Naggagayagaya sa Satong Paglaom
Naggagayagaya sa Satong Paglaom
“[Igwa nin] paglaom na buhay na daing katapusan na ipinanuga nin Dios, na dai makakapagputik, kaidto pang haloyon nang panahon.”—TITO 1:2, NW.
BILANG REPASO
Paano niato masasabi na igwa nin kaogmahan sa langit kun an saro sa mga linahidan makapagpadanay kan saiyang integridad sagkod sa kagadanan?
Paano an paglaom kan ibang mga karnero konektado sa paglaom kan mga linahidan?
Tanganing maotob an satong paglaom, anong “banal na pamumuhay” asin mga gibo nin diosnon na debosyon an dapat niatong ipaheling?
1. Paano an paglaom na itinao sa sato ni Jehova makakatabang sa sato na magtagal?
SI Jehova “an Dios [na nagtatao] nin paglaom,” an sabi ni apostol Pablo. Idinugang pa ni Pablo na puedeng gumibo nin paagi si Jehova na ‘mapano kita nin kaogmahan asin katoninongan huli sa pagtubod, tanganing magsopay kita sa paglaom’ paagi sa kapangyarihan kan banal na espiritu. (Roma 15:13) Kun pano kita nin paglaom, matatagalan niato an ano man na situwasyon asin mapagdadanay niato an kagayagayahan asin katoninongan. Para sa linahidan na mga Kristiano saka sa iba pang mga Kristiano, an siring na paglaom magigin “angkla para sa kalag, sierto sagkod marigon.” (Heb. 6:18, 19, NW) An satong paglaom puede niatong pangaptan sa mga panahon nin kadepisilan asin makakatabang sa sato na dai maanod sa pagduda o kawaran nin pagtubod.—Basahon an Hebreo 2:1; 6:11.
2. Ano an duwang paglaom kan mga Kristiano ngonyan, asin taano ta mahalaga para sa ‘ibang mga karnero’ an paglaom kan mga linahidan?
2 An mga Kristiano na nabubuhay sa panahon na ini nin katapusan nakapokus an atension sa saro sa duwang paglaom. An natatadang mga miembro kan “sadit na aripompon” nin linahidan na mga Kristiano igwa kan paglaom na imortal na buhay sa langit, bilang mga hade asin saserdote kaiba ni Cristo sa saiyang Kahadean. (Luc. 12:32, NW; Kap. 5:9, 10) An mas dakol nanggad na “dakulang kadaklan” nin ‘ibang mga karnero’ igwa nin paglaom na mabuhay nin daing sagkod sa paraisong daga bilang mga sakop kan Mesiyanikong Kahadean. (Kap. 7:9, 10; Juan 10:16) Dai noarin man maninigong lingawan kan ‘ibang mga karnero’ na an saindang kaligtasan nakadepende sa aktibo nindang pagsuportar sa linahidan na ‘mga tugang’ ni Cristo na yaon pa sa daga. (Mat. 25:34-40) An mga linahidan tatawan kan saindang balos, asin an ibang mga karnero siertong iyo man. (Basahon an Hebreo 11:39, 40.) Enot, pag-olayan niato an paglaom kan mga linahidan.
AN “BUHÁY NA PAGLAOM” KAN LINAHIDAN NA MGA KRISTIANO
3, 4. Paano an linahidan na mga Kristiano tinatawan nin “bagong pagkamundag” sa “buháy na paglaom,” asin ano an paglaom na iyan?
