Naghahapot an mga Parabasa

Taano ta Dai Nakikiiba sa Guerra an mga Saksi ni Jehova?

Saen man sinda nag-iistar, an Mga Saksi ni Jehova igwa nin halawig na rekord nin paglikay sa pisikal na labanan kan mga nasyon o kan mga grupong nagraralaban sa laog nin sarong nasyon. “Pinapagdadanay kan Mga Saksi ni Jehova an estriktong neutralidad sa panahon nin guerra,” an sabi kan Australian Encyclopædia kabangang siglo na an nakaagi.

An sarong pangenot na dahelan kun taano an mga Saksi ta dai nakikikabtang sa guerra iyo na babalgahon kan pakikiiba sa siring na ralaban an saindang Kristianong konsensia. An saindang konsensia sinanay sa mga pagboot asin halimbawa kan Kagurangnan na si Jesu-Cristo. Sinabihan nia an saiyang mga parasunod na kamotan an saindang kapwa. Ipinagboot man nia: “Padagos na kamotan an saindong mga kaiwal, gibohan nin marahay an mga naoongis sa saindo.” (Lucas 6:27; Mateo 22:39) Kan an saro sa saiyang mga disipulo magprobar na idepensa sia gamit an sarong espada, sinabihan sia ni Jesus: “Sarungan an saimong espada, huli ta an gabos na minabingat nin espada sa espada man magagadan.” (Mateo 26:52) Sa siring, paagi sa tataramon asin halimbawa, maliwanag niang ipinaheling na an saiyang mga parasunod dapat na dai maggamit nin armas sa pisikal na pakikilaban.

An saro pang dahelan kan dai pakikiiba kan Mga Saksi ni Jehova sa guerra iyo na sinda mga miembro nin sarong pambilog na kinaban na grupo nin mga may pagtubod. Papag-iiwalon kan guerra an tugang tumang sa tugang, asin iyan magigin sarongat sa pagboot ni Jesus na ‘magkaminorootmootan.’​—Juan 13:35.

An mga prinsipyong naggigiya sa pagkamoot na tinokar sa itaas bakong teoriya sana para sa Mga Saksi ni Jehova. Bilang halimbawa, siyasaton an saindang iginawe durante kan Guerra Mundial II, 1939-1945. Sa Estados Unidos, labi sa 4,300 na Saksi ni Jehova an nakarsel sa bilanggoan pederal huli sa pagsayumang magserbisyo sa militar. Sa Britania, labi sa 1,500, kaiba an sobra sa 300 na babae, an nabilanggo huli sa pagsayumang magtrabaho may koneksion sa guerra. Sa Nazi Alemania, labi sa 270 Saksi an ginaradan sa orden kan Estado huli sa pagsayuma nindang magkapot nin armas. Sa irarom kan rehimen na Nazi, labi sa 10,000 na Saksi an nakarsel, magsalang sa mga bilanggoan o sa mga kampo de konsentrasyon. An mga Saksi sa Hapon nagsakit man nin makuri. An siisay man na indibiduwal na nagadanan nin namomotan sa labanan kan Guerra Mundial II​—o, an totoo, sa arin man na suminunod pang guerra—​makakasierto na mayo ni saro sa Mga Saksi ni Jehova na responsable sa siring na mga pagkagadan.

An pagmansay kan Mga Saksi ni Jehova may labot sa guerra mapuersang ipinahayag sa huring mga tataramon ni Wolfgang Kusserow. Kan 1942 pinugotan nin payo kan mga Nazi an 20 anyos na Aleman na ini huli ta nagsayuma siang lumaban sa guerra. (Isaias 2:4) Sinabi nia sa atubangan kan husgado militar: “Pinadakula ako bilang saro sa Mga Saksi ni Jehova, kaoyon kan tataramon nin Dios na nasa Banal na Kasuratan. An pinakadakula asin pinakabanal na ley na itinao nia sa katawohan iyo an ‘Kamotan mo an saimong Dios nin orog sa gabos asin an saimong kapwa nin siring sa saimo man sana.’ An iba pang togon nagsasabi: ‘Dai ka maggadan.’ An gabos daw na ini ipinasurat kan satong Kaglalang para sa mga kahoy?”​—Marcos 12:29-31; Exodo 20:13.

An Mga Saksi ni Jehova naniniwala na solamente si Jehova, an makakamhan sa gabos na Dios, an magpapangyari nin permanenteng katoninongan sa daga. Naglalaom sinda sa saiya na otobon an saiyang panuga na ‘papaontokon nia an mga guerra sagkod sa kaporoporohi kan daga.’​—Salmo 46:9.