An Bibliya Tataramon nin Diyos. Garo iyan surat hali sa sarong mamumuton na ama. (2 Timoteo 3:16) Sa Bibliya, sinasabi nin Diyos kun paano ta siya mapapaugma, kun taano ta tinutugutan niya an karatan, asin kun ano an gigibuhon niya para sa mga tawo sa maabot na panahon. Pero biniribid kan mga paratukdo sa relihiyon an katukduan sa Bibliya; kaya, iniisip kan dakul na nungka na nindang masasabutan iyan.—Guibo 20:29, 30.

Gusto nin Diyos na Jehova na masabutan ta an katotoohan manungod sa saiya. Huli kaiyan, itinao niya sa sato an sarong libro na posibleng masabutan.—Basahon an 1 Timoteo 2:3, 4.

Apuwera sa pagtao sa sato kan Bibliya, nagtatao si Jehova nin tabang na masabutan ta iyan. Sinugo niya si Jesus tanganing tukduan kita. (Lucas 4:16-21) Tinabangan ni Jesus an mga nagdadangog sa saiya na masabutan an Kasuratan, na nagkokotar nin mga bersikulo diyan.—Basahon an Lucas 24:27, 32, 45.

Inestablisar ni Jesus an Kristiyanong kongregasyon tanganing magpadagos an gibuhon na pinunan niya. (Mateo 28:19, 20) Ngunyan, tinatabangan kan tunay na mga parasunod ni Jesus an mga tawo na masabutan an itinutukdo kan Bibliya manungod sa Diyos. Kun gusto mong masabutan an Bibliya, mauugma an Mga Saksi ni Jehova na tabangan ka.—Basahon an Guibo 8:30, 31.