Isinaysay ni Leonard Smith

Kan tin-edyer na ako, duwang teksto sa Biblia an nakapahiro sa sako. Ngonyan, pakalihis nin labing 70 taon, nagigirumdoman ko pa kan masabotan ko nin malinaw an kahulogan kan Zacarias 8:23 na sinasambit an dapit sa ‘sampulong tawo’ na nagkakarapot sa “gayad kan gubing nin Judio.” Sinabi ninda sa Judio: ‘Maiba kami sa saindo, huli ta samuyang nadangog na an Dios yaon dian sa saindo.’

AN NASAMBIT na Judio nagsisimbolisar sa linahidan na mga Kristiano, asin an ‘sampulong lalaki’ nagrerepresentar sa ‘ibang mga karnero’ o “mga Jonadab,” na iyo an apod sa sainda kaidto. * (Juan 10:16) Kan masabotan ko an katotoohan na iyan, narealisar kong an kaotoban kan sakong paglaom na mabuhay nin daing sagkod digdi sa daga nakadependeng marhay sa sakong maimbod na pagsuportar sa grupong linahidan.

Nakapahiro man na marhay sa sako an ilustrasyon ni Jesus dapit sa ‘mga karnero’ asin ‘mga kanding,’ na yaon sa Mateo 25:​31-46. An ‘mga karnero’ naglaladawan sa mga mag-aako nin paborableng paghokom sa panahon kan katapusan huli sa paggibo ninda nin marahay sa linahidan na mga tugang ni Cristo na yaon pa sa daga. Bilang hoben na Jonadab, sinabi ko sa sakong sadiri, ‘Len, kun gusto mong ibilang ka ni Cristo na karnero, kaipuhan mong suportaran an linahidan na mga tugang nia, na inaako an saindang pangengenot huli ta an Dios yaon sa sainda.’ Giniyahan ako kan pakasabot na iyan sa laog nin labing pitong dekada.

‘ANO AN SAKONG KABTANG?’

Nabautismohan an sakong ina kan 1925 sa tiriponan sa Bethel. Iyan inaapod na London Tabernacle asin ginagamit sa mga pagtiripon kan mga tugang sa lugar na iyan. Namundag ako kan Oktubre 15, 1926. Kan Marso 1940, nagpabautismo ako durante kan asamblea sa Dover, sa baybayon nin Inglatera. Namotan ko an katotoohan sa Biblia. Huling si Nanay linahidan na Kristiano, an pinakaenot na nakapotan kong “gayad kan gubing nin Judio,” sabi ngani, iyo an gubing kan sakong ina. Kan panahon na iyan, bako pang lingkod ni Jehova an sakong ama asin matuang tugang na babae. Nakaasosyar kami sa Kongregasyon nin Gillingham sa timog-sirangan na Inglatera, na an kadaklan sa mga tugang linahidan na Kristiano. Si Nanay nagin marahayon na halimbawa nin kaigotan sa paghuhulit.

Kan Setyembre 1941, sa kombension sa siudad nin Leicester, tinokar sa pahayag na may temang “Integridad” an isyu dapit sa unibersal na soberaniya. Nakatabang iyan sa sako na masabotan sa kaenot-enote na kalabot kita sa isyu sa pag-oltanan ni Jehova asin Satanas. Kun siring, kaipuhan na manindogan kita para ki Jehova asin papagdanayon an satong integridad sa saiya bilang an Unibersal na Soberano.

Sa kombension na iyan, idinoon na marhay an pagpapayunir, asin dinagka an mga hoben na gibohon iyan na pasohan. An pahayag na, “An Kabtang kan Payunir sa Organisasyon” nagpaisip sa sako, ‘Ano an  sakong kabtang?’ Huli sa kombension na iyan, nakombensir ako na obligasyon ko bilang Jonadab na gibohon an pinakamakakaya ko na tabangan sa paghuhulit an grupong linahidan. Duman mismo sa Leicester, nag-fill up ako nin aplikasyon sa pagpapayunir.

