Ano an Pagmansay nin Dios sa Inomon na de Alkohol?

AN SATONG Kaglalang, na nagmamawot kan pinakamarahay para sa sato, dai ipinagbabawal an tama sanang paggamit nin inomon na de alkohol. * Sa kabaliktaran, itinao nia sa tawo an “arak na mapaogma sa saiya, lana nin oliba na mapagayagaya sa saiya, asin tinapay na matao sa saiya nin kosog.” (Salmo 104:15, Today’s English Version) Sa sarong pangyayari, si Jesu-Cristo nakakontribwir sa kaogmahan nin sarong kasal paagi sa paggibo nia sa tubig na magin “pinakamarahay na arak.”—Juan 2:3-10, New Jerusalem Bible.

Rasonableng isipon na aram nanggad kan Kaglalang kun ano an epekto kan alkohol sa pagpunsionar kan hawak asin hotok. Paagi sa Biblia, an satong langitnon na Ama ‘nagtotokdo sa sato na pakinabangon an satong sadiri,’ asin marigon nia kitang pinapatanidan tumang sa pag-abuso sa makosog na inomon. (Isaias 48:17) Mangnohon an prangkang mga patanid na ini:

“Dai kamo maburat sa arak, na dian igwa nin karigsokan.” (Efeso 5:18) An “mga paraburat . . . nungkang magmamana kan Kahadean nin Dios.” (1 Corinto 6:9-11, Jerusalem Bible) Kinokondenar kan Tataramon nin Dios an “pagburat, daing kontrol na mga parti, asin mga bagay na kaagid kaini.”—Galacia 5:19-21, Byington.

Estudyaran niato ngonyan an nagkapira sa mga peligro nin sobrang pag-inom.

Mga Peligro nin Sobrang Pag-inom

Minsan ngani may ikinakatao man na karahayan an inomon na de alkohol, igwa iyan nin makosog na mga sangkap na nakakapabago sa pagpunsionar kan isip asin hawak. An sobrang paggamit nin inomon na de alkohol puedeng magin dahelan kan arin man sa minasunod na mga problema:

An makosog na pag-inom nakakaraot sa paghusgar kan parainom, kaya ‘dai sia makakapag-isip nin malinaw.’ (Talinhaga 23:33, TEV) Si Allen, an makosog na parainom na nasambitan sa naenot na artikulo, nagpaliwanag: “An alkoholismo bako sanang helang sa hawak; iyan helang sa kaisipan asin saboot nin saro. Dai mo iniisip an kolog na itinatao kaiyan sa ibang tawo.”

 An sobrang pag-inom puede man na makapaluya sa pagpupugol nin saro. An Kasuratan nagpapatanid: An “arak patin mahamis na arak an naghahale nin marahay na motibo.” (Oseas 4:11) Sa anong paagi? Huli sa mapandayang impluwensia nin alkohol, an mga kaisipan asin kamawotan na sa parate napupugolan niato garo baga nagigin puede na—o nakakaakit pa ngani. Puedeng lumuya an satong determinasyon na manindogan sa kun ano an tama. Puede man na paluyahon kan alkohol an satong moral na mga pandepensa, na nagreresulta sa espirituwal na kapahamakan.

Halimbawa, si John asin an saiyang agom nagkaigwa nin argumento asin si John anggot na huminale pasiring sa bar. Kan magdolok sa saiya an sarong babae, nakainom na sia tanganing magpakalma. Pagkatapos nin pira pang tagay, si John nag-iba sa babae asin nakakomiter nin pagsambay. Dangan, pinagbasolan na gayo ni John an pakagibo nin bagay na nungka nia kutanang maiisip na gibohon kun dai napaluya kan alkohol an saiyang pagpupugol.

