Bako sanang si Christopher, Hannah, asin Gina an nakakamati kaiyan. Dakul na tawo sa bilog na kinaban an kumbinsido na ibinibilang sinda nin Diyos na sarong amigo. Kumusta ka man? Namamatian mo daw na harani ka sa Diyos? O gusto mo daw na magin harani o mas maparani pa sa saiya? Tibaad maisip mo: ‘Posible daw talaga sa sarong ordinaryong tawo na magin harani sa Diyos na Makakamhan sa Gabos? Kun iyo, paano?

Sinasabi sa Bibliya na posibleng magkaigwa nin harani asin personal na relasyon sa Diyos. Halimbawa, inapod nin Diyos an patriyarkang Hebreo na si Abraham na ‘sakuyang katuod.’ (Isaias 41:8) Risahon man an nakakaugmang imbitasyon sa Santiago 4:8: ‘Rumani kamo sa Diyos, asin siya marani sa saindo.’ Kaya posible talaga na magin harani sa Diyos o magin amigo niya. Pero huling dai nahihiling an Diyos, paano ka magigin ‘harani’ sa saiya asin magkakaigwa nin marahay na relasyon sa saiya?

Para masimbag iyan, pag-isipan kun paano nagigin mag-amigo an duwang tawo. Sa parati, inaaram nguna ninda an pangaran kan kada saro. Dangan, mantang regular sindang nag-uulay, na sinasabi sa kada saro an mga iniisip asin namamatian, urog na nagigin harani sinda sa kada saro bilang mag-amigo. Asin kun naghihinguwa sindang gumibo nin mga bagay para sa kada saro, mas nagkukusog an saindang pagigin mag-amigo. Arog man kaiyan kun manungod sa pagkakaigwa nin haraning relasyon sa Diyos. Aramon ta kun paano.