Dai Magsalingoy sa “mga Bagay na Nasa Hudian”
Dai Magsalingoy sa “mga Bagay na Nasa Hudian”
“Mayo nin tawo na nagkapot sa arado asin nagsalingoy sa mga bagay na nasa hudian an angay sa kahadean nin Dios.”—LUCAS 9:62, NW.
ANO AN ISISIMBAG NINDO?
Taano ta maninigo niatong ‘girumdomon an agom ni Lot’?
Anong tolong bagay an dai niato maninigong pagparaisipon?
Paano kita padagos na makakasabay sa organisasyon ni Jehova?
1. Anong patanid an itinao ni Jesus, asin anong hapot an minalataw?
‘GIRUMDOMA an agom ni Lot.’ (Luc. 17:32) An patanid na ini, na itinao ni Jesu-Cristo haros 2,000 na taon na an nakaagi, orog na mahalaga ngonyan kisa kasuarin man. Alagad ano an boot sabihon ni Jesus sa seryosong patanid na ini? Dai na kaipuhan kan mga kaolay niang Judio an dugang pang paliwanag. Aram ninda an nangyari sa agom ni Lot. Mantang sia asin an saiyang pamilya nagdudulag hale sa Sodoma, sia masinuway na suminalingoy asin nagin hariging asin.—Basahon an Genesis 19:17, 26.
2. Ano an posibleng dahelan kan pagsalingoy kan agom ni Lot, asin ano an resulta kan dai nia pagkuyog?
2 Alagad taano ta nagsalingoy an agom ni Lot? Gusto daw niang maaraman kun ano an nangyayari? Nagsalingoy daw sia huli sa dai pakapaniwala o sa kakulangan nin pagtubod? O iyan daw huling nanghihinayang sia sa gabos na bagay na binayaan nia sa Sodoma? (Luc. 17:31) Ano man an dahelan kan pagsalingoy nia, an dai nia pagkuyog nagresulta sa saiyang kagadanan. Isip-isipa nanggad iyan! Sia nagadan kan iyo man sanang aldaw na nagadan an maraot na mga nag-eerok sa Sodoma asin Gomora. Bakong makangangalas na sinabi ni Jesus: ‘Girumdoma an agom ni Lot’!
3. Paano idinoon ni Jesus na dai kita maninigong magsalingoy sa piguratibong paagi?
3 Nabubuhay man kita sa panahon na mahalagang marhay na dai kita magsalingoy sa piguratibong paagi. Idinoon ni Jesus an puntong ini kan simbagon nia an lalaking naghapot kun puede nguna ining bumalik sa saiyang pamilya tanganing magpaaram bago magin disipulo. Si Jesus nagsabi: “Mayo nin tawo na nagkapot sa arado asin nagsalingoy sa mga bagay na nasa hudian an angay sa kahadean nin Dios.” (Luc. 9:62, NW) Si Jesus daw estriktohon o bakong rasonable sa pagsimbag nia sa paaging ini? Bako, huling aram niang an pakiolay kan lalaking ini sarahotan sana tanganing makadulag sa responsabilidad. Ilinadawan ni Jesus an siring na pagpalimanliman na pagsalingoy sa “mga bagay na nasa hudian.” Kun an nag-aarado magsalingoy sana nin madali o talagang butasan nguna an arado dangan magheling sa likodan, mawawara an saiyang konsentrasyon sa ginigibo nia, asin maaapektaran nanggad an saiyang trabaho.
