Naglalaom ka daw sa sarong magayon na buhay sa maabot? Dakul na tawo an positibo manungod diyan dawa nag-aagi nin grabeng mga problema ngunyan. Pero makakalaom daw talaga kita na mangyayari iyan? Iyo! Nanunuga an Bibliya na magkakaigwa talaga kita nin magayon na puturo.

•  Anong paglaom an itinatao kan Bibliya?

•  Posible daw talagang mangyari an mga pangako kan Bibliya?

•  Paano ini magkakatotoo?

•  Nuarin ini mangyayari?

•  Paano nakakatabang sa sato ngunyan an paglaom na ini?

 Sinasabi kan Bibliya na napapaatubang an mga tawo sa grabeng mga problema. Pero nanunuga iyan na an mga problemang ini temporaryo sana. Uni an nagkapirang halimbawa.

•   Problema: Kawaran nin istaran

   An sinasabi kan Bibliya: “Matugdok sinda nin mga harong asin maistar sa mga iyan.”—Isaias 65:21.

   An mangyayari sa maabot: An mga tawo magkakaigwa nin sadiri nindang istaran.

•   Problema: Pagtios saka kawaran nin trabaho

   An sinasabi kan Bibliya: “Lubos na ikakaugma kan sakuyang mga pinili an mga gibo kan saindang mga kamot.”—Isaias 65:22.

   An mangyayari sa maabot: An gabos na tawo magkakaigwa nin nakakakontento asin nakakaugmang trabaho.

•   Problema: Inhustisya

   An sinasabi kan Bibliya: “May mga pamayo na mamamahala para sa hustisya.”—Isaias 32:1.

   An mangyayari sa maabot: An inhustisya na dahil sa pagkakalain-lain nin lahi o estado sa buhay mawawara na. Magigin patas an pagtrato sa gabos.

•   Problema: Malnutrisyon asin gutom

   An sinasabi kan Bibliya: “Magkakaigwa nin abundang tipasi sa ibabaw kan daga; masurobra iyan sa alituktok kan kabukidan.”—Salmo 72:16.

   An mangyayari sa maabot: An gabos na tawo magkakaigwa nin abundang suplay nin masustansiyang kakanon. Mayo na nin magugutom asin mayo na nin magigin malnourished.

•   Problema: Krimen asin kadahasan

   An sinasabi kan Bibliya: “An lambang saro sa sainda matukaw sa sirong kan saiyang puon nin ubas asin kan saiyang puon nin higera, asin mayo nin siisay man na mantatakot sa sainda.”—Mikas 4:4.

   An mangyayari sa maabot: Magigin ligtas asin tiwasay an gabos huling mawawara na an mga maraot. “Magigin pagsadiri kan mga matanos an daga.”—Salmo 37:10, 29.

•   Problema: Giyera

   An sinasabi kan Bibliya: “An nasyon dai na mabingat nin espada laban sa nasyon, ni mag-aadal pa man sinda nin pakikigiyera.”—Isaias 2:4.

   An mangyayari sa maabot: Magigin matuninong an bilog na daga. (Salmo 72:7) Mayo na nin mamumundo dahil sa pagkagadan nin sarong mahal sa buhay o magigin refugee huli sa giyera.

•   Problema: Hilang

   An sinasabi kan Bibliya: “Mayo nin residente an magsasabi: ‘May hilang ako.’”—Isaias 33:24.

   An mangyayari sa maabot: Mayo na nin magkakahilang o magkakaigwa nin diperensiya sa pisikal. (Isaias 35:5, 6) Nanunuga pa ngani an Bibliya na “an kagadanan mawawara na.”—Kapahayagan 21:4.

•   Problema: Pagkaraot kan kapalibutan

   An sinasabi kan Bibliya: “An kaawagan asin an alang na daga maggagaya-gayang marhay, asin an disyertong kapatagan magigin maugma asin mamumurak arog kan azafran.”—Isaias 35:1.

   An mangyayari sa maabot: Magigin paraiso an bilog na daga asin maistar diyan an mga tawo, arog kan orihinal na katuyuhan nin Diyos.—Genesis 2:15; Isaias 45:18.

 Garo baga masakit paniwalaan iyan. Pero kun pag-aadalan mong marhay an sinasabi kan Bibliya manungod sa mangyayari sa maabot, maaraman mo na an mga panuga na mahihiling diyan hali mismo sa Diyos, bako sa mga tawo. Taano ta nasabi niyato iyan?

•   Mapagtitiwalaan an Diyos. Sinasabi kan Bibliya na an Diyos “dai makakapagputik.” (Tito 1:2) Saro pa, siya lang an may kakayahan na magsabi kun ano an mga mangyayari sa maabot. (Isaias 46:10) Dakul kitang mababasa sa Bibliya na nagpapatunay na pirming nagkakatotoo an mga propesiya niya. Para sa dagdag na impormasyon, hilingon an video na Paano Kita Nakakasigurado na Totoo an Bibliya?

•   Kaya kan Diyos na solusyunan an mga problema ta. Sinasabi kan Bibliya na may kapangyarihan an Diyos na gibuhon “an gabos na gustuhon niya.” (Salmo 135:5, 6) Buot sabihon, siguradong uutubon nin Diyos an saiyang mga panuga. Saro pa, gusto nin Diyos na tabangan kita huling namumutan niya kita.—Juan 3:16.

 Kaya lang, tibaad maisip mo, ‘Kun gusto nin Diyos asin kaya niya kitang tabangan, taano ta kadakul pa man giraray kita nin mga problema?’ Para maaraman an simbag, hilingon an video na Taano ta Tinutugutan nin Diyos an Pagsakit?

 Gagamiton niya an saiyang Kahadian, na sarong gobyerno sa langit, tanganing utubon an saiyang mga panuga. Si Jesu-Cristo an pinili niya na magin Tagapamahala kaiyan, asin tinawan niya siya nin awtoridad na pamahalaan an daga asin an mga tawo diyan. Kan magdigdi si Jesus sa daga, pinaumayan niya an mga may hilang, pinakakan an mga nagugutom, pinapundo an sarong alipuros, asin binuhay pa ngani an mga gadan. (Marcos 4:39; 6:41-44; Lucas 4:40; Juan 11:43, 44) Sa paaging iyan, ipinahiling niya an mga gigibuhon niya bilang Hadi kan Kahadian nin Diyos.

 Hilingon an video na Ano an Kahadian nin Diyos? para maaraman an mga pakinabang na itatao saimo kan Kahadian nin Diyos.

 Madali nang mangyari iyan! Taano ta sigurado kita diyan? Nagtao an Bibliya nin mga tanda na madali nang mamahala digdi sa daga an Kahadian nin Diyos. (Lucas 21:10, 11) Nahihiling ta na nangyayari na ngunyan an mga iyan.

 Para sa dagdag na impormasyon, basahon an artikulo na “Nuarin Mamamahala sa Daga an Kahadian nin Diyos?”

 Sinabi kan sarong kagsurat kan Bibliya na an satong paglaom garo “angkla para sa kalag.” (Hebreo 6:19) Kun paanong nakakatabang an angkla na mapagdanay an barko sa kinamumugtakan kaiyan pag may bagyo, tinatabangan man kita kan satong paglaom na makayanan an mga problema ta ngunyan. Kaya nagigin maugma kita, trangkilo an satong isip, asin nakakatabang pa ngani iyan na magin marahay an satong salud.—1 Tesalonica 5:8.