isipon kun siisay an puwedeng makatao saimo nin marahay na sadol, arog nin sarong amigo na napaatubang na sa sarong problema na kaagid kan saimo. Haputon siya kun ano an nakatabang saka dai nakatabang saiya.

3.  3. “[Ipasa] nindo sa saiya an gabos nindong kahaditan [o “ikinakapurisaw,” nota sa ibaba], huli ta nagmamakulog siya sa saindo.”—1 Pedro 5:7.

    Buot sabihon: Nagmamakulog na marhay an Diyos sa mga nagsasakit. Sinasabi niya sato na puwede tang ipamibi saiya an ano man na ikinakahadit ta.

    Purbaran ini: Ilista an mga bagay na ikinakahadit mo. Tapos ipamibi iyan sa Diyos, na ipinapaliwanag an lambang problema asin naghahagad nin tabang saiya na tabangan kang makayanan iyan.

 Bako lang mga suhestiyon para makayanan an pagkapurisaw an itinatao kan Bibliya. Ipinapanuga kaiyan na sa madali nang panahon mawawara na sagkod pa man an mga ikinakahadit ta ngunyan. Paano iyan mangyayari?

 Hahalion kan Kahadian nin Diyos an pinakadahilan nin pagkapurisaw. (Kapahayagan 21:4) Sa katunayan, sa pamamahala kan Kahadian na iyan, dai ta na magigirumduman maski an mga namatian tang pagkapurisaw saka mga paghadit.—Isaias 65:17.

 Ini an puturong gustong mapasaimo kan “Diyos na nagtatao nin katuninungan.” (Roma 16:20) Nanunuga siya sato: “Aram kong marhay kun ano an gusto kong gibuhon para sa saindo, . . . an tawan kamo nin katuninungan, asin bakong kapahamakan, tanganing magkaigwa kamo nin magayon na puturo asin paglaom.”—Jeremias 29:11, NWT.