3 Naggibo si apostol Pedro nin duwang surat sa linahidan na mga Kristiano, na inapod niang ‘mga pinili.’ (1 Ped. 1:1) Nagtao sia nin detalye dapit sa marahayon na paglaom na itinao sa sadit na aripompon. Sa saiyang enot na surat, si Pedro nagsabi: ‘Pag-omawon an Dios asin Ama nin satong Kagurangnan na Jesu-Cristo, na sono sa saiyang dakulang pagkaherak ipinangaki nia kita liwat [“tinawan nia kita nin bagong pagkamundag,” NW] manongod sa buháy na paglaom huli kan pagkabuhay liwat ni Jesu-Cristo sa mga gadan, manongod sa sarong pamana na dai matutunaw, asin daing digta, asin dai napapara. Iyan nakatagama sa langit manongod saindo, na huli kan kapangyarihan nin Dios iniingatan huli sa pagtubod manongod sa kaligtasan na andam na ipahayag sa huring panahon. Dian kamo nag-oogma nin kanigoan.’—1 Ped. 1:3-6.
4 An limitadong bilang nin mga Kristiano na pinili ni Jehova na magin kairiba ni Cristo sa langitnon na Kahadean na gobyerno tinatawan nin “bagong pagkamundag” bilang pinaniaki nin espiritu na mga aki nin Dios. Linalahidan sinda nin banal na espiritu tanganing magin hade asin saserdote kaiba ni Cristo. (Kap. 20:6) Sinabi ni Pedro na paagi sa “bagong pagkamundag” na ini, sinda nagkakaigwa nin “buháy na paglaom,” na inaapod niang ‘pamana na dai natutunaw asin daing digta saka dai napapara’ na nakatagama sa sainda ‘sa langit.’ Bakong makangangalas na an mga linahidan ‘nag-oogma nin kanigoan’ sa saindang buháy na paglaom! Minsan siring, mangyayari sana an paglaom na iyan kun magdadanay sindang maimbod.
5, 6. Taano ta dapat na gibohon kan linahidan na mga Kristiano an bilog nindang makakaya na masegurado an langitnon na pag-apod sa sainda?
5 Sa saiyang ikaduwang surat, sinadol ni Pedro an linahidan na mga Kristiano na gibohon an bilog nindang makakaya, o ‘orog na maghingoa tanganing an pagkaapod asin pagkapili sa sainda masegurado.’ (2 Ped. 1:10) Kaipuhan nindang pagmaigotan na pataluboon an Kristianong mga kualidad arog kan pagtubod, diosnon na debosyon, kapadangatan na sa magturugang, asin pagkamoot. Sinabi ni Pedro: ‘Kun an mga bagay na ini nasa saindo asin nagsosopay, dai kamo magigin hugakon ni daing bunga.’—Basahon an 2 Pedro 1:5-8.
6 Sa saiyang mensahe sa pinaniaki nin espiritu na kamagurangan sa enot na siglong kongregasyon nin Filadelfia sa Asia Minor, an binuhay liwat na si Cristo nagsabi: ‘Huli ta ika nag-otob kan tataramon manongod sa sakong pakatios, ililikay taka man sa oras nin pagbalo, an oras na madatong sa bilog na kinaban, sa pagbalo kan mga nag-eerok sa daga. Ako madatong nin madali. Pugolan mo an nasa saimo na, tanganing dai nin siisay man na makakua kan saimong korona.’ (Kap. 3:10, 11) Kun dai magigin maimbod an sarong linahidan na Kristiano, dai nia aakoon an ‘korona nin kamurawayan na dai mapapara’ na ipinanuga sa mga pinili na magdadanay na maimbod sagkod sa kagadanan.—1 Ped. 5:4; Kap. 2:10.
