Si Naoko na nasambit sa nainot na artikulo nagsabi kun paano niya napundo an paninigarilyo, “Nabago ko an sakong buhay kan manudan ko an katotoohan manungod sa mga kuwalidad asin katuyuhan nin Diyos.” An mga nanudan niya yaon sa Bibliya. Dawa ngani dai nasambit sa Bibliya an pagsigarilyo, tinatabangan kita kaiyan na masabutan kun ano an paghiling nin Diyos sa pagsigarilyo. * An kaaraman na iyan an nagtao sa dakul nin determinasyon na labanan o punduhon an bisyo. (2 Timoteo 3:16, 17) Pag-ulayan ta an tulong maraot na epekto nin pagsigarilyo na aram kan dakul asin kun ano an sinasabi kan Bibliya manungod diyan.

Yaon sa tabako an saro sa pinakanakakaadik na droga​—an nikotina. Nakakapabagsik iyan asin nakakapakalma. Pag an saro naninigarilyo, an nikotina marikas asin pauruutrong nakakaabot sa utak. Sarong dosis nin nikotina an puwedeng makua sa kada paghithit nin sigarilyo kaya mga 200 na dosis kada aldaw an nakukua kan parasigarilyong nakakaubos nin mga sarong kaha sa sarong aldaw. An dosis na iyan mas halangkaw kisa sa iba pang ginagamit na droga. Ini an dahilan kaya nakakaadik an parating paghithit kaini. Pag an saro naadik na, malain an pagmati kan lawas niya pag dai siya nakakasigarilyo.

Tinatabangan kita kan Bibliya na magkaigwa nin tamang pagmansay manungod diyan kan sabihon kaiyan: “Dai nindo aram na, sa pagdulot nindo kan sadiri bilang mga uripon na magkukuyog, uripon kamo kan saindong kinukuyog?” (Roma 6:16, An Banal na Biblia) Kun an kaisipan asin paggawi nin saro nakokontrol na kan saiyang pagmawot sa tabako, nagigin uripon na siya nin sarong nakakaraot na bisyo. Pero, habo kan Diyos, na an pangaran Jehova, na magin uripon kita nin bisyong nakakaraot bako sana sa satong hawak kundi pati man sa satong espiritu, an sato mismong kaisipan. (Salmo 83:18; 2 Corinto 7:1) Kaya mantang mas pinapahalagahan asin iginagalang nin saro si Jehova, nahihiling niya na dapat niyang itao ki Jehova an pinakamarahay asin dai niya iyan magigibo kun nagpapauripon siya sa sarong nakakagadan na bisyo. Iyan an nakakatabang na magin determinado an saro na labanan an nakakaraot na mga pagmawot.

Napangganahan ni Olaf, na nakaistar sa Alemania, an 16 na taon niyang pagkaadik sa sigarilyo na nagpuon kan siya 12 anyos. Paghuna niya kaidto dai nakakaraot an pagsigarilyo. Pero sa pag-agi nin mga taon, dai na niya makontrol iyan. Sinabi niya: “Sarong beses kan maubusan ako nin sigarilyo, desperado akong marhay kaya tiniripon ko su mga upos kan sigarilyo, kinurua su natadang tabako, saka ilinaag iyan sa kapidasong diyaryo dangan irinolyo na garo sigarilyo. Aram kong makasupog talaga idto.” Paano niya napundo an nakakaraot na bisyong iyan? “Importante na magkaigwa nin pagmawot na paugmahon si Jehova,” an sabi niya.  “An pagkamuot ni Jehova sa mga tawo asin an paglaom na itinatao niya an nagtao sa sako nin determinasyon na biyo nang halion an sakong bisyo.”

“Napatunayan na kan siyensiya na an paninigarilyo . . . nakakaraot sa haros gabos na organo nin lawas saka nagpapalangkaw sa bilang nin mga nagkakahilang asin nagagadan,” an sabi kan The Tobacco Atlas. Aram kan gabos na an pagsigarilyo nagigin dahilan kan mga hilang na dai nakakaulakit arog nin kanser asin hilang sa puso saka baga. Pero sigun sa World Health Organization (WHO), an pagsigarilyo saro man sa panginot na dahilan nin pagkagadan huli sa nakakaulakit na hilang, arog nin tuberkulosis.

Paagi sa saiyang Tataramon, an Bibliya, tinutukduan kita ni Jehova na magkaigwa nin tamang pagmansay sa satong buhay, hawak, asin kakayahan. Idinuon ini kan Aki niyang si Jesus kan sabihon kaini: ‘Mamutan mo an Kagurangnan mong Diyos sa bilog mong puso, asin sa bilog mong kalag, patin sa bilog mong isip.’ (Mateo 22:37) Malinaw na gusto nin Diyos na gamiton ta nin tama an satong buhay asin lawas saka dai iyan pagbasang-basangon. Mantang nanunudan ta an manungod ki Jehova asin sa mga panuga niya, mas ikinakaugma asin napapahalagahan ta an gabos na ginigibo niya para sa sato. Tatabangan kita kaini na likayan an ano man na makakaraot sa satong hawak.

