“Pastoran Nindo an Aripompon nin Dios na Nasa Saindong Pangangataman”

“Pastoran nindo an aripompon nin Dios na nasa saindong pangangataman, bakong dahel sa napipiritan, kundi gikan sa boot.”—1 PED. 5:2.

1. Sa anong mga kamugtakan napapaatubang kaidto an mga Kristiano kan gibohon ni Pedro an enot niang surat?

KAIDTONG bago ponan ni Nero an pagpersegir sa mga Kristiano sa Roma, ginibo ni apostol Pedro an enot niang surat. Gusto nia kaidtong pakosogon an mga kapagtubod nia. An Diablo “naglilibot,” na naghahanap nin mga Kristianong sisibaon. Tanganing makapanindogan nin marigon tumang sa saiya, kaipuhan nindang ‘papagdanayon an saindang toltol na pag-iisip’ asin ‘magpakumbaba sa irarom kan makapangyarihan na kamot nin Dios.’ (1 Ped. 5:6, 8) Kaipuhan man nindang magdanay na sararo. Dai sinda puedeng “nagkikinaragatan asin naghihinaralonan,” huling puede sindang “magkagaradanan” dahel dian.—Gal. 5:15.

2, 3. Kiisay kita maninigong makipaglaban, asin ano an satong eestudyaran sa seryeng ini?

² Ngonyan, napapaatubang man kita sa kaagid na kamugtakan. An Diablo naghahanap nin mga oportunidad na sibaon kita. (Kap. 12:12) Asin madali nang mag-abot an sarong “dakulang kahorasaan na dai pang kaagid na nangyari poon sa kapinonan kan kinaban.” (Mat. 24:21) Kun paanong kinaipuhan kan mga Kristiano kan enot na siglo na mag-ingat sa pagdiriskutiran, dapat na kita iyo man. Tanganing magibo ini, kun beses kaipuhan niato an tabang kan kualipikadong kamagurangan.

³ Pag-olayan niato kun paano mas maaapresyar kan kamagurangan an saindang pribilehio nin pagpastor sa ‘aripompon nin Dios na nasa saindang pangangataman.’ (1 Ped. 5:2) Dangan, pag-oolayan niato an tamang paagi nin pagpastor. Sa sunod na artikulo, sisiyasaton niato kun paano an kongregasyon ‘magkakaigwa nin paggalang sa mga nagpapagal asin namamayo’ sa aripompon. (1 Tes. 5:12) An pag-estudyar sa mga bagay na ini makakatabang sa sato na manindogan nin marigon tumang sa satong pangenot na Kaiwal, huling aram niato na sa saiya kita may pakipaggumolan.—Efe. 6:12.

Pastoran Nindo an Aripompon nin Dios

4, 5. Paano maninigong mansayon kan kamagurangan an aripompon? Iilustrar.

⁴ Dinagka ni Pedro an kamagurangan kan enot na siglong mga Kristiano na magkaigwa nin diosnon na pagmansay sa aripompon na ipinagkatiwala sa sainda. (Basahon an 1 Pedro 5:1, 2.) Minsan ngani ibinibilang si Pedro na harigi sa kongregasyon, dai sia nagin mapalangkaw sa pakikipag-olay sa kamagurangan. Imbes, tinawan nia sinda nin hatol bilang mga kapwa magurang sa kongregasyon. (Gal. 2:9) Arog ni Pedro, sinasadol man kan Namamahalang Grupo ngonyan an kamagurangan sa kongregasyon na maigot na otobon an magabat na paninimbagan na pagpastor sa aripompon nin Dios.

