Dumalagan na May Pakatagal sa Paorumbasan

“Dumalagan kita sa pakatios [“na may pakatagal,” NW] dian sa paorombasan na nasa atubang ta.”—HEB. 12:1.

1, 2. Sa ano ikinomparar ni Pablo an Kristianong pamumuhay?

KADA taon, may ginigibong maraton sa dakol na lugar. An sinasabing pinakamatitibay na paradalagan nagbabali o nag-eentra sa paorumbasan na may sarong katuyohan—an manggana. Alagad bakong arog kaiyan kalangkaw an katuyohan kan kadaklan na iba pang nagbabali. Para sa sainda, mag-oorgolyo na sinda dawa matapos sana an paorumbasan.

² Sa Biblia, an Kristianong pamumuhay ikinokomparar sa sarong paorumbasan. Sinambit ni Pablo an puntong ini sa enot na surat nia sa mga kapwa Kristiano sa suanoy na Corinto. Sia nagsurat: “Dai kamo nakakaaram na sa gabos na nagdadalagan sa paorombasan, saro sana an minaako kan premio? Siring man dumalagan kamo; tagñaning kamo magkamit.”—1 Cor. 9:24.

3. Taano ta sinambit ni Pablo na saro sanang paradalagan an nanggagana?

³ An boot sabihon daw ni Pablo saro sana sa mga Kristianong idto an magkakamit kan premyong buhay asin an gabos na iba pa madalagan nin sayang sana? Siempre dai! An mga paradalagan sa kompetisyon sigidong nagsasanay asin naghihingoa na may pasohan na manggana. Boot ni Pablo na an mga kapwa Kristiano maghingoa nin arog kaiyan sa pagmamaigot ninda na magkamit nin buhay na daing katapusan. Sa paggibo kaiyan, makakalaom sinda na magkamit kan premyong buhay. Iyo, sa Kristianong paorumbasan, an gabos na makakatapos magkakamit kan premyong iyan.

4. Ano an kaipuhan tang isaisip mapadapit sa paorumbasan niato?

⁴ Huli sa mga tataramon na iyan, an gabos na nakiayon ngonyan sa paorumbasan para sa buhay napaparigon an boot, pero napapaisip nin hararom. Taano? Huli ta daing kaagid an premyo—baga man buhay sa langit o sa Paraiso. Totoo, an paorumbasan halawig asin masakit; dakol an olang, disturbo, asin peligro sa dalan. (Mat. 7:13, 14) Makamomondo na an nagkapira nagluwayluway, nagpondo, o natumba pa ngani sa dalan. Anong mga litag asin peligro an yaon sa paorumbasan para sa buhay? Pano nindo malilikayan iyan? Ano an magigibo nindo tanganing matapos an paorumbasan na iyan asin sa siring manggana?

Kaipuhan an Pakatagal Tanganing Manggana

5. Sa Hebreo 12:1, ano an sinabi ni Pablo dapit sa paorumbasan?

⁵ Sa surat ni Pablo sa Hebreong mga Kristiano sa Jerusalem asin Judea, nasambitan giraray nia an mga aspekto nin pang-atletang mga kawat o paorumbasan. (Basahon an Hebreo 12:1.) Sinambit nia bako sana an dahelan sa pagbali sa paorumbasan kundi pati an dapat na gibohon nin saro tanganing manggana. Bago niato siyasaton an ipinasabong na sadol ni Pablo sa Hebreong mga Kristiano tanganing maaraman kun anong mga leksion an makukua niato dian, pag-olayan niato kun ano an nagpahiro ki Pablo na isurat iyan asin kun ano an pinagmamaigotan niang ipagibo sa mga nagbabasa kan surat nia.

