Akoon an Espiritu nin Dios, Bakong an sa Kinaban

“Inako niato, bakong an espiritu kan kinaban, kundi an espiritu na gikan sa Dios, tanganing maaraman niato an mga bagay na mabooton na itinao sa sato nin Dios.”—1 COR. 2:12.

1, 2. (a) Sa anong paagi na may pakikiguerra an tunay na mga Kristiano? (b) Anong mga hapot an pag-oolayan niato?

MAY pakikiguerra an tunay na mga Kristiano! An satong kaiwal makapangyarihan, tuso, asin tuod na sa ralaban. Igwa sia nin armas na epektibong marhay kaya nakontrol kaiyan an kadaklan sa katawohan. Alagad dai niato kaipuhan na isipon na kita mayong kalabanlaban o segurado nang madadaog. (Isa. 41:10) Igwa kita nin pandepensa na dai malalagbas asin dai madadaog.

² An satong pakikiguerra bakong pisikal; iyan espirituwal. An satong kaiwal iyo si Satanas na Diablo, asin an sarong pangenot na armas na ginagamit nia iyo “an espiritu kan kinaban.” (1 Cor. 2:12) An pangenot na pandepensa niato sa mga pagsalakay nia iyo an espiritu nin Dios. Tanganing makaligtas sa guerrang ini asin magdanay na makosog sa espirituwal, kaipuhan niato na hagadon an espiritu nin Dios dangan ipaheling an bunga kaiyan sa satong buhay. (Gal. 5:22, 23) Pero, ano an espiritu kan kinaban, asin paano iyan nagin maimpluwensiang marhay? Paano niato madedeterminaran kun baga naiimpluwensiahan na kita kan espiritu kan kinaban? Asin ano an manonodan niato ki Jesus manongod sa pag-ako kan espiritu nin Dios asin paglaban sa espiritu kan kinaban?

An Espiritu kan Kinaban—Taano ta Lakop na Marhay?

3. Ano an espiritu kan kinaban?

³ An espiritu kan kinaban na ini gikan ki Satanas, “an namamahala sa kinaban,” asin iyan kontra sa banal na espiritu nin Dios. (Juan 12:31; 14:30; 1 Juan 5:19) Iyan an nangingibabaw na inklinasyon kan kinaban, asin pinapahiro kaiyan an mga tawo. An nagpapahirong puersang ini nag-iimpluwensia sa sosyedad nin tawo na kontrahon an kabotan asin katuyohan nin Dios.

4, 5. Paano naglakop na marhay an espiritu na pinapalakop ni Satanas?

⁴ Paano naglakop na marhay an espiritu na pinapalakop ni Satanas? Enot, dinaya ni Satanas si Eva sa hardin nin Eden. Kinombensir nia si Eva na magigin mas marahay an buhay nia kun sia magigin independiente sa Dios. (Gen. 3:13) Sia putikon nanggad! (Juan 8:44) Dangan, paagi sa babae, minaniobra nia si Adan na magin bakong maimbod ki Jehova. Huli sa desisyon ni Adan, an katawohan ikinapabakal sa kasalan, kaya nagmana sinda nin tendensia na maimpluwensiahan kan espiritu nin kasumbikalan ni Satanas.—Basahon an Efeso 2:1-3.

⁵ Inimpluwensiahan man ni Satanas an dakol na anghel, na nagin mga demonyo. (Kap. 12:3, 4) An pagtraydor na iyan sa Dios nangyari kaidtong bago an Baha kan panahon ni Noe. An mga anghel na idto naniwala na mas mapaparahay sinda kun babayaan  ninda an iinasignar na posisyon sa sainda sa langit asin mapadara sa bakong natural na mga pagmawot sa daga. (Jud. 6) Sa tabang kan mga demonyong idto, na nagbalik na sa rona nin mga espiritu, ‘ilinalagalag ni Satanas an bilog na ineerokan na daga.’ (Kap. 12:9) Makamomondo, an mayoriya kan katawohan nagdadanay na buta sa impluwensia nin mga demonyo.—2 Cor. 4:4.

Naiimpluwensiahan daw Kamo kan Espiritu kan Kinaban?

