1. Taano ta labi-labi an ‘pag-ugma ni Jesus sa banal na espiritu’? (Hilingon an ritrato sa itaas.)

NAIIMAHINAR mo daw kun ano an mamamatian mo pag nahiling mo an labi-labing ‘pag-ugma ni Jesu-Cristo sa banal na espiritu’? Tibaad naiisip mo an saiyang maugmahon na lalawgon na nakangirit na marhay, asin garo nagkikislap an saiyang mga mata. Taano ta maugmahon siya? Kakasugo pa sana niya sa 70 disipulo niya tanganing maghulit kan maugmang bareta dapit sa Kahadian nin Diyos. Interesado siyang marhay kun paano ninda gigibuhon an saindang asignasyon. Kadakul an maimpluwensiyang kaiwal kan maugmang bareta, arog kan madudunong asin halangkaw an inadalan na mga eskriba asin Fariseo. Inimpluwensiyahan ninda an dakul na menuson si Jesus bilang saro sanang karpintero asin an saiyang mga disipulo bilang ‘mga ordinaryong tawo sana asin mga mayong inadalan.’ (Gibo 4:13, BPV; * Mar. 6:3) Pero nagbalik an saiyang mga disipulo hali sa saindang misyon na grabe an kaugmahan. Naghulit sinda sa ibong nin pagkontra, dawa kan mga demonyo! Taano ta maugma sinda asin makusog an buot?—Basahon an Lucas 10:1, 17-21.

2. (a) Taano ta masasabing garo mga aking sadit an mga disipulo ni Jesus? (b) Ano an nakatabang sa mga parasunod ni Cristo na masabutan an mahalagang marhay na espirituwal na mga katotoohan?

² Mangnuhon an sinabi ni Jesus ki Jehova: “Hayag takang inuumaw,  Ama, Kagurangnan nin langit asin daga, huli ta itinago mo an mga bagay na ini sa mga madunong saka may inadalan asin ihinayag mo iyan sa mga aki. Iyo Ama, huli ta ini an saimong kagustuhan.” (Mat. 11:25, 26, NW) Siyempre, dai buot sabihon ni Jesus na literal na mga aking sadit an saiyang mga disipulo. Imbes, aram niya na garo sana sinda mga aki kun ikukumparar sa mga intelektuwal asin mga halangkaw an inadalan sa nasyon, na mga madunong an paghiling sa sadiri ninda. An mas importante, tinukduan ni Jesus an saiyang mga parasunod na magin siring sa mga aking sadit, na pirming mapakumbaba asin madaling tukduan. (Mat. 18:1-4) Paano sinda nakinabang sa pagigin mapakumbaba? Paagi sa banal na espiritu, tinabangan sinda ni Jehova na masabutan an mahalagang marhay na espirituwal na mga katotoohan mantang an mga madunong asin intelektuwal, na nagtutuya-tuya sa sainda, danay na binubuta ni Satanas asin kan halangkaw na paghiling ninda sa saindang sadiri.

3. Ano an pag-uulayan ta sa artikulong ini?

³ Kaya bakong makangangalas na ugmahon si Jesus! Naugma siyang mahiling kun paano ihinayag ni Jehova an saiyang hararom na espirituwal na mga katotoohan sa gabos na mapakumbaba, ano man an saindang pinag-adalan o abilidad. Naugma siyang marhay na inuyunan ni Jehova an paaging ini nin pagtutukdo. Nagbago daw si Jehova, asin paano niya ipinapahiling na inuuyunan pa man giraray niya an arog kaining paagi nin pagtutukdo? Mantang pinag-aadalan ta an simbag, mahihiling ta na puwede man magtao iyan sa sato nin dakulang kaugmahan, arog kan namatian ni Jesus.

4. Taano ta sarong mamumuton na regalo an pinasimpleng edisyon kan The Watchtower?

⁴ Sa nakaagi pa sanang mga taon, mahihiling sa espirituwal na pagtutukdo kan organisasyon ni Jehova na mas idinuduon na kaini an simple asin malinaw na paagi nin pagtutukdo. Hilingon an tulong halimbawa. Inot, yaon an pinasimpleng edisyon kan The Watchtower. * Mamumuton nanggad na regalo an edisyon na ini para sa mga nasasakitan na sabuton o basahon an sarong lengguwahe. Naririsa kan mga payo nin pamilya na mas nagpapartisipar na an saindang mga aki sa pag-adal kan magasin na ini, an panginot na pinakapaagihan sa pagtao nin espirituwal na kakanon. Dakul an nagsurat tanganing ipahayag an saindang udok sa pusong pasasalamat. Sarong sister an nagsurat na nag-aalangan siyang magkomento sa Pag-adal sa Torrengbantayan. “Garo sana ako estatwa,” an sabi niya. Pero bako na ngunyan! Kan ginagamit na niya an pinasimpleng edisyon, siya nagsurat: “Nagkokomento na ako ngunyan nin labi sa sarong beses, saka nawara na an takot ko! Nagpapasalamat ako ki Jehova asin sa saindo.”

