Matatapos daw an Daga?

“AN KATAPUSAN kan kinaban dai nawawara sa uso, minsan paano kun pelikula an pag-oolayan.” Iyan an sabi kan kolumnistang si John Scalzi. Taano an mga tawo ta wiling-wili sa mga pelikula manongod sa katapusan kan kinaban? “Huli ta ihinahayag kan mga iyan an mga bagay na satong kinakatakotan,” an rason ni Scalzi. Oyon daw kamo? Igwa daw kita nin lehitimong mga dahelan na matakot manongod sa kun paano asin noarin posibleng matapos an daga asin an gabos na buhay dian?

Haros aroaldaw, nakakadangog kita nin natural na mga kalamidad na nandedestroso sa bilog na kinaban. An nakakasindak na mga kua sa video kan siring na kapahamakan paorootrong ipinapaheling sa TV asin sa Internet. Kun kita paorootrong nakakaheling nin mga retrato nin tunay na mga tawo asin tunay na mga lugar na nadedestroso, pasil na isipon na an katapusan kan kinaban tunay na peligro asin bako sanang basta pasale sa pelikula.

Pinapagrabe pa an siring na takot, an mga sientista may mga teoriya manongod sa kun paano posibleng matapos an daga. May prediksion pa ngani an nagkapira sa puedeng apodon na petsa nin pagpaso kan daga. Kan Marso 2008, an Monthly Notices of the Royal Astronomical Society nagbareta na duwang astronomo an nagkarkulo na sa laog nin mga 7.59 bilyones na taon, hahalonon kan saldang an satong planeta asin tutunawon iyan.

Talaga daw na mapapaso an daga pag-abot nin panahon?

Igwa daw nin Petsa nin Pagpaso an Satong Planeta?

Inaasegurar kita kan Biblia: “Sarong henerasyon minahali, saro man na henerasyon minadatong, alagad an daga nagdadanay sagkod pa man.” (Eclesiastes 1:4, An Banal na Biblia, Edisyon 1997) Masarig na ‘pinatugmad ni Jehova Dios an daga sa mga establisadong lugar kaiyan’ asin dinisenyo iyan na magdanay “sagkod sa panahon na daing talaan, o sagkod lamang.” (Salmo 104:5) An ipinasabong daw na mga tataramon na ini nin Dios garo dai na mapaniwalaan? Taano ta dapat kamong maniwala na an daga dai mapapaso, mantang an nagkapirang sientista iba man an hinihingako?

Bueno, isip-isipa sa madali an manongod sa mga produkto na yaon sa istante sa sarong tindahan. An nagkapira may petsa nin pagpaso. Siisay an nagdeterminar kan petsang iyan? Iyan daw banabana sana kan manedyer kan tindahan? Siempre bako! An pabrikante iyo an nagdeterminar kan petsa nin pagpaso. May tiwala kita sa petsang iyan huli ta mas aram kan pabrikante an mga produkto nia kisa siisay pa man. Gurano pa daw na mas maninigo niatong pagtiwalaan an Kaggibo kan satong planeta! An Saiyang Tataramon malinaw na nagsasabi na saiyang “pinamugtak nin masarig an daga” tanganing magdanay sagkod lamang. Mayo nanggad nin petsa nin pagpaso!—Salmo 119:90.

Pero, posible daw na raoton nin iresponsableng mga tawo an daga sagkod na iyan dai na puedeng mapakarhay? Dai nanggad! Bakong arog nin mga tawong pabrikante, ‘kaya ni Jehova na gibohon an gabos.’ (Job 42:2) Iyan an dahelan kun taano ta may kompiansa siang makakagarantiya: “An sakong tataramon na magluwas sa sakong ngoso . . . siertong magigin mapanggana.” (Isaias 55:11) Makakaseguro kita na an “Kaggibo sa sato” dai matogot na pugolan sia nin ano man na bagay sa pag-otob kan saiyang katuyohan para sa daga. (Salmo 95:6) Ano an katuyohan na iyan, asin paano iyan ootobon nin Dios?

Ootobon kan Kahadean nin Dios an Saiyang Kabotan

Dugang pa sa paggarantiya na dai noarin man mapapaso an daga, an Tataramon nin Dios nagsasabi man sa sato na sia “naghaman kaiyan tanganing pag-istaran.” (Isaias 45:18) Dawa ngani rinibo nang taon na iniistaran an satong daga, iyan mismo dai nakaotob sa katuyohan nin Dios.