6. Paano sana kita puedeng maolakitan kan espiritu kan kinaban?

⁶ Dakol an buta sa impluwensia ni Satanas, alagad dai dapat na magin ignorante an tunay na mga Kristiano sa mga taktika nia. (2 Cor. 2:11) Sa katunayan, dai kita maiimpluwensiahan kan espiritu kan kinaban kun dai niato totogotan na makaimpluwensia iyan sa sato. Siyasaton niato an apat na hapot na makakatabang tanganing mahayag kun baga naiimpluwensiahan kita kan espiritu nin Dios o kan kinaban.

7. Ano an sarong paagi na pinagmamaigotan ni Satanas na irayo kita ki Jehova?

⁷ Ano an ihinahayag manongod sa sako kan pinipili kong aling-alingan? (Basahon an Santiago 3:14-18.) Pinagmamaigotan ni Satanas na irayo kita sa Dios paagi sa pagpukaw sa satong puso na mamoot sa karatan. Aram kan Diablo na naoongis si Jehova sa siisay man na namomoot sa kadahasan. (Sal. 11:5) Sa dahelan na iyan, pinagmamaigotan ni Satanas na gamiton an mga babasahon, pelikula, musika, asin elektronikong mga kawat—na an nagkapira kaiyan nagdadagka sa mga parakawat na sagin na gumibo nin grabeng imoralidad asin kabangisan—tanganing makaakit sa mga mawot nin laman. Bakong importante ki Satanas kun may kabtang sa satong puso na namomoot sa tama basta may kabtang iyan na namomoot sa maraot, an mga bagay na pinapalakop nia.—Sal. 97:10.

8, 9. Ano an mga maninigo niatong ihapot sa satong sadiri mapadapit sa aling-alingan?

⁸ Sa ibong na lado, an espiritu nin Dios nagpapahiro sa mga nag-aako kaiyan na magin malinig sa moral, parapatoninong, asin pano nin pagkaherak. Marahay na hapoton niato an satong sadiri, ‘An pinipili ko daw na aling-alingan nakakadagka nin positibong mga kualidad sa sako?’ An kadonongan hale sa itaas “bakong mapagsaginsagin.” An mga naiimpluwensiahan kan espiritu nin Dios dai naghuhulit nin kalinigan sa moral asin katoninongan sa saindang kapwa dangan naoogma sa pagdalan o pagheling nin sadistikong kadahasan asin imoralidad sa sainda mismong harong.

⁹ Eksklusibong debosyon an inaasahan sa sato ni Jehova. Pero, kontento na si Satanas sa saro sanang akto nin pagsamba, arog kan hinagad nia ki Jesus. (Luc. 4:7, 8) Puede niatong hapoton an satong sadiri: ‘An pinipili ko daw na aling-alingan nagpapagin posible sa sako na itao sa Dios an eksklusibong debosyon? An pinipili ko daw mas nagpapadepisil o mas nagpapapasil sa sako na labanan an espiritu kan kinaban? Dapat daw akong gumibo nin ano man na pagliliwat sa mga pipilion ko sa ngapit?’

10, 11. (a) Mapadapit sa materyal na mga rogaring, anong saboot an pinapalakop kan espiritu kan kinaban? (b) Anong saboot an dinadagka sa sato kan Tataramon nin Dios na ipinasabong kan espiritu?

¹⁰ Ano an saboot ko sa materyal na mga rogaring? (Basahon an Lucas 18:24-30.) Pinapalakop kan espiritu kan kinaban “an mawot kan mga mata” paagi sa pagdagka sa mga tawo na magin mahanab asin materyalistiko. (1 Juan 2:16) Pinapatalubo kaiyan sa dakol an determinasyon na magin mayaman. (1 Tim. 6:9, 10) Papaniwalaon kita kan espiritung iyan na an pagtipon nin dakol na materyal na bagay magtatao nin nagdadanay na seguridad. (Tal. 18:11) Minsan siring, kun totogotan niato na salidahan kan pagkamoot sa kuarta an pagkamoot niato sa Dios, magigin mapanggana si Satanas. Maninigo niatong hapoton an satong sadiri, ‘An buhay ko daw nakapokus na sa paghanap nin materyal na mga kaginhawahan asin kasingawan?’

