Ano an Kahadean nin Dios?

ANO an pinakatema kan paghuhulit ni Jesus? Oyon ki Jesus mismo, iyan an Kahadean nin Dios. (Lucas 4:43) Kan naghihinanyog an mga tawo kan sia nagtataram, siertong nakadangog sinda nin dakol na pagkasambit manongod sa Kahadean na iyan. Sinda daw nagngalas o naribaraw? Hinapot daw ninda sia kun ano an Kahadean na ini? Dai. Mayong sinambit sa mga Ebanghelyo manongod sa siring na mga hapot. Kaya, pamilyar daw na ideya sa mga tawong idto an Kahadean nin Dios?

An totoo, an suanoy na Kasuratan na iginagalang kan mga Judio bilang banal naglaladawan kan Kahadean na iyan, na ihinahayag sa malinaw asin buhay na pananaram kun ano iyan asin kun ano an gigibohon kaiyan. Ngonyan, mas dakol pa ngani an manonodan niato manongod sa Kahadean sa kapareho nanggad na paagi—sa paggamit kan Biblia. Tokaron niato an pitong katotoohan na itinotokdo sa sato kan Biblia manongod sa Kahadean. An enot na tolo madaling makua kan mga Judio kan panahon ni Jesus asin bago kaidto. An suminunod na tolo ihinayag ni Cristo o kan saiyang mga apostol kan enot na siglo. An huri nagin malinaw sa sato mismong panahon.

1. An Kahadean nin Dios sarong tunay na gobyerno, saro na magdadanay sagkod lamang. Ihinayag kan enot na hula sa Biblia na an Dios masugo nin sarong parasalbar sa maimbod na katawohan. Inaapod na an “banhi,” reremedyohan kan Sarong ini an grabeng mga problema na pinonan kan pagrebelde ni Adan, Eva, asin Satanas. (Genesis 3:15) Pakalihis nin harohalawig na panahon, sinabihan an maimbod na si Hadeng David nin sarong bagay na nakakapukaw sa boot manongod sa “banhi” na ini,  o Mesiyas. Sia mamamahala sa sarong Kahadean. An gobyernong ini magigin laen sa gabos na iba pa. Iyan magdadanay sagkod lamang.—2 Samuel 7:12-14.

2. Hahaleon kan Kahadean nin Dios an gabos na gobyerno nin tawo. Tinawan si propeta Daniel nin sarong bisyon na dian naheling nia an pagkasunodsunod nin pambilog na kinaban na mga kapangyarihan sa bilog na kasaysayan na nakaabot sagkod sa sato mismong panahon. Mangnohon an nakakapukaw sa boot na kulminasyon kan bisyon na iyan: “Sa mga aldaw kan [pangultimong tawong] mga hadeng idto an Dios nin langit mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na kahadean na ini, asin iyan mismo magdadanay sagkod sa mga panahon na daing talaan.” Kaya lalaglagon sagkod lamang an gabos na kahadean, o gobyerno, sa kinaban na ini—kaiba na an saindang mga guerra, pang-aapi, asin karatan. Siring kan ipinapaheling kan hula ni Daniel, an Kahadean nin Dios mamamahala sa bilog na daga sa dai na mahahaloy. (Daniel 2:44, 45) An gobyernong iyan bako sanang totoo kundi siring man iyan na sana an magdadanay. *

3. Tataposon kan Kahadean nin Dios an mga guerra, helang, tiggutom, pati an mismong kagadanan. Ihinahayag kan nakakapukaw sa boot na mga hula sa Biblia kun ano an gigibohon kan Kahadean nin Dios digdi sa daga. Gigibohon kan gobyernong iyan an dai nagibo kasuarin man o dai magigibo noarin man kan mga organisasyon nin tawo. Imahinara—an gabos na armas na pangguerra raraoton sagkod lamang! “Pinapaontok nia an mga guerra sagkod sa kaporoporohi kan daga.” (Salmo 46:9) Mayo na nin mga doktor, ospital, o ano man na klase nin helang. “Mayo nin nag-eerok na masabi: ‘Naghehelang ako.’” (Isaias 33:24) Mayo na nin mga tiggutom, kakulangan nin kakanon, malnutrisyon, o makuring gutom. “Magkakaigwa nin abundang tipasi sa ibabaw kan daga.” (Salmo 72:16) Mayo na nin mga paglobong, pagbelar, sementeryo, morge, o kamondoan na kaiba kaiyan. An kagadanan, an satong daing herak na kaiwal, dadaogon sa katapustapusi. “Totoong hahalonon [nin Dios] an kagadanan sagkod lamang, asin papahidon nanggad kan Soberanong Kagurangnan na Jehova an mga luha sa gabos na lalawgon.”—Isaias 25:8.