⁵ An apostol nagsurat na an kamagurangan dapat na ‘magpastor sa aripompon nin Dios na nasa saindang pangangataman.’ Mahalagang marhay nanggad na midbidon ninda na an aripompon sadiri ni Jehova asin Jesu-Cristo. Maninimbag an kamagurangan sa kun paano ninda pinangatamanan an mga karnero nin Dios. Ipamugtak na pinakiolayan ka nin dayupot na katood mo na asikasohon an saiyang mga aki mantang mayo sia. Bako daw na aasikasohon mong marhay sinda asin papakakanon? Kun magkahelang an saro, bako daw na sisiertohon mong ikapabolong sia? Kaagid kaiyan, dapat “na pastoran [kan kamagurangan] an kongregasyon nin Dios, na saiyang binakal paagi sa dugo kan saiyang sadiring Aki.” (Gibo  20:28) Isinasaisip ninda na an kada karnero binakal kan mahalagang marhay na dugo ni Cristo Jesus. Huling maninimbag an kamagurangan, pinapakakan, pinoprotehiran, asin pinangangatamanan ninda an aripompon.

6. Ano an paninimbagan kan mga pastor kaidto?

⁶ Isip-isipa an mga paninimbagan kan literal na mga pastor kan panahon kan Biblia. Kinaipuhan nindang tioson an init kun aldaw asin an lipot kun banggi tanganing asikasohon an aripompon. (Gen. 31:40) Isinapeligro pa ngani ninda an saindang buhay para sa mga karnero. Ilinigtas kan solteritong pastor na si David an saiyang aripompon sa mabangis na mga hayop, kaiba na an leon asin oso. Mapadapit sa kada saro kaiyan, sinabi ni David na “rinabnot [nia] an barabas kaiyan saka pinatumba iyan asin ginadan.” (1 Sam. 17:34, 35) Pambihirang pagkapusoan! Seguradong dikit na siang matakab kaiyan! Pero, dai sia nag-alangan na iligtas an karnero.

7. Sa piguratibong paagi, paano puedeng agawon nin kamagurangan an karnero sa ngoso ni Satanas?

⁷ Ngonyan, kaipuhan na magin alisto an kamagurangan sa arog-leon na mga pag-atake kan Diablo. Tibaad kalabot digdi an pusoan na paghiro tanganing piguratibong agawon an karnero sa ngoso kan Diablo. Paagi sa garo man sana pagrabnot sa barabas kan mabangis na hayop, ikakaligtas kan kamagurangan an mga karnero. Tibaad sadolon ninda an dai nagmamaan na mga tugang na natetentaran kan mga siod ni Satanas. (Basahon an Judas 22, 23.) Siempre, ginigibo ini kan kamagurangan sa tabang ni Jehova. Maboot nindang inaasikaso an nalugadan na karnero, na binebendahan ini asin pinapahidan nin nakakapaginhawang panghaplas na Tataramon nin Dios.

8. Pasiring saen ginigiyahan kan kamagurangan an aripompon, asin paano?

⁸ Ginigiyahan man nin literal na pastor an aripompon pasiring sa tamang sabsaban asin lugar na maiinoman. Kaagid kaiyan, an aripompon ginigiyahan kan kamagurangan pasiring sa kongregasyon, na dinadagka sinda na regular na mag-atender sa mga pagtiripon tanganing an aripompon mapakakan nin tama asin mag-ako “kan saindang kakanon sa tamang panahon.” (Mat. 24:45) Tibaad kaipuhan kan kamagurangan na magtao nin dagdag na panahon tanganing tabangan an mga may helang sa espirituwal na akoon an kakanon hale sa Tataramon nin Dios. Tibaad naghihingoang bumalik sa aripompon an sarong nalagalag na karnero. Imbes na anggotan an  saindang tugang, mamomoton na ipinapaliwanag kan kamagurangan an mga prinsipyo sa Kasuratan asin ipinapaheling sa saiya kun paano nia ikakaaplikar ini sa buhay nia.

9, 10. Paano maninigong atamanon kan kamagurangan an mga may helang sa espirituwal?

