PAANO nagin maogma asin marahay na agom na lalaki patin ama an saro na nagdakula sa miserableng pamilya? Ano an nagpahiro sa sarong babae na kadakol nin bisyo na bagohon an saiyang buhay? Basahon an estorya ninda.
“Pagmate Ko, Dai Akong Halaga.”—VICTOR HUGO HERRERA
TAON NIN PAGKAMUNDAG: 1974
GINIKANAN NA NASYON: CHILE
DATING ADIKTO SA INOMON NA DE ALKOHOL
AN BUHAY KO KAIDTO:
Namundag ako sa siudad nin Angol, sa magayon na lugar sa timog kan Chile. Nungka kong nabisto an sakong ama. Kan tres anyos ako, nagbalyo kami sa kabisera, sa Santiago, kaiba kan sakong ina asin tugang na lalaki. Nag-istar kami sa sadit na kuarto sa sarong temporaryong kampo para sa mga daing harong. Naggagamit kami nin pampublikong kasilyasan asin nagkukua nin tubig sa sarong dakulang tubo na kinukuanan nin tubig kan mga bombero.
Pakalihis nin mga duwang taon, tinawan kami kan gobyerno nin sadit na harong. Kaya lang, lakop sa bago niamong lugar an pagdodroga, pagburat, krimen, asin prostitusyon.
Sarong aldaw, nakabisto kan sakong ina an sarong lalaki, na pag-abot nin panahon nagin agom nia. Parainom an padrasto ko. Binubugbog nia kaming mag-ina. Patago akong naghihibi, asin sinasabi ko na kutana igwa ako nin ama na maprotektar sa sako.
Pobrehon pa man giraray kami dawa maigot na nagtrabaho an sakong ina. Kun nagugutom kami, may beses na polbos na gatas asin asukar sana an pagkakan mi. Patago kaming nagsisirip kan tugang ko sa bintana kan samong kataed tanganing makahiling nin telebisyon. Pero sarong aldaw nadakop nia kami, kaya dai mi na idto naotro!
Kun bakong burat an sakong padrasto—na bihira man nganing mangyari—binabakalan nia kaming magtugang nin makakakan. Sarong beses binakalan nia kami nin sadit na telebisyon. Iyan an saro sa pira sanang beses na nagigirumdoman kong nagin maogma ako.
Nakanood akong magbasa kan 12 anyos ako. Pakalihis nin sarong taon, nagpondo ako sa pag-eskuela asin nagtrabaho nin bilog na panahon. Pagkatapos kan trabaho nagduduman kami kan adulto kong mga katrabaho sa mga parti, na duman nagbuburat kami asin nagdodroga. Dai nahaloy nagin adikto na ako.
Kan 20 anyos ako, namidbid ko si Cati, asin sa kahurihurihi, nagpakasal kami. Sa primero, mayo nin problema, pero nagbalik ako sa dati kong buhay. Lalong naggrabe an gawe-gawe ko. Sa katapustapusi narealisar ko na kun ipagpapadagos ko an ginigibo ko, magsalang presohan o sementeryo an bagsak ko. An mas maraot pa, dahil sa sako, inaagihan man kan aki kong si Victor an mga inagihan ko kan hoben pa ako. Namondo ako, asin naanggot ako sa sadiri ko. An pagmate ko, dai akong halaga.
Mga 2001, nagbisita sa harong mi an duwang Saksi ni Jehova, asin nakipag-adal sa sainda sa Biblia si Cati. Ipinapakipag-olay nia sa sako an mga nanonodan nia. Gusto kong maaraman iyan kaya nag-adal man ako nin Biblia. Kan 2003, nabautismohan si Cati bilang saro sa Mga Saksi ni Jehova.
KUN PAANO BINAGO KAN BIBLIA AN BUHAY KO:
Sarong aldaw, nabasa ko an Rut 2:12, na nagsasabing babalosan ni Jehova an mga naghihiro na may pagtubod asin nagpapaili saiya. Narealisar ko na kun mabago ako, mapapaogma ko an Dios asin babalosan nia ako. Narisa ko na parateng nasasambitan sa Biblia an pagkondenar sa pagbuburat. An mga tataramon sa 2 Corinto 7:1 nagkaigwa nin epekto sa sako. Sinasadol kita kan bersikulong iyan na ‘magpakalinig sa gabos na ramog.’ Kaya pinondo ko na an bisyo ko. Kan primero, nagin mas aranggoton ako, pero nungkang nagpondo si Cati sa pagtabang sa sako.
Sa katapustapusi, naghale ako sa trabaho huling makusogon an panggigipit na magsigarilyo asin mag-inom. Minsan ngani dikiton na sana an samong kuarta huling dai na akong trabaho, mas dakol man an panahon ko na pag-adalan an Biblia. Kaidto talaga nagpoon na mag-oswag ako sa espirituwal. Nungkang naghagad si Cati nin labi sa kaya kong itao, ni binasol man nia ako huli sa simpleng estilo kan samong buhay. Nagpapasalamat nanggad ako sa mamomoton niang suporta.