PAGPAPAYUNIR SA PANAHON NIN GIERA

Kan Disyembre 1, 1941, sa edad na 15, inasignaran ako bilang espesyal payunir. Si Nanay an pinakaenot kong kapartner, alagad pakalihis nin mga sarong taon, kaipuhan na pumondo sia sa pagpayunir huli sa salud. Sa siring, iinasignar ako kan sangang opisina sa London na magin kapartner ni Ron Parkin, na ngonyan naglilingkod sa Komite kan Sangay sa Puerto Rico.

Ipinadara kami sa baybayon na banwaan nin Broadstairs asin Ramsgate sa distrito nin Kent, na duman nag-arkila kami nin kuarto. An allowance kaidto kada bulan nin espesyal payunir 40 shillings (mga $8, U.S. kaidto). Kaya pakabayad mi nin arkila, dikit na sana an natatada sa samo, asin kun beses dai mi aram kun saen mahale an sunod niamong pagkakan. Alagad sa ano man na paagi, pirmeng itinatao ni Jehova an samong mga pangangaipo.

Pirme ming gamit an samong bisikleta, na kargadong marhay, asin sinasabat an makosog na doros hale sa North Sea. Kaipuhan man niamong tioson an pambobomba nin mga eroplano asin an mga missile na German V-1 na minaagi sa Kent tanganing bombahon an London. Sarong beses, mantang nagbibisikleta kinaipuhan kong maglukso pasiring sa kali, kan may bomba na biglang nag-agi sa may itaas kan sakong payo asin suminabog sa kaharaning oma. Dawa siring, maogma an mga taon nin pagpapayunir mi sa Kent.

NAGLINGKOD AKO SA BETHEL

Pirmeng may pag-omaw na sinasambit kan sakong ina an Bethel. “Mayo na akong orog na mamawoton pa kisa makapaglingkod ka sa Bethel,” an sinasabi nia. Kaya imahinara an kagayagayahan asin pagkasorpresa ko kan imbitaran ako kan Enero 1946 na magtabang sa Bethel sa London sa laog nin tolong semana. Pakatapos kan tolong semanang iyan, sinabihan ako ni Pryce Hughes, an branch servant, na magdanay sa Bethel. An pagsasanay dian nakaimpluwensia sa sakong buhay poon kaidto.

Kan panahon na iyan, may mga 30 miembro an pamilyang Bethel sa London, na an kadaklan solterong hoben alagad igwa man nin mga linahidan, kabilang na si Pryce Hughes, Edgar Clay, asin Jack Barr, na nagin miembro kan Namamahalang Grupo. Sarong pribilehio nanggad na suportaran an mga tugang ni Cristo, paagi sa paglilingkod bilang hoben, sa espirituwal na pangangataman kan ibinibilang na ‘mga hariging’ ini!​—⁠Gal. 2:⁠9.

Sarong aldaw sa Bethel, sinabi sa sako nin sarong brother na igwa nin sister sa may atubangan na pinto na gusto akong maheling. Nasorpresa ako kan maheling ko an sakong ina na may darang nakapatos na bagay. Sinabi nia na dai na sia malaog tanganing dai maabala an trabaho ko, alagad itinao nia sa sako an dara nia. May laog iyan na maimbong na halabang dyaket. Sa mamomoton na gibo niang iyan, nagirumdoman ko si Anna na nagdara nin gubing sa saiyang sadit na aking si Samuel mantang naglilingkod ini sa tabernakulo.​—⁠1 Sam. 2:​18, 19.

AN GILEAD​—⁠DAI MALILINGAWAN NA EKSPERYENSIA

Kan 1947, lima sa samo na naglilingkod sa Bethel an inimbitaran sa Paadalan nin Gilead sa Estados Unidos asin kan suminunod na taon, nakaiba kami sa ika-11 klase. Kan mag-abot kami, malipoton sa amihanan  na Nueva York, kun saen yaon an paadalan. Marahay sana ta igwa ako kan maimbong na dyaket na itinao kan sakong ina!