6. Anong panggigipit sa mga Kristiano an ginibo kan mga namomoon sa relihion?

⁶ An mga Kristiano kan enot na siglo, nangorogna an mga taga Jerusalem asin Judea, napaatubang sa dakol na pagbalo asin kasakitan. Grabe an panggigipit sa sainda kan Judiong mga namomoon sa relihion, na dakula pa man giraray an impluwensia sa mga tawo. Haros tolong dekada bago kaiyan, nagin mapanggana an mga namomoon na ini na kondenaron si Jesu-Cristo bilang sedisyonista asin ipagadan bilang kriminal. Asin determinado  sindang ipadagos an pagkontra ninda. Sa libro nin Guibo, dakol kitang mababasa na pagpatakot asin pagsalakay ninda sa mga Kristiano, haros pakatapos tolos kan milagrosong mga pangyayari kan Pentecostes 33 C.E. Ini siertong nagpadepisil sa buhay kan mga maimbod.—Gui. 4:1-3; 5:17, 18; 6:8-12; 7:59; 8:1, 3.

7. Sa anong delikadong mga panahon nabuhay an mga Kristianong sinuratan ni Pablo?

⁷ An mga Kristianong idto nabuhay man sa panahon na naghihinanapos na an Judiong sistema nin mga bagay. Sinabi sa sainda ni Jesus an manongod sa paglaglag sa bakong maimbod na nasyon nin mga Judio. Sinabi man nia sa saiyang mga parasunod an mga mangyayari kun harani na an katapusan, na tinatawan sinda nin espesipikong instruksion kun ano an dapat gibohon tanganing makaligtas. (Basahon an Lucas 21:20-22.) Kun siring, ano an gigibohon ninda? Si Jesus nagpatanid: “Magigñat kamo sa saindo man sana, tagñaning an saindong magña puso, dai magñanaan nin magña kapasloan asin kaburatan, asin nin magña paghadit sa buhay na ini, asin an aldao na iyan dumatong sa saindo siring sa sarong siod.”—Luc. 21:34.

8. Ano an tibaad nagin dahelan kan pagluwayluway o pagpondo nin nagkapirang Kristiano?

⁸ Kan magsurat si Pablo sa mga Hebreo, haros 30 taon na an nakaagi poon kan itao ni Jesus an patanid na iyan. Paano an paglihis nin panahon nakaapektar sa mga Kristianong idto? An nagkapira nadaog nin mga panggigipit asin kahaditan sa aroaldaw na buhay kaya dai sinda nag-oswag sa espirituwal, na iyo kutana an nakapakosog sa sainda. (Heb. 5:11-14) Minalataw na an paghona nin iba magigin mas madali nanggad para sa sainda kun susunodon na sana ninda an kadaklan sa mga Judio na nasa palibot ninda. Total, an mga Judiong idto dai pa man lubos na nagbaya sa Dios; minsan paano nagsusunod pa man giraray sinda sa Ley. An ibang mga Kristiano nakombensir o tinakot nin mga indibiduwal sa kongregasyon na nag-iinsistir na danay na sunodon an Ley ni Moises asin an tradisyon. Ano an puedeng sabihon ni Pablo na makakatabang sa Kristianong mga tugang nia na magdanay na alisto sa espirituwal asin magtagal sa paorumbasan?

9, 10. (a) Anong pamparigon sa boot na itinao ni Pablo an mababasa niato sa pagtatapos kan Hebreo kapitulo 10? (b) Taano ta nagsurat si Pablo dapit sa maimbod na mga gibo kan suanoy na mga saksi?

⁹ Interesante nanggad na mangnohon kun paano hiningoa ni Pablo, paagi sa pagpasabong nin Dios, na pakosogon an Hebreong mga Kristiano. Sa kapitulo 10 kan surat ni Pablo, sinabi nia na an Ley “anino [sana] kan magña karahayan na madatong” asin malinaw niang ipinaheling an halaga kan atang na pantubos ni Cristo. Sa pagtatapos kan kapitulong iyan, sinadol nia an mga nagbabasa kan surat nia: “Kamo nagñagñaipo nin pakatios, tagñaning, pakaguibo nindo kan boot nin Dios, kamo omako kan panuga. Huli ta sa kadikit pang panahon, an madatong madatong, asin dai magaabala.”—Heb. 10:1, 36, 37.