Padikitdikit kong pinonan na orog pang makiasosyar sa mga Saksi. Tinabangan ninda akong masabotan na dawa dai ako nakatapos nin sekular na edukasyon, pinapahalagahan ni Jehova an sinsero kong pagmawot na paglingkodan sia. An pagkamoot asin pagkasararo na nahiling mi sa Kristianong kongregasyon nagkaigwa nin hararom na epekto sa samong pamilya. Dai mi nanompongan sa iba an arog kaiyan na katoninongan. Kan Disyembre 2004, nabautismohan man ako.
KUN PAANO AKO NAKINABANG:
Nagin totoo sa sako an mga tataramon ni Jehova na nakarekord sa Isaias 48:17, na sinabi nia: ‘Ako si Jehova na saimong Dios, na nagtotokdo saimo na igwa nin pakinabang.’ Napahanga nanggad an sakong ina asin tugang sa pagbabago ko, kaya nag-aadal na sinda ngonyan nin Biblia. Dawa an mga kataraed mi naoogma sa dakulang pagbabago ko asin sa kun gurano kaogma kan samong pamilya ngonyan.
Igwa ako nin agom na namomoot sa Dios asin ibinibilang ako na mapagtitiwalaan niang kaibaiba asin amigo. Dawa nungka kong nabisto an sakong ama, tinokdoan ako kan Biblia kun paano papadakulaon an tolo kong aking lalaki. Iginagalang ninda ako. An pinakaimportante, ibinibilang ninda si Jehova na totoong Persona, asin namomotan ninda sia.
“Dawa nungka kong nabisto an sakong ama, tinokdoan ako kan Biblia kun paano papadakulaon an tolo kong aking lalaki”
Nagpapasalamat nanggad ako na sa ibong kan mamondo kong eksperyensia kan aki pa ako, tinawan ako ni Jehova nin pagkakataon na magin maogma.
Namundag ako sa Sofia, Bulgaria, sa sarong may kayang pamilya. Binayaan kami kan samong ama kan anom na taon ako. Nakakabigla nanggad iyan, asin nagtao iyan sako nin grabeng emosyonal na kulog. Pagmate ko habo sako kan mga tawo asin bako akong maninigo na mamotan. Mantang nagdadakula, nagin rebelyoso ako huli kan saboot na ini. Nagin aranggoton asin agresibong daraga ako.
Katorse anyos ako kan enot akong maglayas sa harong. Parate akong nag-iikit nin kuarta sa ina ko asin sa lolo saka lola ko. Pirme akong napapaiwal sa eskuelahan huli sa pagigin aranggoton, asin bilang resulta, pinabalyo ako sa limang magkakalaen na eskuelahan sa laog sana nin nagkapirang taon. Tolong taon bago ako maggradwar, nagpondo ako sa pag-eskuela. Nagin imoral na marhay an buhay ko. Naadik ako sa sigarilyo asin marijuana. Nagbuburat ako, pirmeng nasa parti, asin naimbuelto sa negosyo nin droga. Pagmate ko mayong saysay an mabuhay sa kinaban na daing paglaom kun saen nagsasakit asin nagagadan an mga tawo. Kaya nagpapasiramsiram sana ako sa kada aldaw.
Kan 1998, kan 24 anyos ako, inarestar ako sa airport kan São Paulo, Brazil, mantang nagpapalusot nin ilegal na droga. Nasentensiahan ako nin apat na taon na pagkapreso.
KUN PAANO BINAGO KAN BIBLIA AN BUHAY KO:
Kan 2000, pinonan kan Mga Saksi ni Jehova na magbisita sa presohan mi sarong beses kada semana. Mabooton sako si Marines, saro sa mga Saksi. Tinabangan nia akong magkainteres na orog pang pag-adalan an Biblia. Huling dai akong aram manongod sa mga Saksi, hinapot ko an mga kaiba kong preso kun ano an masasabi ninda sa mga Saksi. Nabigla ako huling an kadaklan sa mga hinapot ko bakong marahay an sinabi. An sabi kan sarong preso makiiba na daa ako sa dawa anong relihion basta bako sa mga Saksi ni Jehova. Sa sinabi nia, lalo sana akong nagngalas; gusto kong aramon kun taano ta ikinakaongis an mga tawong ini. Naniwala ako na sinda kaya an tunay na relihion. Total, sinasabi kan Biblia na pepersegiron an gabos na sinserong naghihingoang sumunod ki Jesus.—2 Timoteo 3:12.