¹¹ Sa kabaliktaran, dinadagka kita kan Tataramon nin Dios na ipinasabong kan espiritu na magkaigwa nin timbang na pagmansay sa kuarta asin mahigos na magtrabaho tanganing masustentohan an materyal na mga pangangaipo niato asin kan satong pamilya. (1 Tim. 5:8) An espiritu nin Dios nakakatabang sa mga nag-aako kaiyan na ipaheling an pagigin matinao ni Jehova. An siring na mga tawo midbid bilang mga paratao, bakong nagpaparaako sana. Orog nindang pinapahalagahan an mga tawo kisa sa mga bagay asin maogma nindang ihinihiras an yaon sa sainda kun may kakayahan sindang gibohon iyan. (Tal. 3:27, 28) Asin dai ninda noarin man tinotogotan na magin enot  an pagmamaigot na magkamit nin kuarta kisa sa paglilingkod sa Dios.

12, 13. Kabaliktaran kan espiritu kan kinaban, paano an espiritu nin Dios magkakaigwa nin epekto sa sato para sa ikakarahay niato?

¹² Arin na espiritu an ipinapaheling kan sakong personalidad? (Basahon an Colosas 3:8-10, 13.) Pinapalakop kan espiritu kan kinaban an mga gibo kan laman. (Gal. 5:19-21) An tunay na pagbalo sa kun arin na espiritu an nag-iimpluwensia sa sato nangyayari, bako kun marahay an mga bagay-bagay, kundi kun bako iyan marahay, arog baga kun an sarong Kristianong tugang dai kita intindihon, kolgan an boot niato, o magkasala pa ngani sa sato. Saro pa, sa sato mismong harong, tibaad magin risang-risa kun arin na espiritu an nangingibabaw. Tibaad kaipuhan an pagsiyasat sa sadiri. Hapoton an saimong sadiri, ‘Sa nakaaging anom na bulan, an sako daw na personalidad nagin mas arog-Cristo o buminalik daw ako sa maraot kong mga ugale sa pagtaram asin paggawe?’

¹³ An espiritu nin Dios makakatabang sa sato na ‘hubaon an daan na personalidad kaiba an mga gibo kaiyan’ asin isulot “an bagong personalidad.” Makakatabang iyan sa sato na magin mas mamomoton asin maboot. Magigin andam kita na lubos na magpatarawadtawadan, dawa kun garo baga igwa kita nin lehitimong dahelan na magreklamo. An satong reaksion sa hinohonang inhustisya bako nang mga pagputok nin “kapaitan na maraot an kamawotan asin kaanggotan asin grabeng pagkaanggot asin sirilyakan patin mapang-abusong pagtaram.” Imbes, hihingoahon niato na magin “mapagmalasakit sa mamomoton na paagi.”—Efe. 4:31, 32.

14. Paano minamansay nin dakol sa kinaban an Tataramon nin Dios?

¹⁴ Iginagalang asin namomotan ko daw an mga pamantayan kan Biblia sa moral? (Basahon an Talinhaga 3:5, 6.) An espiritu kan kinaban nagpapaheling nin pagrebelde sa Tataramon nin Dios. An mga naiimpluwensiahan kan espiritung ini binabaliwala an mga kabtang kan Biblia na minamansay ninda na bakong kombenyente; imbes, mas gusto ninda an mga tradisyon asin pilosopiya nin tawo. (2 Tim. 4:3, 4) An nagkapira biyong dai iniintindi an Tataramon nin Dios. Kinukuestion kan siring na mga tawo an kahalagahan asin pagkamasasarigan kan Biblia, na nagigin madonong sa sadiri nindang pagheling. Pinapaluya ninda an puersa kan dalisay na mga pamantayan kaiyan mapadapit sa pagsambay, homoseksuwalidad, asin diborsio. Itinotokdo ninda na “an marahay maraot asin an maraot marahay.” (Isa. 5:20) Naiimpluwensiahan daw kita kan espiritung ini? Nagsasarig daw kita sa kadonongan nin tawo, pati na sa satong sadiring mga ideya, kun napapaatubang sa mga problema? O pinagmamaigotan daw niatong sunodon an mga sadol kan Biblia?