¹⁰ Sa Hebreo kapitulo 11, ekspertong ipinaliwanag ni Pablo kun ano an boot sabihon kan tunay na pagtubod sa Dios. Asin iinilustrar nia iyan paagi sa mga halimbawa kaidtong panahon nin mga lalaki asin babae na may pagtubod. Iyan daw dai kinakaipuhan na pagrayo sa tema? Dai man. Aram kan apostol na kaipuhan marealisar kan mga kapwa parasamba na an pagtubod dapat na may kaibang kosog nin boot asin pakatagal. An marahayon na halimbawa na itinao kan maimbod na mga lingkod ni Jehova kaidto makakapakosog sa mga Hebreo na makayanan an mga pagbalo asin kasakitan na napapaatubang sa sainda. Sa siring, pagkatapos na sarosaroon an mga gibo nin pagtubod kan maimbod na mga lingkod kan nakaagi, si Pablo nakapagsabi: “Huling kita nalilibotan nin siring kadakulang pagñanoron nin magña saksi, pabayaan ta man an gabos na kagabatan, asin an kasalan na masayon na makakabit [“madaling nakakasabod,” NW] sato, asin dumalagan kita sa pakatios [“na may pakatagal,” NW] dian sa paorombasan na nasa atubang ta.”—Heb. 12:1.

Sarong “Pagñanoron nin Magña Saksi”

11. Ano an puedeng magin epekto sa sato kan pagsaisip sa “[dakulang] pagñanoron nin magña saksi”?

¹¹ An “[dakulang] pagñanoron nin magña saksi” bakong basta mga nagheheling o miron, sabi ngani, na yaon sana tanganing magdalan kan paorumbasan o maheling kun paano manggana an  saindang paboritong atleta o team. Imbes, sinda mga partisipante, na puedeng iagid sa mga paradalagan sa paorumbasan. Asin sinda nagin mapanggana sa pagdalagan sa paorumbasan asin natapos iyan. Minsan ngani sinda gadan na, puede sindang ikomparar sa eksperyensiadong mga paradalagan na makakapakosog sa bagohan na mga paradalagan sa paorumbasan. Imahinara kun ano an mamamatean nin paradalagan kun aram nia na an nasa palibot nia, o nagheheling sa saiya, iyo an nagkapira sa pinakamatitibay na paradalagan. Bako daw na mapapahiro siang gibohon an pinakamakakaya nia o orog pa ngani dian? An mga saksing idto kan suanoy makakatao nin testimonya na puedeng manggana sa siring na piguratibong paorumbasan gurano man kadepisil iyan. Sa siring, paagi sa danay na pagsaisip kan halimbawa kan “pagñanoron nin magña saksi,” an Hebreong mga Kristiano kan enot na siglo mapapakosog an boot asin ‘makakadalagan na may pakatagal sa paorumbasan’—arog man niato ngonyan.

12. Taano ta mahalagang isip-isipon niato an mga halimbawang sinambit ni Pablo?

¹² Kaagid sa sato an kamugtakan kan dakol sa maimbod na mga lingkod na nasambitan ni Pablo. Halimbawa, nabuhay si Noe kaidtong harani na an katapusan kan kinaban bago kan Baha. Kita nabubuhay sa panahon na harani na an katapusan kan presenteng sistema nin mga bagay. Si Abraham asin Sara pinagbotan na bayaan an saindang dagang tinuboan tanganing suportaran an tunay na pagsamba asin halaton an kaotoban kan panuga ni Jehova. Sinasadol kita na paindahan an satong sadiri tanganing magkamit kan pag-oyon ni Jehova asin mga bendisyon na itatao nia sa sato. Si Moises nagbaklay sa makatatakot na kaawagan, pasiring sa Dagang Panuga. Kita garo man sana nagbabaklay sa naghihingagdan na sistemang ini nin mga bagay, pasiring sa ipinanugang bagong kinaban. Talagang maninigo tang isip-isipon an mga inagihan kan mga tawong ini, an saindang mga kapangganahan asin pagkasudya, saka an saindang mga kakosogan asin kaluyahan.—Roma 15:4; 1 Cor. 10:11.