⁹ Kun may helang ka, anong klaseng doktor an gusto mo? Saro na naghihidali sa pakikipag-olay sa saimo dangan nagrereseta tolos nin bolong tanganing makabalyo na sia sa sunod na pasyente? O saro na nagdadangog talaga sa saimo, nagpapaliwanag kan posibleng helang mo, asin nagsasabi kan posibleng mga pagbolong?

¹⁰ Kaagid kaiyan, an kamagurangan puedeng magdangog sa sarong may helang sa espirituwal asin tabangan sia na maomayan, na sa siring piguratibong “linalahidan sia nin lana sa ngaran ni Jehova.” (Basahon an Santiago 5:14, 15.) Arog kan balsamo sa Gilead, an Tataramon nin Dios makakapaginhawa sa may helang. (Jer. 8:22; Ezeq. 34:16) Kun iaaplikar an mga prinsipyo sa Biblia, matatabangan kaini an may problema sa espirituwal na magin timbang giraray. Iyo, dakula an ikakatabang kan kamagurangan kun dadangogon ninda an mga problema kan karnerong may helang asin mamimibi kaiba sia.

Bakong Dahel sa Napipiritan Kundi Gikan sa Boot

11. Ano an nagpapahiro sa kamagurangan na gikan sa boot na pastoran an aripompon nin Dios?

¹¹ Sunod, ipinagirumdom ni Pedro sa kamagurangan kun paano maninigong gibohon an pagpastor. Dapat na pastoran kan kamagurangan an aripompon nin Dios, “bakong dahel sa napipiritan, kundi gikan sa boot.” Ano an nagpapahiro sa kamagurangan na gikan sa boot na paglingkodan an saindang mga tugang? Bueno, ano an nagpahiro ki Pedro na pastoran asin pakakanon an mga karnero ni Jesus? An pangenot iyo an saiyang pagkamoot asin kapadangatan para sa Kagurangnan. (Juan 21:15-17) Huli sa pagkamoot, an kamagurangan ‘dai na nabubuhay para sa sainda man sana, kundi para sa saiya na nagadan para sa sainda.’ (2 Cor. 5:14, 15) An pagkamoot na ini, kaiba an saindang pagkamoot sa Dios asin sa mga tugang, an nagpapahiro sa kamagurangan na maglingkod sa aripompon, na idinudusay an saindang paghihingoa, materyal na mga rogaring, asin panahon sa paggibo kaiyan. (Mat. 22:37-39) Nagsasakripisyo sinda na dai napipiritan kundi gikan sa boot.

12. Sagkod sa anong punto nagsakripisyo si apostol Pablo?

¹² Sagkod sa anong punto maninigong magsakripisyo an kamagurangan? Mantang pinangangatamanan an mga karnero, inaarog ninda si apostol Pablo, kun paanong inarog man kaini si Jesus. (1 Cor. 11:1) Huling may mamomoton na kapadangatan sa mga tugang sa Tesalonica, naogmang marhay si Pablo asin an kairiba nia na itao sa sainda ‘bako sanang an maogmang bareta nin Dios, kundi siring man an sainda mismong kalag.’ Ginibo ninda iyan nin may kabootan, “arog kan pagpadangat nin nagpapasusong ina sa saiyang sadiring mga aki.” (1 Tes. 2:7, 8) Nasasabotan ni Pablo an pagmate nin nagpapasusong ina sa saiyang mga aki. Gigibohon nia an gabos para sa sainda, kaiba na an pagmata sa kamatangaan nin banggi tanganing pasusohon sinda.

13. Anong pagkabalanse an kaipuhan pagdanayon kan kamagurangan?

¹³ Kaipuhan siertohon kan kamagurangan na napapagdanay nindang balanse an mga paninimbagan sa pagpastor asin an mga obligasyon sa pamilya. (1 Tim. 5:8) An panahon na ginagamit kan kamagurangan para sa kongregasyon mahalagang marhay na panahon na para kutana sa saindang pamilya. An sarong paagi tanganing balansehon an duwang paninimbagan iyo an paminsanminsan na pag-imbitar sa iba sa saindang banggi nin Pampamilyang Pagsamba. Sa laog nin dakol na taon, iniimbitaran ni Masanao, na sarong magurang sa kongregasyon sa Hapon, sa saindang pampamilyang pag-adal an mga mayong agom asin an mga pamilyang mayong ama sa espirituwal. Pag-abot nin panahon, an nagkapirang natabangan nagin mga magurang man sa kongregasyon asin inarog an marahay na halimbawa ni Masanao.

