Kan taon 33 C.E., si Jesus nagadan, binuhay liwat, asin suminakat sa langit. Pakalihis nin huruhalawig na panahon, tinawan siya nin awtoridad na mamahala bilang Hadi. (Daniel 7:13, 14) Sa maabot na panahon, mahiro si Jesus bilang Hadi tanganing magdara nin katuninungan sa bilog na kinaban asin halion an kadukhaan.​—Basahon an Salmo 72:7, 8, 13.

Magibo si Jesus nin makangangalas na mga bagay bilang Tagapamahala nin katawuhan. Gagamiton niya an kapangyarihan na itinao sa saiya kan Ama para ibalik sa pagkaperpekto an mga tawo. Mabubuhay sinda sa daga na dai na maggugurang pa o magagadan.​—Basahon an Juan 5:26-29; 1 Corinto 15:25, 26.

Pinamamayuhan ni Jesus ngunyan an pambilog na kinaban na paghuhulit kan saiyang tunay na mga parasunod. Dinadalaw ninda an mga tawo para ipahiling sa sainda an sinasabi kan Bibliya manungod sa Kahadian nin Diyos. Sinabi ni Jesus na padagos niyang susuportaran an gibuhon kan saiyang mga disipulo sagkod na tapuson kan Kahadian nin Diyos an mga gobyerno nin tawo.​—Basahon an Mateo 24:14; 28:19, 20.

Paagi sa tunay na Kristiyanong kongregasyon, ginigiyahan ni Jesus an mga tawo sa mas marahay na pamumuhay. Padagos niya sindang gigiyahan para makaligtas sa pagkalaglag kan presenteng sistema nin mga bagay pasiring sa bagong kinaban na ipinanuga nin Diyos.—Basahon an 2 Pedro 3:7, 13; Kapahayagan 7:17.