5. Ano an nagkapirang bentaha kan rebisadong edisyon kan New World Translation of the Holy Scriptures?

⁵ Ikaduwa, yaon an rebisadong edisyon kan New World Translation of the Holy Scriptures, na ilinuwas sa Ingles kan Oktubre 5, 2013 sa taunan na miting. * Mas dikit na sanang tataramon an ginamit sa dakul na teksto, pero dai nabago an kahulugan kaiyan kundi nagin mas malinaw pa ngani. Halimbawa, an dating 27 tataramon sa Job 10:1 nagin 19 na sana, asin an dating 20 tataramon sa Talinhaga 8:6 nagin 13 na sana. An mga tekstong ini parehong nagin mas malinaw sa bagong edisyon. Sa katunayan, sarong maimbod na linahidan na brother na mga dekada nang maimbod na naglilingkod an nagsabi: “Katatapos ko pa sanang basahon an libro nin Job sa bagong edisyon, asin pagmati ko garo ngunyan ko pa sana ini nasabutan!” Arog man kaiyan an sinabi nin dakul.

6. Ano an masasabi mo sa mas lininaw na pakasabot sa Mateo 24:45-47?

⁶ Ikatulo, pag-isipan an nagkapira sa satong dai  pa sana nahahaloy na paglilinaw sa pakasabot. Halimbawa, ikinaugma niyato an paglilinaw sa pakasabot ta dapit sa “maimbod asin mapagmansay na uripon,” na ipinublikar sa Torrengbantayan na Hulyo 15, 2013. (Mat. 24:45-47, NW) Ipinaliwanag na an maimbod na uripon iyo an Namamahalang Grupo, mantang an “mga lingkod sa harong” iyo an gabos na pinapakakan sa espirituwal, linahidan man o ‘ibang mga karnero.’ (Juan 10:16) Nakakaugma nanggad na maaraman an siring na mga katotoohan asin itukdo iyan sa mga baguhan! Sa anong mga paagi pa ipinapahiling ni Jehova na inuuyunan niya an simple asin malinaw na paagi nin pagtutukdo?

7, 8. Ano an nagkapirang halimbawa nin ipinasabong na makahulang mga paglaladawan na nasa Bibliya?

⁷ Kun dakul na taon ka nang naglilingkod ki Jehova, tibaad naririsa mo an dikit-dikit na pagbabago sa paagi nin pagpaliwanag kan satong mga literatura sa mga istorya sa Bibliya. Paano? Kaidto, mas parating ginagamit kan satong mga literatura an tipiko asin antitipikong paliwanag sa mga istorya sa Kasuratan. An istorya sa Bibliya iyo an tipiko, asin an ano man na makahulang kautuban kan istoryang iyan iyo an antitipiko kaiyan. May maka-Kasuratan daw na basehan an makahulang mga paglaladawan na ini? Igwa. Halimbawa, sinambit ni Jesus an dapit sa ‘tanda ni Jonas na propeta.’ (Basahon an Mateo 12:39, 40.) Ipinaliwanag ni Jesus na an pagdanay ni Jonas sa tulak kan sira nin dikit na panahon—na iyo kutana an magigin lulubngan niya kun dai siya ilinigtas ni Jehova—naglaladawan sa panahon na si Jesus nagdanay sa lulubngan.

⁸ Mababasa sa Bibliya an iba pang ipinasabong na makahulang mga paglaladawan. Tinukar ni Pablo an nagkapira kaiyan. Halimbawa, an relasyon ni Abraham ki Agar asin Sara sarong makahulang paglaladawan sa relasyon ni Jehova sa nasyon nin Israel asin sa langitnon na kabtang kan organisasyon nin Diyos. (Gal. 4:22-26) Kaagid kaiyan, an tabernakulo asin an templo, an Aldaw nin Pagbayad sa Kasalan, an halangkaw na saserdote, asin an ibang aspekto kan Katugunan ni Moises may ‘ipinapanganinong mga marahay na madatong.’ (Heb. 9:23-25; 10:1) Nakakaugma asin nakakapakusog sa pagtubod na pag-adalan an makahulang mga paglaladawan na arog kaiyan. Pero makakapagkongklusyon daw kita na lambang karakter, pangyayari, asin bagay na sinasabi sa Bibliya igwa nin ilinaladawan na tawo o bagay?