15. Imbes na magtiwala sa sadiri niatong kadonongan, ano an maninigo niatong gibohon?

¹⁵ Pinapatalubo sa sato kan espiritu nin Dios an paggalang sa Biblia. Arog kan salmista, minamansay niato an tataramon nin Dios na ilawan sa satong bitis sagkod liwanag sa satong dalan. (Sal. 119:105) Imbes na magtiwala sa sadiri niatong kadonongan, may kompiansa kitang nagsasarig sa nasusurat na Tataramon nin Dios tanganing tabangan kita na mabatid an kalaenan kan tama asin  sala. Nanonodan niato na dai sana igalang an Biblia kundi kamotan man an ley nin Dios.—Sal. 119:97.

Makanood sa Halimbawa ni Jesus

16. Ano an kalabot sa pagkaigwa kan “pag-iisip ni Cristo”?

¹⁶ Tanganing mag-ako kan espiritu nin Dios, dapat niatong pataluboon sa satong sadiri an “pag-iisip ni Cristo.” (1 Cor. 2:16) An pagkaigwa “kan kaparehong kaisipan na yaon ki Cristo Jesus” nangangaipo na aramon niato kun paano sia mag-isip asin gumawe dangan arogon sia. (Roma 15:5; 1 Ped. 2:21) Estudyare an nagkapirang paagi na magigibo niato iyan.

17, 18. (a) Ano an manonodan niato ki Jesus manongod sa pamibi? (b) Taano ta maninigo kitang “padagos na maghagad”?

¹⁷ Hagadon sa pamibi an espiritu nin Dios. Bago mapaatubang sa mga pagbalo, hinagad ni Jesus paagi sa pamibi an espiritu nin Dios tanganing tabangan sia. (Luc. 22:40, 41) Kaipuhan man niatong hagadon sa Dios an saiyang banal na espiritu. Si Jehova lubos asin abundang nagtatao kaiyan sa gabos na may pagtubod na naghahagad kaiyan. (Luc. 11:13) Si Jesus nagsabi: “Padagos na maghagad, asin itatao iyan sa saindo; padagos na maghanap, asin makakakua kamo; padagos na magtuktok, asin bubukasan iyan sa saindo. Huli ta an gabos na naghahagad nagkakamit, asin an gabos na naghahanap nakakakua, asin sa gabos na nagtutuktok iyan bubukasan.”—Mat. 7:7, 8.

¹⁸ Kun hinahagad an espiritu asin tabang ni Jehova, dai tolos magpondo sa paghagad kaiyan. Tibaad kaipuhan niatong mamibi nin mas parate asin mas harohalawig. Kun beses, tinotogotan ni Jehova an mga naghahagad sa saiya na ipaheling an rarom kan ikinakapurisaw ninda asin an pagigin tunay kan saindang pagtubod bago nia simbagon an mga pamibi ninda. *

19. Ano an pirmeng ginibo ni Jesus, asin taano ta maninigo niato siang arogon?

¹⁹ Lubos na kuyogon si Jehova. Pirmeng ginibo ni Jesus an mga bagay na nakakapaogma sa saiyang Ama. Sa kisiera sarong okasyon, an tendensia ni Jesus sa pag-atubang sa sarong situwasyon nagin laen sa gusto kan saiyang Ama. Pero, may kompiansang sinabi nia sa saiyang Ama: “Mangyari logod, bakong an kabotan ko, kundi an kabotan mo.” (Luc. 22:42) Hapoton an saimong sadiri, ‘Kinukuyog ko daw an Dios dawa bakong madali an paggibo kaiyan?’ An pagkuyog sa Dios mahalagang marhay sa buhay. May obligasyon kita na lubos siang kuyogon bilang Kaggibo sa sato, an Gikanan asin Parasustenir kan buhay niato. (Sal. 95:6, 7) Mayo nin puedeng isalida sa pagkuyog. Dai niato makakamtan an pag-oyon nin Dios kun mayo iyan.