Mga 38 taon nang nagsisigarilyo si Jayavanth, na sarong doktor sa India. Sinabi niya: “Aram ko an mga peligro sa pagsigarilyo dahil sa mga babasahon sa medisina. Aram kong sala iyan kaya sinasabihan ko an mga pasyente ko na ipundo iyan. Kaso, ako mismo dai ko mapurupundo, dawa mga lima o anom na beses ko nang pinurbaran.” Pero napundo niya man giraray iyan. Paano? Siya nagsabi: “Napundo ko an paninigarilyo kan mag-adal ako nin Bibliya. Dahil gusto kong paugmahon si Jehova, hinali ko tulos an bisyo ko.”

Nakakahilo an asong ibinubuga kan naninigarilyo saka an aso na hali mismo sa sigarilyo. Pag nasinghot iyan kan iba, puwede iyan magkawsa nin kanser asin iba pang hilang. Kada taon, 600,000 na dai man naninigarilyo an nagagadan huli kaiyan, na an kadaklan babayi saka aki. An sarong report kan WHO  nagpapatanid na dawa dikit sanang aso an masinghot hali sa sigarilyo, peligroso pa man giraray iyan.

Uyon ki Jesus, an pagkamuot sa kapwa​—sa satong pamilya, amigo, asin iba pang tawo—​panduwa sa pagkamuot sa Diyos. Sinabi niya: ‘Mamutan mo an saimong kataid siring sa saimo man sana.’ (Mateo 22:39) Kun may bisyo kita na nakakaraot sa mga tawong namumutan ta, dai kita nagpapahiling nin pagkamuot sa kapwa. An tunay na pagkamuot mapahiro sa sato na sunudon an sadol kan Bibliya: “An lambang saro maghanap kan ikakarahay nin iba, bakong kan ikakarahay kan sadiri niya.”​—1 Corinto 10:24, An Marahay na Bareta Biblia.

Nagirumduman ni Armen, na nakaistar sa Armenia: “Dahil naaapektaran na an sakong pamilya, nakiulay sinda sako na magpundo na ako sa pagsigarilyo. Pero habo kong akuon kaidto na may maraot na epekto iyan sa sainda.” Ipinaliwanag niya kun ano an nakapabago sa saiya: “An kaaraman ko sa Bibliya asin an pagkamuot ko ki Jehova nakatabang sako na punduhon an pagsigarilyo asin akuon na nakakaraot iyan bako sana sako kundi pati man sa ibang tawo.”

Nakatabang ki Olaf, Jayavanth, asin Armen an kaaraman sa Bibliya na mapundo an bisyong nakakaraot sa sainda asin sa iba. Nagibo ninda iyan bako sana ta naaraman ninda na nakakaraot an pagsigarilyo kundi huli ta namumutan ninda si Jehova asin gusto nindang paugmahon siya. Idinuon sa 1 Juan 5:3 an mahalagang papel kan pagkamuot: ‘Ini iyo an pagkamuot sa Diyos, na kita mag-utob kan saiyang mga tugon; asin an saiyang mga tugon bakong magabat.’ Siyempre, an pagsunod sa mga prinsipyo sa Bibliya bako pirming madali, pero kun an saro pinapahiro nin dakulang pagkamuot niya ki Jehova, dai iyan magigin pagabat.

Paagi sa pambilog na kinaban na pagtutukdo, tinatabangan ni Jehova Diyos an minilyon na tawo para makabutas o dai na magin uripon nin tabako. (1 Timoteo 2:3, 4) Dai mahahaloy, paagi sa saiyang Kahadian​—sarong gobyerno sa langit na pinapamahalaan kan saiyang Aki na si Jesu-Cristo—​hahalion na ni Jehova an mahanab na komersiyal na sistema na iyo an dahilan nin pagkauripon sa sigarilyo kan minilyon. Paparaon niya an epidemya nin pagsigarilyo asin gigibuhon na perpekto an hawak saka isip kan masinunod na mga tawo.​—Isaias 33:24; Kapahayagan 19:11, 15.

Kun nadidipisilan kang punduhon an pagsigarilyo, dai magsuko. Kun mamumutan mo si Jehova asin aarugon kun ano an pagmansay niya sa paninigarilyo, magigin determinado ka man na pumundo. Mauugma an Mga Saksi ni Jehova na tawan ka mismo nin praktikal na tabang para maaraman asin maiaplikar an mga prinsipyo sa Bibliya. Makakasigurado ka na kun mapatabang ka ki Jehova na makabutas sa pagkaadik sa sigarilyo, tatawan ka niya kan kusog na kaipuhan mo.​—Filipos 4:13.