9. Paano ipinaliwanag kaidto an istorya kan Bibliya dapit ki Nabot?

⁹ Kaidto, parating ginagamit an siring na paagi nin pagpaliwanag. Halimbawa, pag-isipan an istorya dapit ki Nabot, na bakong makatanusan na binista asin ginadan huli sa pakana kan maraot na si Reyna Jezebel tanganing maagaw kan agom kaining si Ahab an ubasan ni Nabot. (1 Ha. 21:1-16) Kan 1932, ipinaliwanag an istoryang iyan bilang sarong makahulang drama. Sinasabi kaidto na si Ahab asin Jezebel naglaladawan ki Satanas asin sa saiyang organisasyon; si Nabot naglaladawan ki Jesus; kaya an kagadanan ni Nabot makahulang paglaladawan kan paggadan ki Jesus. Pero pakalihis nin pirang dekada, sa librong “Let Your Name Be Sanctified,” na ipinublikar kan 1961, sinabing si Nabot naglaladawan sa mga linahidan, asin si Jezebel naglaladawan sa Kakristiyanuhan. Kaya an pagpersegir ni Jezebel ki Nabot naglaladawan sa pagpersegir sa mga linahidan sa huring mga aldaw. Sa laog nin dakul na taon, nakakapakusog sa pagtubod kan banwaan nin Diyos an arog kaining paagi nin pagpaliwanag sa mga istorya sa Bibliya. Pero, taano ta binago iyan?

10. (a) Paano nakatabang an pakamansay tanganing magin mas maingat an pagpapaliwanag sa sarong istorya sa Bibliya? (b) Sa ano ngunyan mas nagpopokus an satong mga literatura?

¹⁰ Sa pag-agi nin mga taon, arog kan inaasahan niyato, tinatabangan ni Jehova “an maimbod asin mapagmansay na uripon” na magin mas  mapagmansay. Huli sa pakamansay na iyan, nagin mas maingat sinda na sabihon na makahula an sarong istorya sa Bibliya apuwera na sana kun may malinaw na basehan hali sa Kasuratan. Saro pa, narisa man na dakul an nadidipisilan na marhay na sabuton an nagkapira sa haloy nang mga paliwanag dapit sa mga tipiko asin antitipiko. An mga detalye kan siring na pagtutukdo—kun kiisay iyan naglaladawan asin kun taano—nakakaribong asin masakit matandaan saka iaplikar. Pero an mas mahalaga, puwedeng matahuban o mawara an moral asin praktikal na mga leksiyon kan sinisiyasat na istorya sa Bibliya huli sa pag-analisar kan gabos na posibleng antitipikong kautuban kan mga iyan. Kaya maririsa ta na mas nagpopokus ngunyan an satong mga literatura sa simple asin praktikal na mga leksiyon manungod sa pagtubod, pakatagal, diyosnon na debosyon, asin iba pang mahalagang marhay na mga kuwalidad na manunudan ta hali sa mga istorya sa Bibliya. *

11. (a) Paano ta na sinasabot ngunyan an istorya dapit ki Nabot, asin taano ta may manunudan kita gabos sa halimbawa niya? (b) Taano ta bihira nang masambitan an mga tipiko asin antitipiko sa mga publikasyon ta kaining nakaaging mga taon? (Hilingon an “Hapot Hali sa mga Parabasa” sa isyung ini.)

¹¹ Kaya, ano na ngunyan an pakasabot ta sa istorya manungod ki Nabot? Mas malinaw asin mas simple na. An matanos na tawong iyan nagadan, bakong huli ta siya sarong makahulang paglaladawan ki Jesus o sa mga linahidan, kundi huli ta pinagdanay niya an saiyang integridad. Nanindugan siya sa Katugunan ni Jehova sa ibong nin grabeng pag-abuso sa kapangyarihan. (Bil. 36:7; 1 Ha. 21:3) Kaya may manunudan kita sa halimbawa niya huli ta an siisay man sa sato puwedeng mapaatubang sa arog kaiyan na persekusyon. (Basahon an 2 Timoteo 3:12.) Mas madaling masabutan, matandaan, asin maiaplikar kan gabos na Kristiyano an siring na nakakapakusog sa pagtubod na leksiyon.

12. (a) Ano an dai ta maninigong ikongklusyon kun manungod sa mga istorya sa Bibliya? (b) Taano ta igwa kita nin malinaw na paliwanag dawa kan harararom na bagay? (Hilingon an nota sa ibaba.)