4. An Kahadean nin Dios igwa nin Namamahala na pinili nin Dios. Dai ninombrahan kan Mesiyas an sadiri nia, ni pinili man sia nin bakong sangkap na mga tawo. Pinili mismo sia ni Jehova Dios. Ipinaparisa nanggad iyan kan mismong mga titulong Mesiyas asin Cristo. An duwang tataramon na iyan nangangahulogan na “Linahidan.” Kaya an Hadeng ini linahidan, o ninombrahan ni Jehova para sa saiyang espesyal na katongdan. An Dios nagsabi manongod sa saiya: “Uya! An sakong lingkod, na higot kong pinangangaptan! An sakong pinili, na inoyonan kan sakong kalag! Ibinugtak ko an sakong espiritu sa saiya. Hustisya sa mga nasyon an papangyayarihon nia.” (Isaias 42:1; Mateo 12:17, 18) Siisay pa an orog na nakakaaram kisa sa satong Kaglalang kun anong klaseng Namamahala an kaipuhan niato?

5. Pinatunayan kan Namamahala sa Kahadean nin Dios an saiyang pagigin maninigo sa atubangan kan bilog na katawohan. Si Jesus nin Nazaret nagin an ihinulang Mesiyas. Namundag sia sa linahe na pinili nin Dios. (Genesis 22:18; 1 Cronica 17:11; Mateo 1:1) Kan yaon digdi sa daga, inotob nia an dakol na hula manongod sa Mesiyas na isinurat mga siglo bago kaidto. Ipinamidbid man sia hale sa langit bilang an Mesiyas. Paano nangyari iyan? Bueno, nagtaram an Dios hale sa langit, na ipinapamidbid sia bilang an Saiya mismong Aki; sinabi nin mga anghel na si Jesus an ihinulang Mesiyas; asin si Jesus naggibo nin mga milagro—na sa parate sa atubangan nin ginatos o rinibo pa nganing tawo na nakaheling mismo—na malinaw na paagi sa kapangyarihan nin Dios. * Paorootrong ipinaheling ni Jesus kun magigin anong klaseng Namamahala sia. Bako sanang igwa sia kan kapangyarihan na tabangan an mga tawo kundi igwa man sia kan kamawotan na gibohon iyan. (Mateo 8:1-3) Sia bakong maimot, sia mapagmalasakit, makosog an saiyang boot, asin sia mapakumbaba. An rekord kan saiyang buhay kan sia yaon digdi sa daga mababasa kan gabos sa Biblia.

6. An Kahadean nin Dios igwa nin 144,000 na kairibang namamahala ni Cristo. Sinabi ni Jesus na may iba pa, kaiba an saiyang mga apostol, na mamamahala sa langit kaiba nia. Inapod nia an grupong  ini na “sadangoton na aripompon.” (Lucas 12:32) Paghaloyhaloy, sinabihan si apostol Juan na an sadangoton na aripompon na ini magkakaigwa nin bilang na 144,000. Magkakaigwa sinda nin nakakaogmang marhay na gibohon sa langit, na mamamahala bilang mga hade asin maglilingkod bilang mga saserdote kaiba ni Cristo.—Kapahayagan 5:9, 10; 14:1, 3.

7. An Kahadean nin Dios, na namamahala na ngonyan sa langit, andam nang ponan an pamamahala kaiyan sa bilog na daga. An ikapitong katotoohan na ini iyo an saro sa pinakanakakapukaw sa boot na manonodan niato. An Biblia nagtatao nin dakol na prueba na itinao ki Jesus an saiyang autoridad bilang Hade sa langit. Sia namamahala na ngonyan duman, sa sato mismong panahon, asin dai na nanggad mahahaloy ipapaabot nia an saiyang pamamahala sa bilog na daga asin ootobon nia an kahangahangang mga hula na nasambitan na niato. Alagad paano kita makakasierto na an Kahadean nin Dios namamahala na ngonyan? Asin noarin iyan mapoon na mamahala sa daga?

[Mga Nota sa Ibaba]