Napag-isip-isip mo na daw kun baga may iba pang katuyuhan an buhay kisa pagkawat sana, pagtrabaho, pag-agom, pagpamilya, asin paggurang? (Job 14:1, 2) Ipinapahiling kan Bibliya na pinag-iisipan ini dawa kan madunong na marhay na mga tawo.—Basahon an Parahulit 2:11.

May katuyuhan daw an buhay? Inot, ihapot ta, Paano nagpuon an buhay? Pagkatapos na isip-isipon an kahanga-hangang disenyo kan satong hutok saka an iba pang parte kan satong hawak, dakul an nakapagsabi na sarong madunong na Kaglalang an nasa likod kan gabos na ini. (Basahon an Salmo 139:14.) Kun arog kaiyan, siguradong may dahilan kun taano ta linalang niya kita! Kun aaramon ta iyan, mas magigin makahulugan an buhay ta.

Binendisyunan nin Diyos an inot na tawong mag-agom saka tinawan nin nakakaugmang trabaho. Katuyuhan niya na panuon ninda an daga, gibuhon iyan na paraiso, asin mabuhay sinda nin daing katapusan.—Basahon an Genesis 1:28, 31.

Naatraso an katuyuhan nin Diyos kan magrebelde an inot na tawo sa pamamahala niya. Pero dai kita isinikwal nin Diyos—ni liniwat man an saiyang katuyuhan. Sinisiyerto sa sato kan Bibliya na padagos na naghihiro an Diyos tanganing iligtas an maimbod na mga tawo asin na mauutob an katuyuhan niya para sa daga! Kaya gusto nin Diyos na maeksperyensiyahan mo an klase nin buhay uyon sa katuyuhan niya! (Basahon an Salmo 37:29.) Aramon sa Bibliya kun paano ka personal na makikinabang sa katuyuhan nin Diyos.