¹² Maninigo daw na ikongklusyon ta na praktikal na aplikasyon sana an puwedeng makua sa mga istorya sa Bibliya asin mayo na iyan nin ibang kahulugan? Dai. Posibleng marhay na itukdo kan satong mga publikasyon ngunyan na an sarong bagay nagpapagirumdom sa sato o naglaladawan  sa iba pang bagay. Posibleng marhay na dai na ninda itutukdo an dakul na istorya sa Bibliya sa paagi nin istriktong pagpaliwanag gamit an makahulang mga tipiko asin antitipiko. Halimbawa, tama man na sabihon na an integridad ni Nabot sa ibong nin persekusyon asin kagadanan nagpapagirumdom sa sato kan integridad ni Cristo asin kan saiyang mga linahidan. Pero, nagpapagirumdom man iyan sa sato kan maimbod na paninindugan kan dakul na ‘ibang mga karnero’ kan Kagurangnan. An arog kaiyan kalinaw asin kasimpleng pagkukumparar tanda nin pagtutukdo hali sa Diyos. *

13. Anong mga halimbawa an nagpapahiling na ipinapaliwanag na niyato ngunyan an nagkapira sa mga ilustrasyon ni Jesus sa mas simple asin mas malinaw na paagi?

¹³ Si Jesu-Cristo an pinakanangungurog na Paratukdong nabuhay digdi sa daga. An saro sa mga paborito niyang paagi nin pagtutukdo iyo an paggamit nin mga ilustrasyon. (Mat. 13:34) Nagtatao an mga ilustrasyon nin buhay na buhay na mga paglaladawan na nakakapaisip sa sato asin nakakaabot sa satong puso. Sa pag-agi nin mga taon, ipinapaliwanag man daw nin mas simple asin mas malinaw kan satong mga literatura an mga ilustrasyon ni Jesus? Daing duda na iyo! Bako daw na naugma kitang marhay kan maaraman ta an mas lininaw na pakasabot sa ilustrasyon ni Jesus dapit sa lebadura, sa pisog nin mustasa, asin sa hikot na nasa Hulyo 15, 2008 isyu kan An Torrengbantayan? Malinaw tang nasasabutan ngunyan na an mga ilustrasyon na ini minaaplikar sa Kahadian nin Diyos asin sa pambihirang kapangganahan kaiyan sa pagtipon sa tunay na mga parasunod ni Cristo hali sa maraot na kinaban na ini.

14. (a) Paano ta ipinaliwanag an parabula dapit sa Samaritano na tataong makipagkapwa-tawo? (b) Ano an pakasabot ta ngunyan sa parabula ni Jesus?

¹⁴ Pero, kumusta man an manungod sa mas detalyadong mga istorya, o parabula, na isinaysay ni Jesus? Siyempre an nagkapira kaiyan simboliko asin makahula; an iba nagduduon nin praktikal na mga leksiyon. Pero arin sa mga iyan an simboliko asin arin an bako? Sa pag-agi nin dakul na taon, luway-luway na nagigin mas malinaw an simbag. Halimbawa, pag-isipan kun paano ta ipinaliwanag an parabula ni Jesus dapit sa Samaritano na tataong makipagkapwa-tawo. (Luc. 10:30-37) Kan 1924, sinabi kan The Watch Tower na an Samaritano nagrerepresentar ki Jesus; an pababang dalan hali sa Jerusalem pa-Jerico, naglaladawan sa parurong kamugtakan kan katawuhan puon kan pagrebelde sa Eden; an mga parahabon sa dalan naglaladawan sa darakulang korporasyon asin koraptong mga negosyante; asin an irinerepresentar kan saserdote saka Levita iyo an Kakristiyanuhan. An ilustrasyon na iyan ginagamit ngunyan sa satong mga literatura tanganing ipagirumdom sa gabos na Kristiyano na dapat mayo kitang ipinapaurog kun nagtatabang sa mga nangangaipo, lalo na sa espirituwal na paagi. Bako daw na nauugma kita huling lininaw sa sato ni Jehova an saiyang mga katukduan?

15. Ano an pag-uulayan ta sa masunod na artikulo?

¹⁵ Sa masunod na artikulo, sisiyasaton ta an saro pa sa mga parabula ni Jesus—an dapit sa sampulong daraga. (Mat. 25:1-13) Paano gusto ni Jesus na sabuton kan mga parasunod niya sa huring mga aldaw an mapuwersang ilustrasyon na iyan? Iyan daw bilang detalyado asin makahulang paglaladawan na an kada tawo, bagay, asin pangyayari may simbolikong kahulugan? O imbes, an gusto daw ni Jesus iyo na gamiton iyan kan saiyang mga parasunod bilang mapagkukuanan nin praktikal na mga leksiyon na magiya sa sainda sa huring mga aldaw? Hilingon ta.