Sinda Nagin Mapanggana—Paano?

13. Anong mga kadepisilan an napaatubang ki Noe, asin ano an nakatabang sa saiya na mapangganahan iyan?

¹³ Ano an nakatabang sa mga lingkod na ini ni Jehova na makatagal asin manggana sa paorumbasan? Mangnoha an isinurat ni Pablo manongod ki Noe. (Basahon an Hebreo 11:7.) An “dakulaon na oran nin katubigan sa daga, [na matunaw] kan gabos na laman,” sarong bagay na ‘dai pa naheling’ ni Noe. (Gen. 6:17) Iyan dai pa noarin man nangyari kaidto, na biyong daing kaagid. Pero, dai inisip ni Noe na iyan imposible o harayo pa nganing mangyari. Taano? Huling nagtutubod sia na ano man an sabihon ni Jehova, gigibohon Nia. Dai inisip ni Noe na depisilon an ipinapagibo sa saiya. Imbes, “siring [“nanggad,” NW] an guinibo” nia. (Gen. 6:22) Kun iisipon an gabos na kaipuhan gibohon ni Noe—an pagtogdok kan arka, pagtipon sa mga hayop, pag-istak nin kakanon sa arka para sa mga tawo asin hayop, paghuhulit nin nagpapatanid na mensahe, saka pagpapadanay na makosog an espirituwalidad kan pamilya nia—bako “nanggad” pasil gibohon iyan. Pero, an pagtubod asin pakatagal ni Noe nagbunga nin buhay asin mga bendisyon para sa saiya asin sa pamilya nia.

14. Anong mga pagbalo an tinagalan ni Abraham asin Sara, na nagtatao nin anong leksion para sa sato?

¹⁴ Si Abraham asin Sara an sunod sa lista ni Pablo kan “[dakulang] pagñanoron nin magña saksi” na ‘nakapalibot sa sato’ [NW]. (Heb. 12:1) Binayaan ninda an saindang napagkatodan na pamumuhay sa Ur, asin garo baga mayong kasegurohan an puturo ninda. Sinda nagin mga halimbawa nin marigon na pagtubod asin pagkuyog sa masakit na mga panahon. Huli sa gabos na andam na isakripisyo ni Abraham para sa tunay na pagsamba, sia angay nanggad na inapod na “ama nin gabos na minatubod.” (Roma 4:11) Huling an mga nagbabasa kan surat ni Pablo pamilyar na marhay sa mga detalye kan buhay ni Abraham, tinokar sana nia an tampok na mga kabtang kaiyan. Minsan siring, mapuersa an leksion na itinao ni Pablo: “Ini gabos [kaiba si Abraham asin an pamilya nia] nagkagaradan sa pagtubod, na dai nagkamit kan magña panuga, alagad pakahiling asin pakatanao ninda kaiyan sa harayo, asin pakapagpatotoo ninda  na sinda magña parapakihimanua asin magña parabaklay sa kinaban.” (Heb. 11:13) Malinaw nanggad na an saindang pagtubod sa Dios asin personal na relasyon sa saiya nakatabang sa sainda na dumalagan na may pakatagal sa paorumbasan.