PAGLAOG SA KAHADEAN
7. Anong marahayon na paglaom an sinambit ni Judas sa saiyang surat?
7 Kan mga 65 C.E., an tugang sa ina ni Jesus na si Judas nagsurat sa saiyang mga kapwa linahidan na Kristiano, na sinambit nia na ‘mga inapod.’ (Jud. 1; ikomparar an Hebreo 3:1.) Gusto kutana niang gumibo nin surat sa sainda na nakasentro sa mamuraway na paglaom nin kaligtasan na pinangangaptan kan “gabos” na Kristianong inapod sa Kahadean nin Dios sa langit. (Jud. 3) Minsan ngani may iba pang importanteng mga bagay na tatawan nia nin atension, sa katapusan kan saiyang halipot na surat, sinambit nia an marahayon na paglaom kan linahidan na mga Kristiano, na sinasabi: ‘Ngonyan, sa saiya na makakaingat saindo sa pagkasingkog, asin makakadara saindo sa atubang kan saiyang kamurawayan na dai nin kaninan sa labi-labing kaogmahan, sa iyo sanang Dios na satong Paraligtas, huli ki Jesu-Cristo na satong Kagurangnan, mapa saiya an kamurawayan, an kahalangkawan, an pagsakop asin an kapangyarihan, bago kan [nakaaging] mga panahon, asin ngonyan, patin sagkod lamang.’—Jud. 24, 25.
8. Kaoyon kan Judas 24, ano an nagpaparisa na igwa nin kaogmahan sa langit kun an saro sa mga linahidan makapagpadanay kan saiyang integridad?
8 Tunay nanggad na mawot kan lambang maimbod na linahidan na Kristiano na maingatan tanganing dai sia masingkog, na minaresulta sa kalaglagan. An saindang basado sa Biblia na paglaom iyo na bubuhayon sinda liwat ni Jesus tanganing magin perpekto na espiritung mga linalang asin umatubang sa presensia nin Dios na may dakulang kagayagayahan. Kun an saro sa mga linahidan magadan na maimbod, seguradong sia ‘bubuhayon na may espirituwal na hawak, sa dai pagkalapa, sa kamurawayan.’ (1 Cor. 15:42-44) Kun igwa nin dakulang ‘kaogmahan sa langit huli sa sarong parakasala na nagsosolsol,’ imahinara an kaogmahan sa langit kun an saro sa mga tugang ni Cristo na pinaniaki nin espiritu makapagpadanay kan saiyang integridad sagkod sa kagadanan. (Luc. 15:7) Si Jehova asin an maimbod na espiritung mga linalang maggagayagaya kaiba an linahidan na sa panahon na iyan maako kan saiyang balos na may ‘labi-labing kaogmahan.’—Basahon an 1 Juan 3:2.
9. Paano masasabing an paglaog sa Kahadean “abundang itatao” sa maimbod na mga linahidan, asin ano an epekto kan paglaom na ini sa mga linahidan na yaon pa sa daga?
9 Kaagid kaiyan, sinabi ni Pedro sa saiyang surat sa linahidan na mga Kristiano na kun seseguradohon ninda an pag-apod sa sainda paagi sa pagigin maimbod, “abundang itatao sa [sainda] an pakalaog sa daing katapusan na kahadean kan satong Kagurangnan asin Paraligtas na si Jesu-Cristo.” (2 Ped. 1:10, 11, NW) An pakalaog sa Kahadean “abundang itatao” sa sainda, na nangangahulogan na malinaw na mababanaag an saindang Kristianong mga kualidad. Puede man iyan mangahulogan nin dakulaon na mga bendisyon para sa mga naghingoa sa paorumbasan para sa buhay. An saindang maimbod na pamumuhay puede nindang girumdomon na may labi-labing kagayagayahan asin pagpasalamat. An paglaom na ini daing duwa-duwa na nagpapakosog sa linahidan na mga Kristiano na yaon pa digdi sa daga na ‘pasarigon an saindang isip para sa padagos na gibohon.’—1 Ped. 1:13, NW.
AN PAGLAOM KAN IBANG MGA KARNERO
10, 11. (a) Ano an paglaom kan ibang mga karnero? (b) Paano an daganon na paglaom konektado ki Cristo asin sa ‘paghahayag kan mga aki nin Dios’?
