‘Kun aram nin Diyos an gabos na bagay, pati na an iniisip asin pangangaipo ko, taano ta mamimibi pa ako?’ tibaad ihapot mo. Rasonableng hapot iyan. Bakong sinabi ni Jesus na an Diyos ‘nakakaisi na kan saindong mga kakulangan, bago nindo hagadon iyan saiya’? (Mateo 6:8) Aram ini ni Hading David kan suanoy na Israel, asin siya nagsurat: ‘Dai nin tataramon sa sakuyang dila, alagad uya, O Jehova, ika aram mo iyan gabos.’ (Salmo 139:4) Kaya, taano ta dapat kitang mamibi sa Diyos? Para masimbag iyan, pag-ulayan ta an sinasabi kan Bibliya dapit sa pamibi kan mga parasamba nin Diyos. *

Dawa sinasabi kan Bibliya na aram kan Diyos na Jehova * an gabos na bagay, ipinapahiling man kaiyan na dai siya interesadong aramon sana an mga bagay manungod sa mga parasamba niya. (Salmo 139:6; Roma 11:33) An saiyang daing limiteng memorya bakong arog kan kompyuter na basta sana nagsasaray nin impormasyon dapit sa mga indibidwal. An totoo, interesadong marhay an Diyos sa kalaog-laoging mga kaisipan ta huling gusto niyang maparani kita sa saiya. (Salmo 139:23, 24; Santiago 4:8) Kaya ngani dinagka ni Jesus an saiyang mga parasunod na mamibi, maski aram nang marhay kan saiyang Ama an mga kaipuhan ta. (Mateo 6:6-8) Miyentras na mas urog tang ipinapahayag sa satong Kaglalang an iniisip ta, mas urog man kitang napaparani sa saiya.

Kun minsan, tibaad dai ta aram an eksaktong hahagadon sa pamibi. Sa arog kaining sitwasyon, puwede pa nganing aramon nin Diyos an mga sabuot niyato na dai ta masabi, asin gamiton an saiyang perpektong kaaraman para ikatao an kaipuhan ta. (Roma 8:26, 27; Efeso 3:20) Pag nahihiling niyato na tinatabangan kita nin Diyos, dawa sa mga paagi na dai risang marhay, napaparani kita sa saiya.

Sinisiyerto sa sato kan Bibliya na sinisimbag nin Diyos na Makakamhan sa Gabos an mga pamibi kan maimbod niyang mga lingkod, pero sinasabi man kaiyan kun taano ta may mga pamibi na dai niya dinadangog. Halimbawa, kan panahon na lakop an kadahasan sa suanoy na Israel, sinugo nin Diyos si propeta Isaias na sabihan an banwaan: ‘Siring man sana kun papagdakulon nindo an pamibi, dai ako maghihinanyog; pano nin dugo an saindong mga kamot.’ (Isaias 1:15) Malinaw nanggad, an mga daing paggalang sa mga ley nin Diyos o namimibi na may salang mga motibo dai makakaasa na dadangugon sinda nin Diyos.​—Talinhaga 28:9; Santiago 4:3.

Pero, sinasabi kan Bibliya: ‘Kun kita maghagad nin ano man suno sa saiyang buot, kita dinadangog niya.’ (1 Juan 5:14) Alagad buot daw sabihon kaiyan na awtomatikong itatao nin Diyos an gabos na hinahagad kan saiyang mga parasamba? Dai man. Isip-isipa an sitwasyon ni apostol Pablo, na tulong beses na nakimahirak sa Diyos na halion an ‘sarong tunok sa laman.’ (2 Corinto 12:7, 8) Tibaad igwa si Pablo nin dai nararahay na hilang sa mata. Siguradong nakakapangluya iyan sa saiya! Tinawan siya nin balaog nin pagpaumay asin nagbuhay pa ngani nin gadan, pero kaipuhan niyang tiuson an hilang niya. (Guibo 19:11, 12; 20:9, 10) Dawa ngani an simbag sa saiyang mga pakimahirak lain sa gusto niya, pinahalagahan ni Pablo an simbag nin Diyos.​—2 Corinto 12:9, 10.

Totoo, sinimbag sa milagrosong paagi an mga pamibi kan nagkapirang karakter sa Bibliya. (2 Hade 20:1-7) Pero bihirang mangyari iyan, maski kan mga panahon kan Bibliya. An ibang may pagtubod napurisaw kan garo baga dai sinimbag nin Diyos an mga pamibi ninda. Naghapot si Hading David: ‘Sagkod nuarin, Jehova, malilingawan mo ako?’ (Salmo 13:1) Pero kan marealisar kan maimbod na tawong iyan kun gurano kaparati siyang tinatabangan ni Jehova, pinakusog giraray ni David an saiyang tiwala sa Diyos. Sa iyo man sanang pamibi, sinabi pa ni David: ‘Ako sa saimong pagkahirak nanarig.’ (Salmo 13:5) Arog ni David, an mga parasamba nin Diyos ngunyan tibaad kaipuhan na magmaigot sa pamibi sagkod na mahiling ninda an simbag nin Diyos sa saindang mga pakimahirak.​—Roma 12:12.

Itinatao nin Diyos an talagang kaipuhan ta.

May marahay na dahilan kun taano ta dai pirming itinatao nin mamumuton na mga magurang an gusto kan saindang mga aki sa panahon na hinahagad ninda iyan. Sa kaparehong paagi, tibaad dai simbagon nin Diyos an satong mga kahagadan sa paaging gusto ta o sa panahon na inaasahan ta. Pero makakapagtiwala kita na an satong Kaglalang, arog nin mamumuton na ama, itatao an talagang kaipuhan ta sa tamang panahon asin sa tamang paagi.​—Lucas 11:11-13.