20. Sa ano nakasentro an buhay ni Jesus, asin paano niato sia maaarog?

²⁰ Magin pamilyar na marhay sa Biblia. Kan linalabanan ni Jesus an direktang pagsalakay ni Satanas sa saiyang pagtubod, nagkotar sia sa Kasuratan. (Luc. 4:1-13) Kan inaatubang an relihiosong mga nagkokontra sa saiya, ginamit ni Jesus an Tataramon nin Dios bilang saiyang autoridad. (Mat. 15:3-6) An bilog na buhay ni Jesus nakasentro sa pakaaram asin pag-otob kan ley nin Dios. (Mat. 5:17) Gusto man niato na padagos na ilaog sa satong isip an nakakapakosog sa pagtubod na Tataramon nin Dios. (Fil. 4:8, 9) Tibaad nadedepisilan an nagkapira sa sato na maghanap nin panahon para sa personal asin pampamilyang pag-adal. Pero, imbes na maghanap nin panahon, tibaad kaipuhan niato na magtao nin panahon.—Efe. 5:15-17.

21. Anong areglo an puede niatong aprobetsaran tanganing tabangan kita na magin mas pamilyar sa Tataramon nin Dios asin iaplikar iyan?

²¹ Tinabangan kita kan “maimbod asin mapagmansay na oripon” na magkaigwa nin panahon para sa personal asin pampamilyang pag-adal paagi sa pag-areglo nin banggi nin Pampamilyang  Pagsamba kada semana. (Mat. 24:45) Madonong daw nindong inaaprobetsaran an areglong ini? Tanganing tabangan kamo na magkaigwa kan pag-iisip ni Cristo, puede daw nindong iiba sa saindong pag-adal an sistematikong pag-estudyar sa itinokdo ni Jesus dapit sa mga tema na pinili nindo? Puede nindong gamiton an Watch Tower Publications Index tanganing makua an nakakapagtokdong mga paliwanag sa temang sinisiyasat nindo. Halimbawa poon 2008 sagkod 2010, an pampublikong edisyon kan magasin na ini nagkaigwa nin serye nin 12 artikulo na may temang “Kun Ano an Manonodan Niato ki Jesus.” Tibaad booton nindong gamiton an mga artikulong ini na basehan para sa pag-adal. Poon 2006, nagkaigwa an Awake! nin tampok na “How Would You Answer?” An repaso na ini dinisenyo tanganing tabangan kamo na mapahiwas asin mapararom an saindong kaaraman sa Tataramon nin Dios. Taano ta dai iiba an impormasyon sa siring na mga tampok sa saindong Pampamilyang Pagsamba sa panapanahon?

Puede Niatong Madaog an Kinaban

22, 23. Ano an dapat niatong gibohon tanganing madaog an kinaban?

²² Tanganing giyahan kan espiritu nin Dios, dapat niatong labanan an espiritu kan kinaban. Bakong madali an siring na paglaban. Puede iyan na magin garo pakipagdaogan, sarong maigot na pakikipaglaban. (Jud. 3) Alagad puede kitang manggana! Sinabi ni Jesus sa saiyang mga disipulo: “Sa kinaban nagkakaigwa kamo nin kahorasaan, alagad kosogan nindo an saindong boot! Nadaog ko an kinaban.”—Juan 16:33.

²³ Madadaog man niato an kinaban kun lalabanan niato an espiritu kaiyan asin kun gigibohon niato an satong bilog na makakaya tanganing mag-ako kan espiritu nin Dios. An totoo, “kun an Dios nasa kampi niato, siisay an matumang sa sato?” (Roma 8:31) Kun aakoon niato an espiritu nin Dios asin susunodon an paggiya kaiyan na nasa Biblia, kita magigin kontento, matoninong, maogma, asin makakasierto kita kan buhay na daing katapusan sa bagong kinaban na madali nang mag-abot.

[Nota sa Ibaba]

Nagigirumdoman daw Nindo?

• Taano ta lakop na marhay an espiritu kan kinaban?

• Anong apat na hapot an maninigo niatong ihapot sa satong sadiri?

• Ano an tolong bagay na nanodan niato ki Jesus manongod sa pag-ako kan espiritu nin Dios?

[Mga Hapot Para sa Pag-adal]

[Ritrato sa pahina 8]

Paano nagin mga demonyo an nagkapirang anghel?

[Ritrato sa pahina 10]

Ginagamit ni Satanas an espiritu kan kinaban tanganing kontrolon an mga tawo, alagad puede kitang makabutas sa impluwensia kaiyan