15. Ano an nagmotibar ki Moises na makapamuhay oyon sa pinagmarahay nia?

¹⁵ Si Moises saro pang arogan na lingkod ni Jehova na kabilang sa “pagñanoron nin magña saksi.” Binayaan ni Moises an maoswag asin komportableng pamumuhay, “na pinagmarahay nia na makidamay na pasakitan sa kaibahan kan banuaan nin Dios.” Ano an nagmotibar sa saiya na gibohon iyan? Si Pablo nagsimbag: “Sia nagtanao kan katimbang na balos. . . . Sia nagtagal siring sa nakakahiling kaidtong dai nahihiling.” (Basahon an Hebreo 11:24-27.) Si Moises dai nalingling kan “kaogmahan nin kasalan sa kadikit na panahon.” Para ki Moises, totoo nanggad an Dios asin an mga panuga Nia, kaya nagpaheling sia nin pambihirang kosog nin boot asin pakatagal. Matiaga siang naghingoa na pangenotan an mga Israelita paluwas sa Egipto pasiring sa Dagang Panuga.

16. Taano ta dai nadesganar si Moises kan dai togotan na makalaog sa Dagang Panuga?

¹⁶ Arog ni Abraham, nagadan si Moises na dai naeksperyensiahan an kaotoban kan panuga nin Dios. Kan palaog na an mga Israelita sa Dagang Panuga, sinabihan si Moises: “Mahihiling mo sa atubagñan mo an daga; alagad dai ka duman makakalaog, sa daga na itinatao ko sa magña aki ni Israel.” An dahelan iyo na bago kaini, huling nauyam sinda ni Aaron sa rebelyosong banwaan, ‘nagkasala sinda tumang sa Dios sa tahaw kan mga aki ni Israel duman sa mga tubig sa Meribala [“Meriba,” NW].’ (Deut. 32:51, 52) Nadesganar daw o naghinanakit si Moises? Dai. Nagpahayag sia nin bendisyon sa banwaan asin ini an sinabi bilang kongklusyon: “Paladan ka, oh Israel, siisay an siring sa saimo, banuaan na ilinigtas ni Jehova, kalasag nin saimong pagsorog, asin hamo [“espada,” NW] nin saimong kahalangkauan?”—Deut. 33:29.

 Mga Leksion Para sa Sato

17, 18. (a) Kun mapadapit sa paorumbasan niato para sa buhay, ano an manonodan niato sa “pagñanoron nin magña saksi”? (b) Ano an pag-oolayan sa sunod na artikulo?

¹⁷ Sa pagrepaso niato kan buhay nin nagkapira sa minakompuesto sa “[dakulang] pagñanoron nin magña saksi” na ‘nakapalibot sa sato’ nanodan niato nin malinaw na tanganing matapos niato an paorumbasan, dapat kitang magkaigwa nin bilog na pagtubod sa Dios asin sa mga panuga nia. (Heb. 11:6) An pagtubod dai puedeng sekondaryo sana sa satong buhay; dapat na iyan an pangenot. Bakong arog kan mga mayong pagtubod, lampas pa sa presente an naheheling kan mga lingkod ni Jehova. Naheheling niato an Saro na “dai nahihiling” asin sa siring makakadalagan na may pakatagal sa paorumbasan.—2 Cor. 5:7.

¹⁸ Bakong pasil an Kristianong paorumbasan. Minsan siring, posible para sa sato na mapangganang matapos iyan. Sa sunod na artikulo, pag-oolayan niato kun ano pa an makakatabang sa sato.

Ikakapaliwanag daw Nindo?

• Taano ta harohalaba an isinurat ni Pablo manongod sa suanoy na maimbod na mga saksi?

• Paano an pag-imahinar sa “[dakulang] pagñanoron nin magña saksi” na ‘nakapalibot sa sato’ makakadagka sa sato na magdalagan na may pakatagal?

• Ano an nanodan nindo sa pag-estudyar sa maimbod na mga saksi arog baga ni Noe, Abraham, Sara, asin Moises?

[Mga Hapot Para sa Pag-adal]

[Ritrato sa pahina 19]

Andam si Abraham asin Sara na bayaan an komportableng pamumuhay sa Ur