10 Si apostol Pablo nagsurat dapit sa mamuraway na paglaom kan pinaniaki nin espiritu na ‘mga aki nin Dios’ bilang ‘mga kapwa paramana’ ni Cristo. Dangan sinambit nia an marahayon na paglaom na itinatao ni Jehova sa dai mabilang na ibang mga karnero: ‘An odok na paglaom kan mga linalang [na tawo] naghahalat kan paghahayag kan mga aki nin Dios [mga linahidan]. Huli ta an mga linalang ipinasakop sa kasayangan, bakong sa sadiring boot kaiyan, kundi huli sa nagpasakop kaiyan, sa paglaom na an mga linalang man sana makaligtas man sa kaoripnan nin kalapaan pasiring sa pakaligtas kan kamurawayan kan mga aki nin Dios.’—Roma 8:14-21.
11 Tinawan ni Jehova nin paglaom an katawohan kan manuga sia nin pagkaligtas sa “orihinal na halas,” si Satanas na Diablo, paagi sa ipinanugang “banhi.” (Kap. 12:9, NW; Gen. 3:15) An pangenot na kabtang kan ‘banhing’ iyan iyo si Jesu-Cristo. (Gal. 3:16) Paagi sa saiyang kagadanan asin pagkabuhay liwat, nagtao si Jesus nin marigon na basehan para sa paglaom nin katawohan na makatalingkas sa pagkaoripon sa kasalan asin kagadanan. An pagkaotob kan paglaom na ini konektado sa ‘paghahayag kan mga aki nin Dios.’ An pinamuraway na mga linahidan iyo an sekondaryong kabtang kan “banhi.” ‘Ihahayag’ sinda kun makaibanan na ninda si Cristo sa paglaglag sa maraot na sistema nin mga bagay ni Satanas. (Kap. 2:26, 27) Maresulta ini sa kaligtasan kan ibang mga karnero na maluwas sa dakulang kahorasaan.—Kap. 7:9, 10, 14.
12. Anong marahayon na mga pakinabang an makakamtan kan katawohan huli sa pagkahayag kan mga linahidan?
12 Kaginhawahan nanggad an naghahalat sa mga “linalang” na tawo durante kan Sangribong Taon na Paghade ni Cristo! Sa panahon na iyan, ‘mahahayag’ pa an pinamuraway na ‘mga aki nin Dios’ kun sinda humiro na bilang mga saserdote kaiba ni Cristo, na nagtatabang sa katawohan na kamtan an mga pakinabang kan atang na pantubos ni Jesus. Bilang mga sakop kan langitnon na Kahadean, an mga “linalang” na tawo makakatalingkas na sa mga epekto kan kasalan asin kagadanan. An makinuyog na mga tawo luway-luway na makakatalingkas ‘sa kaoripnan nin kalapaan.’ Kun magdadanay sindang maimbod ki Jehova sa bilog na Milenyo asin sa huring pagbalo na mangyayari sa katapusan kaiyan, permanenteng isusurat an saindang mga ngaran sa “libro nin buhay.” Magkakaigwa sinda kan ‘mamuraway na [katalingkasan] kan mga aki nin Dios.’ (Kap. 20:7, 8, 11, 12) Sarong marahayon nanggad na paglaom!
PAGDANAYON NIATONG BUHÁY AN SATONG PAGLAOM
13. Sa ano nakadepende an satong paglaom, asin noarin mahahayag si Cristo?
13 An duwang ipinasabong na surat ni Pedro may dakulang ikakatabang sa mga linahidan asin sa ibang mga karnero tanganing mapagdanay na buháy an paglaom kan kada grupo. Sinabi nia na an saindang paglaom dai nakadepende sa saindang mga gibo, kundi sa dai na kutana maninigong kabootan ni Jehova. Sia nagsurat: “Magdanay na timbang asin lubos na ibugtak an saindong paglaom sa dai na kutana maninigong kabootan na dadarahon sa saindo sa pagkahayag ni Jesu-Cristo.” (1 Ped. 1:13; nota sa ibaba kan NW) Mahahayag si Cristo kun sia umabot na tanganing tawan nin balos an maimbod na mga parasunod nia asin ipaabot an paghokom ni Jehova sa mga bakong diosnon.—Basahon an 2 Tesalonica 1:6-10.