An sobrang pag-inom puedeng magresulta sa daing kontrol na pagtaram asin paggawe. “Siisay an pirmeng napapaiwal? Siisay an nakikiargumento asin nakikilaban?” an hapot kan Biblia. “An gabos na naghahaloy, para sa saro na sanang tagay.” (Talinhaga 23:29, 30, Contemporary English Version) Huli sa sobrang pag-inom tibaad an “pagmate mo garo baga ika nasa kadagatan, nalulula, nagtatabyon sa mga pisi kan ipinapadpad na barko.” (Talinhaga 23:34, TEV) An saro na nagpalabilabi sa pag-inom puedeng magmata na “may mga lugad sa bilog na hawak, na dai ngani magirumdoman kun paano nangyari an gabos na iyan.”—Talinhaga 23:35, CEV.

An sobrang pag-inom puedeng makaraot sa pisikal na salud. “Sa katapustapusi [an inomon na de alkohol] nangangagat siring sa halas asin nakakahilo siring sa rimoranon.” (Talinhaga 23:32, New International Version) Pinatunayan kan siensia medikal na madonong an suanoy na talinhagang iyan. An pagkaigwa nin dakol na alkohol sa hawak sarong nakakagadan na hilo na puedeng magresulta sa manlaenlaen na kanser, paggatok kan katoy, cirrhosis, paggatok kan pancreas, hababang asukar sa dugo sa mga diabetiko, fetal alcohol syndrome, istrok, o helang sa puso—na pira sana sa mga resulta kaiyan. Asin dawa an sarong beses na sobrang pag-inom puedeng magresulta sa koma o sa kagadanan. Pero an pinakagrabeng resulta nin pagpalabilabi sa pag-inom dai ilinaladawan sa mga libro dapit sa medisina.

An pinakagrabeng peligro. Dawa kun an saro dai man nabuburat, an sobrang pag-inom nagreresulta sa espirituwal na mga peligro. Malinaw na sinasabi kan Biblia: “Herak man kan mga nagmamata nin amay sa aga tanganing hanapon sana ninda  an nakakaburat na arak, na nagdadanay sagkod sa kadikloman nin matangang banggi tanganing palaadon sinda kan arak mismo!” Taano? Ipinaliwanag ni Isaias an espirituwal na mga resulta nin sobrang pag-inom: “Dai ninda pinagheheling an aktibidad ni Jehova, asin dai ninda naheling an gibo kan saiyang mga kamot.”—Isaias 5:11, 12.

An Tataramon nin Dios nagsasadol sa sato na dai “makiiba sa mga makosog na parainom nin arak.” (Talinhaga 23:20) Pinapatanidan an may edad nang mga babae na dai magin “oripon nin dakol na arak.” (Tito 2:3) Taano ta dai? Sa parate dai naririsa nin mga tawo na luway-luway na nadadagdagan an iniinom ninda asin nagigin nang mas parate an pag-inom ninda. Pag-abot nin panahon, an parainom tibaad “nakahigda na mata asin naghahapot, ‘Noarin daw maabot an aga, tanganing makainom pa giraray ako?’” (Talinhaga 23:35, CEV) Delikado na para sa mga parainom kun grabe an pagmawot ninda na makainom tolos pagkaaga tanganing mahingawan sa labi-labing pag-inom kan nakaaging banggi.

An Biblia nagpapatanid na an mga nakikikabtang sa “mga pagpalabilabi sa arak, maribok na mga pag-ogma, mga daraogan sa pag-inom . . . maninimbag sa saro na andam na maghokom sa mga nabubuhay asin sa mga gadan.” (1 Pedro 4:3, 5) Asin mapadapit sa delikadong mga panahon na kinabubuhayan niato, si Jesus nagpatanid: “Tawan nindo nin atension an saindong sadiri na an saindong puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin bigla na sana na abotan kamo kan aldaw [ni Jehova] na siring sa sarong siod.”—Lucas 21:34, 35.

Pero, ano an puedeng gibohon kan mga sobrang mag-inom tanganing dai sinda ‘mapagabatan nin makosog na pag-inom’?

[Nota sa Ibaba]

[Mga Ritrato sa pahina 4, 5]

An sobrang paggamit nin inomon na de alkohol puedeng magresulta sa dakol na problema