Puwedeng magsimbag an Diyos sa mga paaging dai ta naririsa.

Pero paano kun namimibi kita na mawara na an inaagihan na problema? Iisipon ta daw na huling mayo nin milagrosong simbag, talagang dai na ini sinimbag ni Jehova? Sa kabaliktaran, marahay na pag-isipan ta kun baga tinatabangan na kita nin Diyos sa mas dai risang mga paagi. Halimbawa, tibaad tinabangan kita nin sarong mapagmakulog na amigo sa panahon na kaipuhan ta nin tabang. (Talinhaga 17:17) Posible daw na pinahiro siya ni Jehova para tabangan kita? Dugang pa, an simbag nin Diyos sa satong pakimahirak puwedeng nasa Bibliya. Diyan ta puwedeng makua an pakasabot na kaipuhan ta para makayanan an sarong masakit na sitwasyon.​—2 Timoteo 3:16, 17.

Imbes na halion an problema, sa parati itinatao nin Diyos sa mga lingkod niya an kinakaipuhan na kusog para makayanan iyan. (2 Corinto 4:7) Halimbawa, kan nakimahirak si Jesus sa saiyang Ama na halion an pagsakit alagad natatakot na posibleng magtao iyan nin katuyawan sa pangaran nin Diyos, nagsugo si Jehova nin sarong anghel tanganing pakusugon an saiyang Aki. (Lucas 22:42, 43) Kaagid kaiyan, puwedeng gamiton nin Diyos an sarong dayupot na amigo para parigunon kita sa panahon na kaipuhan tang marhay iyan. (Talinhaga 12:25) Huling dai risa an arog kaining simbag, kaipuhan tang magin mas mapagrisa kun paano sinisimbag nin Diyos an satong mga pamibi.

Itinatao nin Diyos an simbag sa itinalaan na panahon niya.

Sinasabi kan Bibliya na nagpapahiling nin pabor an Diyos na Makakamhan sa Gabos sa mapakumbabang mga indibidwal “sa itinalaan na panahon.” (1 Pedro 5:6, NW) Kaya kun garo baga dai pa sinisimbag an satong sinserong mga kahagadan, dai buot sabihon kaiyan na daing pakiaram sa sato si Jehova. Imbes, dahil sa mahiwason na marhay an pananaw kan satong mamumuton na Kaglalang, siguradong sinisiyasat niya an mga kahagadan ta base sa kun ano an aram niyang pinakamarahay para sa sato.

Halimbawa, imahinara na may aki kang lalaki na naghahagad nin bisikleta. Itatao mo daw tulos an hinahagad niya? Kun sa hiling mo dai pa siya mapagkakatiwalaan sa paggamit nin bisikleta, tibaad dai ka nguna mabakal. Pero, pag-abot nin panahon puwede mo nang itao an hinahagad niya kun sa hiling mo para sa ikakarahay niya iyan. Sa kaagid na paagi, puwedeng itao nin Diyos an tamang ‘mga hinahagad nin [satong] puso’ sa tamang panahon kun padagos kitang mamimibi.​—Salmo 37:4.

Dinadagka kan Bibliya an tunay na mga Kristiyano na dai mawaran nin tiwala sa kahalagahan nin pamibi. ‘Madalion sanang sabihon iyan kisa gibuhon,’ puwedeng sabihon nin iba. Totoo, kun igwa kita nin dai nahahaling problema o nakakaeksperyensiya nin inhustisya, tibaad masakitan kitang halaton an simbag nin Diyos. Pero, marahay na girumdumon ta an itinukdo ni Jesus manungod sa kaigutan sa pamimibi.

 Nagtao si Jesus nin ilustrasyon manungod sa sarong dukhang babaying balo na pabalik-balik sa bakong makatanusan na hukom para maghagad nin hustisya. (Lucas 18:1-3) Maski ngani kan inot habo siyang tabangan kan hukom, sa katapos-tapusi sinabi kaini sa saiyang sadiri: ‘Gigibuhan ko siya nin katanusan, tanganing dai niya ako mapurisaw kan danay niyang pagdidigdi.’ (Lucas 18:4, 5) Sigun sa pagkakasabi sa orihinal na lengguwahe, nagtao nin atensiyon an hukom sa babaying balo para dai siya kaini “patamaan sa irarom kan mata,” o sa piguratibong pagtaram, “rauton an [saiyang] reputasyon.” * Kun dawa an sarong bakong makatanusan na hukom, huli sa takot na maraót an reputasyon niya, matabang sa dukhang balo, an satong mapagmakulog na Diyos lalo nang matao nin hustisya sa mga ‘nag-aagrangay sa saiya aldaw asin banggi’! Arog kan sinabi ni Jesus, papangyarihon kan Diyos ‘na sa madali siya magibo sa sainda nin katanusan.’​—Lucas 18:6-8.

Dawa ngani kun minsan tibaad napapagal na kita sa paghagad nin tabang o pabor, dai kita dapat sumuko. Paagi sa pagmamaigot sa pagpamibi, maipapahiling ta na talagang gusto tang tabangan kita nin Diyos. Manunudan man niyato na mahiling an simbag nin Diyos sa satong mga kahagadan asin, bilang resulta, mas mapaparani kita sa saiya. Iyo, makakapagtiwala kita na sisimbagon ni Jehova an satong tamang mga pamibi kun padagos kitang naghahagad na may pagtubod.​—Lucas 11:9.