Sarong beses kada taon, nagtitiripon an Mga Saksi ni Jehova asin an minilyon nindang bisita sa bilog na kinaban para iselebrar an Memoryal kan kagadanan ni Jesus, arog kan ipinagbuot niya. (Lucas 22:19) Tinatabangan kita kan okasyon na ini na masabutan an kahalagahan kan ginibo ni Jesus kan itao niya an saiyang buhay para sa katawuhan. Maaaraman man diyan kun ano an puwedeng magin epekto sa sato—ngunyan asin sa maabot—kan saiyang atang.—Juan 3:16.

 Nag-atender ka man nin Memoryal ngunyan na taon o dai, paano ka makikinabang sa kagadanan ni Jesus bilang atang? Itinukdo ni Jesus na dapat tang gibuhon an duwang mahalagang bagay:

1.  1. Makanuod manungod sa Diyos asin ki Jesus. Sa pamibi ni Jesus sa saiyang Ama sa langit, sinabi niya: “Ini nangangahulugan nin buhay na daing katapusan, an mamidbid ninda ika, an iyo sanang tunay na Diyos, asin an saro na saimong isinugo, si Jesu-Cristo.”—Juan 17:3.

2.  2. Iaplikar an nanudan mo. Idinuon ni Jesus na kaipuhan niyatong iaplikar sa satong buhay an mga itinukdo niya. Halimbawa, tinapos niya an saiyang bantog na Sermon sa Bukid paagi sa pagtao nin komendasyon sa siisay man na “nagdadangog sa mga sinasabi [niya] saka ginigibo iyan.” (Lucas 6:46-48) Kaagid kaiyan, sa saro pang pagkakataon, sinabi niya: “Kun aram nindo iyan, maugma kamo kun ginigibo nindo iyan.”—Juan 13:17.

 Gusto mo daw na mas makanuod pa manungod sa Diyos asin ki Jesus? Gusto mo daw nin praktikal na giya kun paano iaaplikar an nanunudan mo? Ini an nagkapirang paagi na makakatabang saimo.

 An samong libreng interactive na pag-adal sa Bibliya nakatabang sa dakul na tawo na masiyasat an Bibliya asin isabuhay an mga sinasabi kaiyan.

•   Buksan an page na Pag-adal sa Bibliya na May Matabang Saimo para maaraman an manungod sa programang ini.

•   Hilingon an video na Welcome sa Saimong Pag-adal nin Bibliya para maaraman kun paano ginigibo an pag-adal nin Bibliya sa mga Saksi ni Jehova.

 An Mga Saksi ni Jehova nagtitiripon nin duwang beses kada semana sa saindang lugar nin pagsamba na inaapod na Kingdom Hall. Sa mga pagtiripon na iyan, pinag-uulayan mi an Bibliya asin kun paano iaaplikar sa samong buhay an mga itinutukdo kaiyan.

 Bukas sa publiko an mga pagtiripon na iyan; dai man kaipuhan na saro kang Saksi para makaatender diyan. Depende sa lokal na mga kamugtakan, puwede mong pilion na mag-atender nin in person o paagi sa videoconference.

•   Hilingon an video na Paano Ginigibo an Pagtiripon sa Kingdom Hall? para maaraman kun ano an mga aasahan mo sa mga pagtiripon na iyan.

•   Maghanap nin pagtiripon na harani saimo paagi sa pagbisita sa page na Mga Pagtiripon kan Kongregasyon kan Mga Saksi ni Jehova.

 Dakul na artikulo asin video sa website na ini an makakatabang saimo na mas makanuod pa manungod sa mga katukduan ni Jesus asin sa halaga kan saiyang kagadanan bilang atang.

 Halimbawa, para maaraman kun paano nagin posible na paagi sa kagadanan nin sarong tawo nakikinabang an minilyon na tawo, basahon an mga artikulong “Si Jesus Nagliligtas—Paano?” asin “Taano ta si Jesus Nagsakit Asin Nagadan?” o hilingon an video na Taano ta Nagadan si Jesus?