4. Sa ano kita dapat na magdanay na nakaturuhok?
4 Imbes na magpokus kita sa nakaagi, dapat kitang magdanay na nakaturuhok sa maabot na panahon. Mangnoha kun paano ini malinaw nanggad na sinabi sa Talinhaga 4:25: “Kun manongod sa saimong mga mata, iyan maninigong magheling sa enotan, iyo, an saimong nagliliwanag na mga mata maninigong magheling sa atubangan mo.” (NW)
5. Ano an dahelan niato na dai magsalingoy sa mga bagay na nasa hudian?
5 May marahay kitang dahelan na dai magsalingoy sa mga bagay na nasa hudian. Ano iyan? Ini na an ‘huring mga aldaw.’ (2 Tim. 3:1) Napapaatubang kita ngonyan, bako sana sa kalaglagan nin duwang maraot na siudad, kundi sa kalaglagan kan bilog na sistema nin mga bagay kan kinaban. Ano an matabang sa sato na malikayan an ano man na kaagid kan nangyari sa agom ni Lot? Kaipuhan nguna niatong aramon an mga bagay na nasa hudian niato na tibaad matentaran kitang helingon. (2 Cor. 2:11) Kaya, pag-olayan niato kun ano an mga bagay na iyan asin aramon kun paano niato malilikayan na magpokus sa mga iyan.
AN MARAHAY NA BUHAY KAIDTO
6. Taano ta puedeng masala an memorya niato?
6 An sarong malinaw na peligro iyo an salang pagmansay sa marahay na buhay kaidto. An satong memorya puedeng masala. Tibaad dai ta man tinutuyong nasasabi na kaidto bako man gayong masakit an mga problema ta, mas maogma pa ngani kita, na garo baga mas marahay an kamugtakan ta kaidto na sa totoo bako man talaga. An salang pagparagirumdom na ini puedeng magin dahelan na hanap-hanapon ta an marahay na buhay ta kaidto. Alagad an Biblia nagpapatanid sa sato: ‘[Dai] maghapot, “Tadaw ta mas marahay an mga nakaaging aldaw kisa sa mga aldaw na ini?” Huli ta bakong sa madonong an hapot na iyan.’ (Par. 7:10, An Marahay na Bareta Biblia) Taano ta peligrosong marhay an kaisipan na ini?
7-9. (a) Ano an nangyari sa mga Israelita sa Egipto? (b) Ano an mga dahelan kan mga Israelita na maggayagaya? (c) Taano ta nagpoon na magreklamo asin maggumodgumod an mga Israelita?
7 Isipon nindo an nangyari sa mga Israelita kan panahon ni Moises. Dawa ngani kan primero ibinibilang sindang bisita sa Egipto, kan mayo na si Jose an mga Egipcio ‘nagbugtak sa [mga Israelita] nin mga namomoon sa puersahan na pagtrabaho sa katuyohan na apihon sinda sa saindang pagdara nin magagabat na pasan.’ (Ex. 1:11, NW) Pag-abot nin panahon, an banwaan nin Dios napaatubang sa sarong klase nin paglaglag nin rasa kan magprobar si Faraon na ipagadan an gabos na bagong mundag na omboy na lalaki. (Ex. 1:15, 16, 22) Kun siring, bakong makangangalas na sinabi ni Jehova ki Moises: ‘Naheling kong marhay an kasakitan kan sakuyang banwaan na nasa Egipto, asin dinangog ko an saiyang kurahaw huli sa mga paraoripon sa sainda; [aram] ko an saindang mga kamondoan.’—Ex. 3:7.
8 Naiimahinar mo daw an kagayagayahan kan mga Israelita kan sinda talingkas na naghale sa daga kun saen inoripon sinda? Sa pambihirang paagi, naheling mismo ninda an kapangyarihan ni Jehova kan ipaabot nia an Sampulong Damat sa maabhaw na si Faraon asin sa banwaan kaini. (Basahon an Exodo 6:1, 6, 7.) An totoo, sa katapustapusi bako sanang pinatalingkas kan mga Egipcio an mga Israelita kundi pinirit ninda an mga ini na humale, na tinawan pa an mga ini nin kadakol na bulawan asin plata kaya masasabi na ‘sinamsaman kan banwaan nin Dios an mga taga Egipto.’ (Ex. 12:33-36) Orog pang naggayagaya an mga Israelita kan maheling ninda an pagkalaglag ni Faraon asin kan saiyang mga hukbo sa Dagat na Pula. (Ex. 14:30, 31) Maninigo kutanang nakapakosog sa saindang pagtubod an pakaheling sa maogmang mga pangyayaring idto!