Likayan an Madayang Pakinabang—Galagang Pastoran an Aripompon

14, 15. Taano an kamagurangan ta maninigong magmaan sa “pagkamoot sa madayang pakinabang,” asin paano ninda maaarog si Pablo sa bagay na ini?

¹⁴ Dinagka man ni Pedro an kamagurangan na pastoran an aripompon, ‘bakong dahel sa pagkamoot sa madayang pakinabang, kundi may pagkagalaga.’  Dakol na panahon an ginagamit kan kamagurangan sa saindang gibohon, pero dai sinda nag-aasa nin ano man na bayad. Naheling ni Pedro na kaipuhan niang patanidan an mga kapwa nia magurang sa kongregasyon manongod sa peligro na pastoran an aripompon huli sa “pagkamoot sa madayang pakinabang.” An peligrong iyan risang-risa sa maluhong pamumuhay kan mga lider sa mga relihion kan “Dakulang Babilonya” mantang dakol na tawo an nagtitios. (Kap. 18:2, 3) May marahay na dahelan an kamagurangan ngonyan na magmaan sa ano man na tendensia na magin arog kaiyan.

¹⁵ Nagtao si Pablo nin marahay na halimbawa sa Kristianong kamagurangan. Minsan ngani sia apostol asin puede kutanang nagin “magastos na pagabat” sa mga Kristiano sa Tesalonica, dai sia ‘nagkakan nin kakanon hale sa siisay man na daing bayad.’ Imbes, sia ‘nagtrabaho asin nagpagal banggi-aldaw.’ (2 Tes. 3:8) Dakol na kamagurangan sa presenteng panahon, kaiba na an nagbibiaheng mga paraataman, an nagtatao nin marahay na halimbawa sa bagay na ini. Minsan ngani inaako ninda an pag-istimar kan mga kapagtubod, dai sinda ‘nagtatao nin magastos na pagabat sa siisay man.’—1 Tes. 2:9.

16. Ano an boot sabihon kan ‘galagang’ pagpastor sa aripompon?

¹⁶ ‘Galagang’ pinapastoran kan kamagurangan an aripompon. An saindang pagkagalaga risang-risa sa pagsasakripisyo ninda sa pagtabang sa aripompon. Minsan siring, dai iyan nangangahulogan na pinipirit ninda an aripompon na maglingkod ki Jehova; ni dinadagka kan mamomoton na kamagurangan an iba na paglingkodan an Dios huli sa pakipagkompetensia. (Gal. 5:26) Nasasabotan kan kamagurangan na daing kaagid an kada karnero. Galaga sindang magtabang sa saindang mga tugang na maogmang paglingkodan si Jehova.

Dai Nagpapakangkagurangnan sa Aripompon Kundi Nagigin mga Halimbawa

17, 18. (a) Taano an mga apostol ta nasasakitan kun beses na masabotan an katokdoan ni Jesus dapit sa kapakumbabaan? (b) Sa anong kaagid na situwasyon kita tibaad mapaatubang?

¹⁷ Arog kan napag-olayan niato, maninigong isaisip kan kamagurangan na an pinapastoran nindang aripompon sadiri nin Dios, bako ninda. Nag-iingat sinda na dai ‘magpakangkagurangnan sa mga mana gikan sa Dios.’ (Basahon an 1 Pedro 5:3.) Kun beses, an mga apostol ni Jesus may maraot na motibo sa paghihingoang magkamit nin dugang pang pribilehio. Arog kan mga namamahala kaidto sa mga nasyon, gusto nindang magkaigwa nin prominenteng katongdan.—Basahon an Marcos 10:42-45.