Dai ko malilingawan an anom na bulan ko sa Gilead. An pakikiibaiba sa sakong mga kaklase hale sa 16 na nasyon nagpahiwas kan sakong pananaw. Apuera sa espirituwal na pag-oswag na resulta kan pag-adal, nakinabang man ako sa pakikiiba sa maygurang na mga Kristiano. An saro sa mga kaklase ko, si Lloyd Barry; an saro sa mga instruktor, si Albert Schroeder; asin si John Booth, paraataman sa Kingdom Farm (kun saen yaon an Paadalan nin Gilead), nagin mga miembro kan Namamahalang Grupo pag-abot nin panahon. Pinapahalagahan kong marhay an saindang mamomoton na konseho asin marahayon na halimbawa nin kaimbodan ki Jehova asin sa organisasyon nia.

PANSIRKITONG GIBOHON ASIN PAGBALIK SA BETHEL

Pakatapos kan Gilead, inasignaran ako sa pansirkitong gibohon sa estado nin Ohio, E.U.A. Kaidto, 21 anyos pa sana ako, alagad an entusiasmo ko bilang hoben mamomoton na pinahalagahan kan mga tugang. Dakolon an sakuyang nanodan sa eksperyensiado asin mas may edad na mga lalaki sa sirkitong idto.

Pakalihis nin pira sanang bulan, pinabalik ako sa Bethel sa Brooklyn para sa dugang pang pagsasanay. Kan panahon na iyan, namidbid ko an ibinibilang na mga harigi siring ki Milton Henschel, Karl Klein, Nathan Knorr, T. J. (Bud) Sullivan, asin Lyman Swingle, na gabos nagin miembro kan Namamahalang Grupo. Nakakapakosog na eksperyensia na maheling sindang nagtatrabaho asin maobserbaran an pamumuhay ninda bilang mga Kristiano. Kuminosog nanggad an sakuyang pagtitiwala sa organisasyon ni Jehova. Dangan, pinabalik ako sa Europa tangani na ipadagos duman an sakong paglilingkod.

Nagadan an sakong ina kan Pebrero 1950. Pagkatapos kan lobong, prangka akong nakipag-olay sa sakong ama asin sa tugang kong si Dora. Hinapot ko sinda kun ano an plano ninda dapit sa katotoohan, ngonyan na mayo na si Nanay asin mayo na ako sa harong. Midbid asin iginagalang ninda an gurang nang linahidan na tugang na si Harry Browning, asin nag-oyon sinda na makipag-olay sa saiya dapit sa katotoohan. Sa laog nin sarong taon, nabautismohan si Tatay asin si Dora. Paghaloyhaloy, si Tatay ninombrahan bilang servant sa Kongregasyon nin Gillingham. Pagkagadan ni Tatay, si Dora naagom nin maimbod na elder, si Roy Moreton, asin maimbod na naglingkod ki Jehova sagkod na magadan sia kan 2010.

PAGTABANG SA PRANSIA

Sa pampublikong eskuelahan, nakapag-adal ako nin Pranses, Aleman, saka Latin, asin sa tolong iyan, Pranses an pinakadepisil para sa sako. Kaya laen-laen an namatean ko kan imbitaran akong tumabang sa Bethel sa Paris, Pransia. Duman, nagkapribilehio akong makatrabaho an branch servant na si Henri Geiger, na may edad nang linahidan. Bako pirmeng pasil an asignasyon, asin talagang dakol na beses akong napasala, alagad nakanood akong marhay dapit sa pakikiiba.

Dugang pa, an enot na internasyonal na kombension sa Pransia pakatapos kan giera iinareglong gibohon sa taon 1951, asin kabilang ako sa mga nag-organisar. An hoben na nagbibiaheng paraataman na si Leopold Jontes nag-abot sa Bethel tanganing tabangan ako. Kan huri, ninombrahan siang branch overseer. Ginibo an kombension sa Palais des sports, harani sa Eiffel Tower. Hale sa 28 nasyon an mga delegado. Sa huring aldaw kan kombension, ogmahon an 6,000 na Saksing Pranses na maheling na 10,456 an nag-atender!

 Sa primerong pag-abot ko sa Pransia, maluyahon pa ako sa lenguaheng Pranses. Dangan, nagtataram sana ako kun segurado kong tama an mga terminong Pranses na sasabihon ko, asin iyan orog pang nakaolang asin sala nanggad. Kun dai ka kaya nasasala, dai ka ikakatanos asin dai ka maoswag.