9 Pero, masakit paniwalaan na dai nahaloy pagkatapos kan milagrosong pagkaligtas ninda, nagpoon na magreklamo asin maggumodgumod an mismong mga tawong ini. Huli sa ano? Sa kakanon! Sinda dai nanigoan sa itinao ni Jehova asin nagreklamo: ‘Nakakagirumdom kami kan sira na kinakan niamo duman sa Egipto na dai nin bayad; an mga pipino, asin mga melon asin mga puero, asin mga sibulyas, asin mga bawang! Asin ngonyan an satuyang mga kalag naaalang; mayo nin ibang naheheling an satuyang mga mata kundi manna.’ (Bil. 11:5, 6) Iyo, nagin biribid nanggad an saindang punto de vista—kaya ginusto pa nindang bumalik sa daga kun saen inoripon sinda! (Bil. 14:2-4) An mga Israelita nagsalingoy sa mga bagay na nasa hudian asin nawara ninda an pabor ni Jehova.—Bil. 11:10.
10. Anong leksion an itinatao sa sato kan halimbawa kan mga Israelita?
10 Ano an leksion sa sato ngonyan? Kun napapaatubang sa mga kadepisilan asin problema, dai niato pagparaisipon an garo baga marahay na mga bagay kan nakaagi—tibaad dawa kaidtong bago pa niato naaraman an katotoohan. Minsan ngani bako man sala na horophoropon an mga leksion na nanodan niato sa nakaaging mga eksperyensia o girumdomon an maogmang mga pangyayari kaidto, kaipuhan tang papagdanayon an balanse asin realistikong pagmansay sa nakaagi. Ta kun dai, tibaad lalo sana kitang dai makontento sa presenteng kamugtakan niato asin matentaran na bumalik sa dating pamumuhay niato.—Basahon an 2 Pedro 2:20-22.
MGA SAKRIPISYO KAN NAKAAGI
11. Paano minamansay nin nagkapira an mga isinakripisyo ninda kan nakaagi?
11 Makamomondo, ginigirumdom nin nagkapira an mga isinakripisyo ninda kan nakaagi asin minamansay ninda iyan na nasayang na mga oportunidad. Tibaad may mga oportunidad ka kutana kaidto na magkaigwa nin halangkaw na edukasyon, magin prominente, o magkaigwa nin pinansial na seguridad, alagad nagdesisyon ka na dai na idagos iyan. Dakol sa mga tugang niato an dating may dakulang ginaganar sa negosyo, aling-alingan, edukasyon, o isport, alagad binayaan ninda iyan. Uminagi na an panahon, alagad dai pa nag-aabot an katapusan. Iniimahinar mo daw kun ano kutana an naabot mo kun dai mo isinakripisyo an mga iyan?
12. Ano an saboot ni Pablo sa mga bagay na binayaan nia?
12 Dakula an isinakripisyo ni apostol Pablo tangani na magin parasunod ni Cristo. (Fil. 3:4-6) Ano an saboot nia sa mga bagay na saiyang binayaan? Sinasabi nia sa sato: ‘An mga bagay na pakinabang manongod sa sako, ibinilang ko an mga iyan na [kawaran] dahel ki Cristo.’ Taano? Ipinadagos nia: ‘Ibinilang ko an gabos na bagay na siring sa [kawaran] huli kan kalangkawan kan pakamidbid ko ki Cristo Jesus, na sakong kagurangnan. Dahel sa saiya tinios ko an pagkawara kan gabos na bagay, asin ibinilang ko iyan na tapok, tanganing makamtan ko an Cristo.’ * (Fil. 3:7, 8) Kun paanong an sarong tawo na magtatapok nin basura, o ati, sa huri dai magbabasol huli sa nawara sa saiya, si Pablo dai nagbasol sa ano man na sekular na mga oportunidad na binayaan nia. Dai na nia inisip na may pakinabang pa iyan.
13, 14. Paano niato maaarog an halimbawa ni Pablo?