Durante kaiyan, naasignaran akong magtrabaho sa edipisyong pang-administrasyon kan presohan. Sarong aldaw, may nakua akong nagkapirang kahon sa bodega na may laog na lumang mga magasin* na Torrengbantayan asin Awake! Dinara ko an mga magasin sa sakong selda asin binasa iyan. Mientras na nagbabasa ako, orog kong namamatean na garo ako yaon sa sarong desierto asin nakanompong nin nakakarepreskong tubig. Mantang dakol akong panahon, inadalan ko an Biblia aroaldaw.
Sarong aldaw, inapod ako sa opisina kan presohan. Inaasahan ko na papaluwason na ako, kaya dali-dali kong kinua an nagkapirang gamit ko, nagpaaram sa mga kapwa ko preso, asin nagdalidali pasiring sa opisina. Minsan siring, pag-abot ko duman, igwa palan ako nin bagong kaso na pagtago nin palsipikadong mga dokumento. Bilang resulta, sinentensiahan ako nin duwa pang taon na pagkapreso.
Sa primero, biyo akong pinangluyahan. Pero pakalihis nin duwang aldaw, narealisar ko na dawa paano, bendisyon an pangyayaring ini. Dawa ngani dakol na man an nanodan ko sa Biblia, gusto ko pa man giraray talagang balikan an dati kong buhay pagluwas ko sa presohan. Kaipuhan ko nin dakol pang panahon para magbago.
Kun minsan iniisip ko na imposibleng akoon ako nin Dios na magin saro sa mga parasamba nia. Pero hinorophorop ko an mga teksto sa Biblia na arog kan 1 Corinto 6:9-11. Ipinapahiling kan mga bersikulong iyan na kan enot na siglo C.E., bago nagin mga parasamba ni Jehova an nagkapirang Kristiano kaidto, dati sindang mga parahabon, parainom, asin parakikil. Alagad, nagbago sinda sa tabang ni Jehova. Napakusog akong maray kan halimbawa ninda.
Madali kong napondo an iba kong bisyo. Halimbawa, dai akong gayo nadepisilan na pumondo sa pagdroga. Pero iba pag-abot sa pagsigarilyo. Inabot ako nin labing sarong taon bago ko nahale an bisyong iyan. An sarong bagay na nakatabang, inaram ko an maraot na epekto kan pagsigarilyo sa satong salud. Orog sa gabos, an daing ontok na pamimibi ki Jehova an nakatabang sako na pumondo sa bisyo.
Mantang napaparani ako ki Jehova, padikitdikit kong nahale an pakamate na habo sako kan mga tawo, pakamate na piglalabanan ko pagkatapos na abandonaron kami kan ama ko. Napahiro nanggad ako kan mga tataramon sa Salmo 27:10. An bersikulong iyan nagsasabi: “Minsan an sakuyang ama asin sakuyang ina pabayaan ako, si Jehova [mismo an maampon sa sako, NW].” Narealisar ko na nanompongan ko an pinakamarahay na Ama—saro na nungka akong pababayaan! Igwa na ngonyan nin katuyohan an buhay ko. Kan Abril 2004, anom na bulan pagkaluwas ko sa presohan, nabautismohan ako bilang saro sa Mga Saksi ni Jehova.
KUN PAANO AKO NAKINABANG:
Maogma na ako. Huling mayo na akong nakakaraot na mga bisyo, mas marahay na an salud ko sa pisikal asin emosyonal kompara kan hoben pa ako. Maogma kami kan agom ko, asin dayupot kong katood an sakong langitnon na Ama, si Jehova. Sa tahaw kan saiyang mga parasamba, dakol akong ama, ina, saka mga tugang na lalaki asin babae. (Marcos 10:29, 30) Nagpapasalamat ako huli ta nahiling ninda an potensial ko—bago ko pa iyan nahiling sa sadiri ko.
Kun beses, nakokonsensia ako huli sa dating buhay ko. Pero naranga ako sa pakaaram na sa ipinanuga nin Dios na bagong kinaban, an maraot na mga pangyayari ‘dai na marurumdoman.’ (Isaias 65:17) Mientras tanto, nakakatabang an mga eksperyensia ko na magpahiling nin empatiya sa iba na nakakaeksperyensia man kan inagihan ko kaidto. Sa bagay na iyan, may bentaha an dating buhay ko. Halimbawa, kun nasa Kristianong ministeryo, medyo pasil sa sako na makipag-olay sa mga tawong adikto sa droga, alkoholiko, o kriminal—na dai namimili. Kompiado ako na kun nakaya kong magbago tanganing paogmahon si Jehova, kaya man iyan kan iba!
Ano an nakapabago sa saro na dating naimpluwensiyahan na marhay nin ateismo asin Komunismo kan hoben pa, pero ngunyan namumuhay na uyon sa mga pamantayan nin Diyos?
