Kan Disyembre 2009, sinuportaran kan Korte Suprema kan Rusia an sarong desisyon na nagresulta sa pagpapondo sa aktibidad kan lokal na asosasyon kan mga Saksi ni Jehova sa Taganrog, Rusia, pagkompiskar sa Kingdom Hall, asin pagdeklarar na radikal an 34 sa mga publikasyon ta. Ilinaag sa opisyal na Web site kan Mga Saksi ni Jehova an report dapit sa nakakabiglang pangyayaring ini pati na an mga retrato kan mga Saksing naapektaran kan desisyon, kaiba na an mga aki.

Pakalihis nin pirang bulan, an Administrative Center of Jehovah’s Witnesses in Russia nakaresibi nin kahon asin kan minasunod na surat hale sa sarong pamilyang Saksi sa Queensland, Australia, na nakahiling kan report dapit sa desisyon kan Korte: “Namomotan ming mga Tugang, Nataros an puso kan samuyang mga aki na si Cody asin Larissa huli sa pagtubod asin mga pagbalo na inaagihan kan mga katood niato sa Rusia. Naggibo sinda nin mga kard asin surat, saka nagbugtak kami nin mga regalo sa sadit na kahon na gusto ming ipadara sa mga aki sa Taganrog, tangani sanang ipaaram sainda na sa harayoon na lugar, may ibang mga aki na maimbod man na naglilingkod ki Jehova asin nagmamalasakit sa sainda. Ipinapaabot ninda sa gabos an saindang pangungumusta asin pagkamoot.”

Pakaresibi kan mga regalo, an mga aki sa Taganrog naggiribo nin surat na may mga drowing bilang pasasalamat sa pamilya sa Australia. Huling napahiro kan kapahayagan nin pamparigon sa boot “hale sa ngoso nin mga aki,” sarong Saksi na naglilingkod sa sangang opisina sa Rusia an nagsurat ki Cody asin Larissa: “Naiisip gayod nindo kun gurano kakulog para sa mga aki saka sa darakula na kun sinda pinapadusahan huli sa sarong bagay na dai man ninda ginibo. Mayo man nin ginibong sala an mga tugang ta sa Taganrog, pero an Kingdom Hall ninda kinua. Mamondoon sinda huli kaini. Nakakaparigon sa boot ninda na maaraman na may nagmamalasakit palan sa sainda sa ibong na parte kan kinaban. Salamat sa saindong pagkamoot asin pagigin matinao!”—Sal. 8:2, NW.

Tunay nanggad na kabtang kita nin pambilog na kinaban na kasararoan nin magturugang, asin an pagkaminorootmootan nakakatabang sa sato na makayanan an mga pagbalo asin kadepisilan sa buhay. Mantang pinagdedebatehan sa mga korte kun baga an mga publikasyon kan Mga Saksi ni Jehova nagsusutsut nin pagkaongis, toninong na ipinapahayag kan satong mga aki an pagmalasakit ninda sa kada saro, na dai naoolang kan pagkakalaen nin nasyon asin kultura. Ipinapahiling kaiyan na totoo an sinabi ni Jesus: ‘Huli kaini kamo mamimidbid kan gabos na kamo mga disipulo ko, kun kamo magkaminorootmootan.’—Juan 13:35.