14, 15. (a) Sa ano niato dapat na ipokus an satong atension tanganing mapagdanay na buháy an satong paglaom? (b) Anong sadol an itinao ni Pedro?
14 Tanganing mapagdanay na buháy an satong paglaom, kaipuhan tang ipokus an satong atension asin isentro an satong buhay sa maabot na aldaw ni Jehova. Maresulta iyan sa pagkalaglag kan presenteng ‘kalangitan,’ o pamamahala nin tawo, asin kan “daga,” an maraot na sosyedad nin tawo asin ‘mga elemento’ kaiyan. Si Pedro nagsurat: ‘Anong pagkatawo an maninigo nindong kaabtan, sa paghalat asin pagmawot nin maigot kan pagdatong kan aldaw nin Dios, na huli kaiyan an kalangitan na maglalaad matutunaw, asin an mga elemento tutunawon kan naglalaad na kalayo’!—2 Ped. 3:10-12.
15 An presenteng ‘kalangitan’ asin “daga” sasalidahan nin ‘bagong kalangitan [gobyernong Kahadean ni Cristo] asin bagong daga [bagong sosyedad sa daga].’ (2 Ped. 3:13) Dangan nagtao si Pedro nin deretso sa puntong sadol dapit sa satong ‘paghalat,’ o pagpapadanay na buháy kan paglaom niato, sa ipinanugang bagong kinaban: ‘Kaya, mga namomotan, mantang kamo naghahalat kan mga bagay na ini, maghingoa kamo nin maigot na makua kamo sa katoninongan, dai nin digta asin dai nin kanawayan sa saiyang pagheling.’—2 Ped. 3:14.
PAGLAKAW KAOYON KAN SATONG PAGLAOM
16, 17. (a) Anong “banal na pamumuhay” asin mga gibo nin diosnon na debosyon an maninigo niatong ipaheling? (b) Paano maootob an satong paglaom?
16 Bako sana na dapat niatong papagdanayon na buháy an satong paglaom, kundi dapat man kitang mamuhay kaoyon kaiyan. Maninigo niatong tawan nin atension kun anong klaseng tawo kita sa espirituwal. Kalabot sa “banal na pamumuhay” an pagpapadanay niato kan satong gawe-gawe na marahay sa tahaw kan mga nasyon paagi sa satong moral na integridad. (2 Ped. 3:11; 1 Ped. 2:12) Dapat man kitang “magkaminorootmootan.” Kaiba dian an paggibo niato kan satong bilog na makakaya na mapagdanay an pagkasararo niato bilang magturugang sa bilog na kinaban, o dawa sa satong lokal na kongregasyon. (Juan 13:35) An mga gibo nin “katanosan,” o diosnon na debosyon, mga gibo na nagpapakosog kan satong relasyon ki Jehova. Kalabot digdi an kalidad kan satong mga pamibi, saka aroaldaw na pagbasa niato kan Biblia, hararom na personal na pag-adal, pampamilyang pagsamba, asin aktibong pakikikabtang sa paghuhulit kan maogmang bareta, o “evangelio nin kahadean.”—Mat. 24:14.
17 Mawot kan lambang saro sa sato na an magin pagkatawo niato iyo an klase na inooyonan asin ililigtas ni Jehova kun ‘tunawon’ na an presenteng maraot na sistema. Sa siring, maeeksperyensiahan niato an pagkaotob kan satong paglaom, an “paglaom na buhay na daing katapusan na ipinanuga nin Dios, na dai makakapagputik, kaidto pang haloyon nang panahon.”—Tito 1:2, NW.
[Mga Hapot Para sa Pag-adal]
[Ritrato sa pahina 22]
An linahidan na mga Kristiano tinatawan nin “bagong pagkamundag” sa “buháy na paglaom”
[Ritrato sa pahina 24]
Papagdanayon na buháy an paglaom kan saindong pamilya