Si Jehova “maogmang Dios” asin “mamomoton sa hustisya.” (1 Timoteo 1:11; Salmo 37:28) An saiyang katuyohan iyo na an gabos na tawo mabuhay  nin maogma asin mayo nin inhustisya. Tanganing maotob an saiyang katuyohan, ihinula nin Dios na maestablisar sia nin sarong Kahadean sa kalangitan na mamamahala sa bilog na daga. (Daniel 2:44) Mantang yaon sa daga, danay na nagtaram si Jesus manongod sa gobyernong Kahadean nin Dios. Inenkaminar nia an saiyang mga disipulo na ipamibi iyan huli ta aram nia an gabos na bendisyon na nakatagama para sa daga sa irarom kan pagreynar kan Kahadean na iyan. (Mateo 6:9, 10; 24:14) Ano an nagkapira sa mga bendisyon na iyan?

▪ An katoninongan asin katiwasayan mangingibabaw huli ta nanunuga an Dios na tataposon nia an gabos na guerra.—Salmo 46:9.

▪ Magkakaigwa nin igong pagkakan para sa gabos.—Salmo 72:16.

▪ Bako nang problema an pag-asikaso sa salud huli ta “mayo nin nag-eerok na masabi: ‘Naghehelang ako.’”—Isaias 33:24.

▪ Dai na kaipuhan na magmondo, huli ta “an kagadanan mawawara na.”—Kapahayagan 21:4.

▪ Nanunuga an Dios na an banwaan nia matogdok kan sadiri nindang mga harong, mabubuhay na may seguridad, asin ‘maggagayagaya sagkod lamang.’—Isaias 65:17-24.

Mayong duda na minamawot nindo na maeksperyensiahan an mga kamugtakan na siring kan sinambit sa itaas. Si Jehova pano nin naglalaad na kaigotan o pagmawot na otobon an gabos niang ihinula. (Isaias 9:6, 7) Pero, tibaad isipon nindo: ‘Rinibong taon na an uminagi poon kan irinekord sa Biblia an mga panuga nin Dios. Taano ta dai pa naootob an mga iyan?’

An Pagpapasensia nin Dios Nagbubunga kan Satong Kaligtasan

Makakapagtiwala kita na “si Jehova bakong maluway kun dapit sa saiyang panuga.” Ipinapaliwanag kan Biblia na an Dios mamomoton na nagpapaheling sa sato nin pagpapasensia. Huli kaini, dinadagka kita na ‘ibilang na kaligtasan an pagpapasensia kan satong Kagurangnan.’ (2 Pedro 3:9, 15) Alagad taano an pagpapasensia nin Dios ta kaipuhan para sa kaligtasan?

Enot sa gabos, aram nin Dios na bago nia matawan an matanos na mga tawo nin ligtas asin komportableng erokan, kaipuhan nia ngunang ‘laglagon an mga nagraraot kan daga.’ (Kapahayagan 11:18) Minsan siring, huli ta namomotan ni Jehova an mga tawo, “dai nia mawot na an siisay man malaglag.” Bilang resulta, an satong langitnon na Ama mapasensiang naghihingoa na “patanidan an maraot sa saiyang maraot na dalan.” Sa katuyohan na iyan, ipinapahulit ni Jehova an mensahe manongod sa saiyang Kahadean sa bilog na kinaban. * (Ezequiel 3:17, 18) An gabos na maghimate sa patanid nin Dios asin ioyon an saindang buhay sa saiyang matanos na mga prinsipyo ililigtas asin magkakamit nin buhay na daing katapusan sa paraisong daga.

Dumolok sa Dios Asin Maligtas

Sierto nanggad, an Biblia igwa nin “maogmang bareta” para sa sato. (Mateo 24:14) Itinatao kaiyan sa sato an dai nasusudyang tataramon nin Dios na an satong daga dai noarin man matatapos! Dugang pa, segun sa mga hula kan Biblia, puede kitang magtubod na “dai na mahahaloy, asin an maraot mawawara na.” Madali na, idto sanang mga matanos sa pagheling nin Dios an “makakasadiri kan daga, asin tunay na manonompongan ninda an saindang labi-labi nanggad na kaogmahan sa nagsosopay na katoninongan.” (Salmo 37:9-11, 29; Mateo 5:5; Kapahayagan 21:3, 4) Sagkod na dai pa iyan minaabot, an Dios padagos na mapasensiang mangangapodan: “Dolok kamo sa sakuya asin maliligtas kamo, kamo gabos na nasa mga poro kan daga.” (Isaias 45:22) Ano an gigibohon nindo?

Taano ta dai kamo magin determinado na dumolok sa Dios? Sinasadol kita kan Salmo 37:34: “Maglaom ka ki Jehova asin otoba an saiyang dalan, asin ilalangkaw ka nia tangani na makasadiri kan daga.” Maoogma an mga Saksi ni Jehova na tabangan kamo na makanood nin orog pa manongod sa daing sagkod na katuyohan nin Dios para sa daga asin kun paano kamo mabubuhay tanganing maheling na aktuwal na mangyari an katuyohan na iyan.

[Nota sa Ibaba]

[Picture Credit Line sa pahina 22]

Retrato na kua kan NASA