Tangani na masolusyonan an situwasyon, nag-enrol ako sa eskuelahan na nagtotokdo nin Pranses sa mga dayo. Naglalaog ako sa pambangging klase kun mayo nin pagtiripon. Nagustohan ko na an lenguaheng Pranses, asin nag-orog pa iyan sa paglihis nin mga taon. Nagin kapakipakinabang ini huling nakatabang ako sa sangay nin Pransia sa pagtradusir. Pag-abot nin panahon, ako mismo nagin paratradusir kan Ingles sa lenguaheng Pranses. Sarong pribilehio na makatabang na ipaabot sa mga tugang, na nagtataram nin Pranses sa bilog na kinaban, an abundang espirituwal na kakanon na itinatao kan grupong oripon.​—⁠Mat. 24:​45-47.

PAG-AGOM ASIN DUGANG PANG MGA PRIBILEHIO

Kan 1956, pinakasalan ko si Esther, sarong payunir na taga Switzerland na nakamidbid ko pira sanang taon bago kaidto. Ikinasal kami sa Kingdom Hall harani sa Bethel sa London (an dating London Tabernacle, kun saen nabautismohan an sakong ina). Si Brother Hughes an nagtao kan pahayag sa kasal. An ina ni Esther, na may langitnon man na paglaom, presente duman. Sa pag-agom ko, bako sanang nakakaogma asin maimbod na kaibaiba an inako ko, kundi naeksperyensiahan ko man an dakol na oras na mahalagang marhay na pakikiibaiba sa panugangan kong babae na marahayon asin espirituwal an kaisipan, sagkod na matapos nia an saiyang daganon na buhay kan 2000.

Pagkakasal mi, nag-istar kami ni Esther sa luwas kan Bethel. Mantang padagos akong nagtatradusir para sa Bethel, naglilingkod man si Esther bilang espesyal payunir sa lugar na harayo sa sentro kan Paris. Natabangan nia an nagkapira na magin lingkod ni Jehova. Kan 1964, inimbitaran kami na mag-istar sa Bethel. Dangan kan 1976, kan enot na magkaigwa nin mga Komite kan Sangay, ninombrahan ako na magin miembro. Sa nag-aging mga taon, padagos an mamomoton na pagsuportar sa sako ni Esther.

‘DAI NINDO AKO PIRMENG MAKAKAIBANAN’

Sa panapanahon, may pribilehio ako na magduman sa pambilog na kinaban na opisina sa Nueva York. Sa mga pagbisitang idto, marahayon na sadol an inaako ko hale sa laen-laen na miembro kan Namamahalang Grupo. Halimbawa, sarong beses kaidto, kan sabihon ko an paghadit manongod sa deadline nin trabaho, si Brother Knorr naghuyom asin nagsabi: “Dai ka mahadit. Sige lang!” Dakol na beses poon kaidto, kun tambak an trabaho, imbes na mataranta, saro nguna an ginigibo ko, dangan an saro pa, asin natatapos an bilog na trabaho, na kadaklan nasa oras.

Kan madali na siang gadanon, sinabihan ni Jesus an saiyang mga disipulo: ‘Dai nindo ako pirmeng makakaibanan.’ (Mat. 26:​11, NW) Kitang ibang mga karnero, aram man niato na dai ta pirmeng makakaibanan an linahidan na mga tugang ni Cristo digdi sa daga. Kun siring, ibinibilang ko na pambihirang pribilehio na dayupot na makaibanan nin labing 70 taon an dakol sa mga linahidan, na mapagpasalamat akong nagkakapot sa gayad kan gubing nin Judio.

[Nota sa Ibaba]

[Blurb sa pahina 21]

Si Brother Knorr naghuyom asin nagsabi: “Dai ka mahadit. Sige lang!”

[Ritrato sa pahina 19]

(Wala) An sakong ama asin ina

(Too) Sa kampus nin Gilead kan 1948, sulot an maimbong na dyaket na itinao ni Nanay

[Ritrato sa pahina 20]

Pag-interpretar ki Brother Lloyd Barry sa dedikasyon kan sangay sa Pransia, kan 1997

[Ritrato sa pahina 21]

(Wala) Sa kasal mi ni Esther

(Too) Mantang magkaibanan kaming naghuhulit