Garo baga maski sain ngunyan may inhustisya. Uni an duwa sana sa mga halimbawa kan mga napreso dawa mayong sala:

•   Kan Enero 2018, ipinagbuot kan sarong huwes sa Estados Unidos na paluwason an sarong lalaki na napreso nin haros 38 taon. Napatunayan siyang daing sala dahil sa ebidensiya base sa DNA.

•   Kan Setyembre 1994, tulong hoben na lalaki sa sarong nasyon sa Africa an napreso kan magsayuma sindang magsuldados dahil sa saindang konsiyensiya. Sagkod kan Setyembre 2020, 26 na taon na sindang nakapreso dawa ngani dai pa nasasangatan nin kaso o nabibista sa korte.

 Kun nakaeksperyensiya ka na nin inhustisya, tibaad kapareho mo an namati kan karakter sa Bibliya na si Job, na nagsabi: “Nagpaparakurahaw ako para maghagad nin tabang, pero mayo nin hustisya.” (Job 19:7, NWT) Dawa ngani garo baga imposible na magkaigwa nin tunay na hustisya, nanunuga an Bibliya na maabot an panahon dadangugon an kurahaw kan mga tawo para sa hustisya. Matatabangan ka man kan kadunungan na yaon sa Bibliya para makayanan an inhustisya sa ngunyan.

 Nagkakaigwa nin inhustisya dahil sa mga tawong habong magsunod sa Diyos. Ipinapahiling kan Bibliya na hali sa Diyos an tunay na hustisya. (Isaias 51:4) Sa Bibliya, magkakonektadong marhay an mga tataramon na pigtradusir na “hustisya” saka “katanusan.” (Salmo 33:5) Hustisya an resulta kan mga gibo na matanos, o tama saka angay kauyon kan mga pamantayan nin Diyos. Sa kabaliktaran, an inhustisya resulta kan kasalan, na iyo an dai pagsunod sa matanos na mga pamantayan nin Diyos. Pag-isipan an mga halimbawang ini:

•   Pagigin makasadiri. An pagigin makasadiri saka kasalan magkakonektadong marhay. (Santiago 1:14, 15) Para makua ninda an gusto ninda, dakul an nang-aaprobetsar sa iba. Pero gusto kan Diyos na inuton ta an kapakanan kan iba.—1 Corinto 10:24.

•   Kawaran nin aram. Tibaad dai aram kan iba na bako palan makatanusan an ginigibo ninda sa iba, pero kasalan pa man giraray iyan sa paghiling nin Diyos. (Roma 10:3) Sa katunayan, kawaran nin aram an dahilan kaya nagibo an saro sa pinakagrabeng inhustisya—an paggadan ki Jesu-Cristo.—Gibo 3:15, 17.

•   Dai maaasahan na sistema nin tawo. Ginibo an sistema nin pulitika, komersiyo, saka relihiyon para kutana magkaigwa nin patas na pagtrato saka hustisya sa kinaban. Pero an totoo, sa parati an mga sistema pa lugod na ini an kawsa nin mga sala, korapsiyon, diskriminasyon, kahanaban, grabeng pagkabakong pantay-pantay sa estado nin buhay, saka pagkapanatiko—na iyan gabos puwedeng magin dahilan nin inhustisya. An iba sa mga sistemang ini suportado nin mga tawong may marahay man na intensiyon. Pero kun babaliwalaon an paggiya nin Diyos, ano man an gibuhon kan mga tawo siguradong bakong marahay an kaluluwasan.—Parahulit 8:9; Jeremias 10:23.

 Ikinakaanggot nin Diyos an inhustisya saka an mga ugali asin gibo na nagigin dahilan kaiyan. (Talinhaga 6:16-18) Ini an ipinasurat niya ki propeta Isaias: “Ako si Jehova, a namumuot sa hustisya; nauungis ako sa paghabon asin pagkabakong matanos.”—Isaias 61:8, NWT.

 Ipinahiling kan Katugunan na itinao nin Diyos sa suanoy na mga Israelita na gusto niya na magin makatanusan sinda. Sinabihan niya an mga hukom na dai sinda dapat na mag-ako nin mga suhol saka maggibo nin ano man na puwedeng magbiribid sa hustisya. (Deuteronomio 16:18-20) Naanggot siya sa mga Israelita na dai nagsunod sa saiya ta inaprobetsaran ninda an mga tios saka hamak. Asin kan huri, isinikwal niya sinda dahil dai ninda ginibo an mga pamantayan niya.—Isaias 10:1-3.

 Iyo. Paagi ki Jesu-Cristo, hahalion nin Diyos an kasalan, an pinakadahilan kan inhustisya, saka ibabalik niya sa pagigin perpekto an mga tawo. (Juan 1:29; Roma 6:23) Nagpatindog man siya nin sarong Kahadian para magkaigwa nin sarong matanos na bagong kinaban saka para magtao nin hustisya sa gabos. (Isaias 32:1; 2 Pedro 3:13) Para mas maaraman mo an manungod sa Kahadian na ini na yaon sa langit, hilingon an video na Ano an Kahadian nin Diyos?

 Pag may hustisya na sa bilog na daga, magkakaigwa na nin katuninungan saka katiwasayan an gabos. (Isaias 32:16-18) Mahalaga sa Diyos an gabos na tawo, kaya magigin pantay-pantay an pagtrato niya sa gabos. Mawawara na an kamunduan, paghibi, saka kulog dahil sa inhustisya. Luway-luway man na mawawara sa isip an makulog na mga inagihan ta huli sa inhustisya. (Isaias 65:17; Kapahayagan 21:3, 4) Para sa iba pang detalye, hilingon an artikulong “Ano an Gigibuhon kan Kahadian nin Diyos?”

 Iyo. Napatunayan na kan Bibliya na totoo an sinasabi kaini pag-abot sa mga hula, kasaysayan, asin siyensiya. Magkauruyon man an mga laog kaini. Kaya makakapagtiwala kita sa mga panuga kaini. May mababasa ka pang ibang mga detalye sa mga artikulong ini:

•   Paano Kita Nakakasigurado na Totoo an Bibliya? (video)

•   “Mga Propesiyang Nautob Na”

•   “Mga Hula Nito—Laging Natutupad”

•   “Mga Dahilan Upang Magtiwala sa Bibliya”

 Kan mga panahon kan Bibliya, naggibo nin paagi an marahay na mga tawo para dai sinda paggibuhan nin inhustisya. Halimbawa, bibistahon na kutana kaidto si apostol Pablo sa bakong makatanusan na paagi saka posibleng masentensiyahan siya nin kagadanan. Dai niya basta na sana inako an inhustisyang idto, kundi ginamit niya an legal na paagi para mag-apelar ki Cesar.—Gibo 25:8-12.

 Pero ano man an gibuhon kan mga tawo para itanos an gabos na inhustisya sa kinaban na ini, siguradong dai iyan mahahali. (Parahulit 1:15) Dawa arog kaiyan, dakul an nagsabi na nakatabang sa sainda an pagtubod sa panuga nin Diyos na magkakaigwa nin sarong matanos na bagong kinaban. Kaya dai na sindang gayo nahahadit saka trangkilo an isip ninda dawa pa may inhustisya.