13 Ano an makakatabang sa sato kun pigpaparaisip na niato an garo baga nasayang na mga oportunidad? Arogon an halimbawa ni Pablo. Paano? Isipon mo an halaga kan yaon sa saimo ngonyan. Igwa ka na nin mahalagang marhay na relasyon ki Jehova asin rekord nin kaimbodan sa saiya. (Heb. 6:10) Igwa daw nin ano man na ikakataong materyal na mga bentaha an kinaban na ini na makakapantay sa espirituwal na mga bendisyon na nakakamtan niato ngonyan asin makakamtan pa sa maabot na panahon?—Basahon an Marcos 10:28-30.
14 Sunod na sinambit ni Pablo an sarong bagay na makakatabang sa sato na magpadagos na maimbod. Sinabi nia na ‘linilingawan nia an mga bagay na nasa hudian, asin dinadagos [“inaabot,” NW] an mga bagay na nasa enotan.’ (Fil. 3:13) Mangnohon na idinoon ni Pablo an duwang lakdang, na parehong kaipuhan. Enot, kaipuhan na lingawan niato an mga bagay na sato nang binayaan, na dai sinasayang an mahalagang marhay na kosog asin panahon huli sa sobrang pagparaisip kaiyan. Ikaduwa, siring sa paradalagan na harani na sa finish line, kaipuhan tang umabante, na danay na nakakonsentrar sa mga bagay na nasa enotan.
15. Anong pakinabang an makukua niato kun hinohorophorop niato an halimbawa kan maimbod na mga lingkod nin Dios?
15 Kun hinohorophorop niato an halimbawa kan maimbod na mga lingkod nin Dios—kan suanoy man o sa presente—lalo kitang mamomotibar na padagos na umabante imbes na magsalingoy sa mga bagay na nasa hudian. Halimbawa, kun pigparagirumdom ni Abraham asin Sara an Ur, “makakapuli kutana sinda.” (Heb. 11:13-15) Alagad dai sinda nagbalik. Mas dakol an binayaan ni Moises kan enot niang paghale sa Egipto kisa sa binayaan nin siisay man na ibang indibiduwal na Israelita kan huri. Pero, mayo nin rekord na hinanap-hanap nia an mga bagay na idto. Imbes, sinasabi sa sato kan Biblia na ‘ibinilang nia an mga pag-olog-olog ki Cristo na orog pang kayamanan kisa sa mga kayamanan kan Egipto; huli ta sia nagtanaw kan katimbang na balos.’—Heb. 11:26.
NEGATIBONG MGA EKSPERYENSIA KAN NAKAAGI
16. Paano kita puedeng maapektaran nin mga eksperyensia kan nakaagi?
16 Pero, bakong gabos na eksperyensia kan nakaagi positibo. Tibaad pirme kitang napupurisaw huli sa nagibo niatong mga kasalan asin sala kan nakaagi. (Sal. 51:3) Tibaad namamatean ta pa man giraray an kolog kan mapuersang konseho sa sato. (Heb. 12:11) Tibaad pirme niatong naiisip an mga inhustisya—totoo man iyan o pinaghohona sana. (Sal. 55:2) Ano an makakatabang sa sato na dai na pagparaisipon an mga eksperyensiang iyan? Pag-olayan niato an tolong halimbawa.
17. (a) Taano ta ilinadawan ni apostol Pablo an saiyang sadiri na “sadit sa orog kasadit sa gabos na banal”? (b) Ano an nakatabang ki Pablo na dai mapurisaw huli sa negatibong mga kaisipan?