¹⁸ Ngonyan, marahay na siyasaton nin mga tugang na lalaki an saindang motibo kun taano ta ‘naghihingoa sindang maabot an katongdan nin paraataman.’ (1 Tim. 3:1) Kun dapit sa mga magurang na sa kongregasyon, tibaad gugustohon ninda na prangkang hapoton an saindang sadiri kun baga nagmamawot sinda nin autoridad o pagkaprominente arog kan nagkapira sa mga apostol kaidto. Kun nasakitan an mga apostol sa bagay na ini, masasabotan kan kamagurangan na kaipuhan nindang magmaigot tanganing malikayan an ano man na kinabanon na tendensia na ikaogma an pagkaigwa nin autoridad sa iba.

19. Ano an maninigong girumdomon kan kamagurangan kun pinoprotehiran an aripompon?

¹⁹ Totoo, may mga panahon na an kamagurangan kaipuhan na magin marigon, arog baga kun pinoprotehiran an aripompon sa “mapang-aping mga lobo.” (Gibo 20:28-30) Sinabi ni Pablo ki Tito na padagos ining “magsadol patin magsagwe na may bilog na autoridad.” (Tito 2:15) Pero, dawa kun kaipuhan gibohon an siring, hinihingoa kan kamagurangan na tawan nin dignidad an mga kalabot. Nasasabotan ninda na an parateng mas epektibong paagi na maabot an puso asin mapahiro an saro na sunodon an tama iyo an maboot na pagdagka, bakong an maringis na pagtuyaw.

20. Paano maaarog si Jesus kan kamagurangan sa pagtao nin marahay na halimbawa?

 ²⁰ An marahay na halimbawa ni Cristo nakakamotibar sa kamagurangan na mamotan an aripompon. (Juan 13:12-15) Napapahiro kita mantang nababasa niato kun paano nia tinokdoan an saiyang mga disipulo sa paghuhulit asin paggibo nin mga disipulo. An saiyang halimbawa nin kapakumbabaan nakaabot sa puso kan mga disipulo nia kaya namotibar sinda na mamuhay na ‘may kababaan nin isip na ibinibilang na an iba mas halangkaw kisa sa sainda.’ (Fil. 2:3) An kamagurangan ngonyan napapahiro man na arogon an halimbawa ni Jesus, kaya gusto man nindang magin “halimbawa sa aripompon.”

21. Anong balos an puedeng laoman kan kamagurangan?

²¹ Tinapos ni Pedro an saiyang hatol sa kamagurangan paagi sa pagsambit sa sarong panuga para sa ngapit. (Basahon an 1 Pedro 5:4.) An linahidan na mga paraataman ‘maako kan dai napaparang korona nin kamurawayan’ kaiba ni Cristo sa langit. An mga katabang na pastor na kabilang sa “ibang mga karnero” magkakapribilehio na pastoran an aripompon nin Dios sa daga sa pamamahala kan “poon na pastor.” (Juan 10:16) Totokaron sa sunod na artikulo kun paano an mga miembro kan kongregasyon makakasuportar sa mga ninombrahan na mangenot.

Bilang Repaso

• Taano ta angay na tawan ni Pedro nin hatol an mga kapwa magurang sa kongregasyon na pastoran an aripompon nin Dios na nasa saindang pangangataman?

• Paano maninigong pastoran kan kamagurangan an mga may helang sa espirituwal?

• Ano an nagpapahiro sa kamagurangan na pastoran an aripompon nin Dios na nasa saindang pangangataman?

[Mga Hapot Para sa Pag-adal]

[Ritrato sa pahina 21]

Arog kan mga pastor kaidto, dapat na protehiran kan kamagurangan ngonyan an “mga karnero” na nasa saindang pangangataman