17 Nakaaging mga sala. Ilinadawan ni apostol Pablo an saiyang sadiri na “sadit sa orog kasadit sa gabos na banal.” (Efe. 3:8) Taano ta siring kaiyan an namate nia? “Huli ta pinersegir ko an kongregasyon nin Dios,” an sabi nia. (1 Cor. 15:9, NW) Naiimahinar daw nindo kun ano an seguradong namatean ni Pablo kan makaatubang nia an nagkapira sa mga pinersegir nia kaidto? Minsan siring, imbes na togotan an negatibong mga kaisipan na ini na makapurisaw sa saiya, nagpokus si Pablo sa dai na kutana maninigong kabootan na ipinaheling sa saiya. (1 Tim. 1:12-16) Bilang resulta, nagin mapagpasalamat sia, asin nakamotibar ini sa saiya na magpadagos sa ministeryo. An makasalan na gawe-gawe kaidto ni Pablo kaiba sa mga bagay na determinado niang lingawan. Kun kita man mapokus sa pagkaherak sa sato ni Jehova, malilikayan niatong maubos an satong kosog huli sa sobrang pagparahadit sa mga nangyari kan nakaagi na dai na man niato mababago. An satong kosog magagamit niato sa presenteng gibohon niato.
18. (a) Ano an puedeng mangyari kun negatibo niatong ginigirumdom an konseho sa sato kaidto? (b) Paano niato masusunod an mga tataramon ni Salomon dapit sa pag-ako nin konseho?
18 Makolog na konseho. Paano kun ginigirumdom niato na may paghinanakit an konseho sa sato kaidto? Tibaad bako sanang nakakakolog iyan kundi ‘nakakapangluya’ man. (Heb. 12:5) Baga man ‘binasangbasang’ niato an konseho huling habo niato kaiyan o ‘nangluya’ kita huling inako niato iyan alagad dai man iyan iinaplikar, pareho an resulta—dai talaga niato tinotogotan na makinabang kita sa konseho asin mapakarhay kita kaiyan. Mas marahay nanggad na sunodon an mga tataramon ni Salomon: “Mangapot ka sa disiplina; dai mo iyan pagbutasan. Ingatan mo iyan, huli ta iyan mismo an saimong buhay.” (Tal. 4:13, NW) Arog nin drayber na nagkukuyog sa mga karatula sa tinampo, akoon niato an konseho, iaplikar iyan, dangan umabante.—Tal. 4:26, 27; basahon an Hebreo 12:12, 13.
19. Paano niato maaarog an pagtubod ni Habacuc asin Jeremias?
19 Mga inhustisya o pinaghohona sanang mga inhustisya. Kun beses, tibaad namamatean niato an siring kan namatean ni propeta Habacuc, na nag-agrangay ki Jehova para sa hustisya, huling dai nia nasasabotan kun taano ta tinotogotan ni Jehova na mangyari an bakong makatanosan na mga bagay. (Hab. 1:2, 3) Mahalaga nanggad na arogon niato an pagtubod kan propetang iyan, na nagsabi: ‘Alagad, mag-oogma ako ki Jehova, asin maggagayagaya ako sa Dios nin sakuyang kaligtasan.’ (Hab. 3:18) Arog ni Jeremias kan suanoy na panahon, kun padagos kitang ‘maglalaom’ o magkakaigwa nin mapaghalat na kaisipan na may lubos na pagtubod ki Jehova, an Dios nin hustisya, makakapagtiwala kita na an gabos na bagay itatanos sa tamang panahon.—Lam. 3:19-24.
20. Paano niato mapapatunayan na ‘ginigirumdom niato an agom ni Lot’?
20 Nabubuhay kita sa interesanteng mga panahon. Pambihirang mga pangyayari an naheheling ngonyan asin dakol pa an madali nang mangyari. Logod na an lambang saro sa sato padagos na makisabay sa organisasyon ni Jehova. Himateon niato an sono sa Kasuratan na konseho na humeling sa enotan asin dai magsalingoy sa mga bagay na nasa hudian. Paagi kaiyan, mapapatunayan niato na talagang ‘ginigirumdom niato an agom ni Lot’!
[Nota sa Ibaba]
^ par. 12 An orihinal na termino digdi na trinadusir na “tapok” nangangahulogan man na “itinapok sa mga ayam,” “odo,” o “ati.” Sarong iskolar sa Biblia an nagkomento na an paggamit ni Pablo kan terminong ini nagpaparisa nin “desididong pagtalikod sa sarong bagay na daing kamanungdanan asin makasusurang nin makuri na dai na papakiaraman nin saro.”
[Mga Hapot Para sa Pag-adal]
