Mag-awit ki Jehova!
Mag-awit ki Jehova!
“Maawit ako nin melodiya sa sakong Dios sagkod na ako nabubuhay.”—SAL. 146:2.
1. Ano an nagpahiro sa hoben na si David na gibohon an nagkapira sa saiyang mga salmo?
KAN si David hoben pa, dakol na oras siang nasa kalangtadan harani sa Betlehem tanganing atamanon an aripompon kan saiyang ama. Mantang binabantayan nia an mga karnero, namamasdan ni David an kahangahangang mga linalang ni Jehova: an mabitoon na kalangitan, “an mga hayop sa kapatagan,” asin “an mga gamgam sa langit.” Dakula nanggad an nagin epekto sa saiya kan mga naheling nia, kaya napahiro siang maggibo nin nakakapukaw sa boot na mga awit nin pag-omaw sa Kaggibo kan makangangalas na mga bagay na ini. Dakol sa komposisyon ni David an yaon sa libro nin Salmo. *—Basahon an Salmo 8:3, 4, 7-9.
2. (a) Ano an puedeng magin epekto nin musika sa sarong tawo? Magtao nin halimbawa. (b) Ano an manonodan niato sa Salmo 34:7, 8 asin Salmo 139:2-8 manongod sa relasyon ni David ki Jehova?
2 Posibleng marhay na si David nagin ekspertong musikero durante kan peryodong ini sa buhay nia. Sa katunayan, sia nagin matibayon kaya inimbitaran sia na magtugtog nin arpa para ki Hadeng Saul. (Tal. 22:29) An musika ni David nakapakalma sa napupurisaw na monarkang iyan, arog kan parateng nagigin epekto sa mga tawo kan magayon na musika dawa ngonyan. Kun nagtutugtog si David, “si Saul nagiginhawahan asin minarahay an pagmate.” (1 Sam. 16:23) An mga awit na ginibo kan may takot sa Dios na musikero asin parasurat na ini nin awit nagdadanay na mahalaga sagkod ngonyan. Isip-isipa nanggad ini! Ngonyan, labing 3,000 na taon pagkamundag ni David, minilyon na tawo ano man an kamugtakan asin nakaistar sa laen-laen na parte kan daga an regular na nagbabasa kan mga salmo ni David tanganing maranga asin magkaigwa nin paglaom.—2 Cron. 7:6; basahon an Salmo 34:7, 8; 139:2-8; Amos 6:5.
An Onorableng Kabtang nin Musika sa Tunay na Pagsamba
3, 4. Anong mga areglo sa pagtugtog asin pagkanta nin sagradong musika an ginibo kan panahon ni David?
3 Si David may talento, asin ginamit nia iyan sa pinakamarahay na paaging posible—an pamurawayon si Jehova. Kan sia magin hade sa Israel, inareglo ni David na iiba sa mga seremonya sa tabernakulo an magayon na musika. Labing saro sa kada sampulo kan gabos na naglilingkod na Levita—mga 4,000 sa sainda—an inasignaran na magin “paraomaw,” na 288 an “sinanay sa pag-awit ki Jehova, na gabos eksperto.”—1 Cron. 23:3, 5; 25:7.
4 Si David mismo an naggibo kan dakol sa mga awit na tinugtog asin kinanta kan mga Levita. An siisay man na Israelitang nagkapribilehio na magin presente sa mga okasyon na inaawit an mga salmo ni David seguradong napahiro nanggad kan nadangog ninda. Kan huri, kan an kaban kan tipan darahon sa Jerusalem, “sinabihan . . . ni David an mga namomoon sa mga Levita na ipuesto an saindang mga tugang na parakanta na may mga instrumento sa pag-awit, mga instrumentong de kuerdas asin arpa asin simbalo, na nagtutugtog nin makosog tanganing magkaigwa nin tanog nin paggayagaya.”—1 Cron. 15:16.
5, 6. (a) Taano ta tinawan nin dakulaon na atension an musika durante kan paghade ni David? (b) Paano niato naaraman na an musika may mahalagang kabtang sa pagsamba kan suanoy na Israel?
5 Taano ta tinawan nin dakulaon na atension an musika kan panahon ni David? Huli sana daw sa pagigin musikero kan hade? Dai, may iba pang dahelan, na ihinayag pakalihis nin mga siglo kan ibalik kan matanos na si Hadeng Ezequias an mga seremonya sa templo. Sa 2 Cronica 29:25, mababasa niato: “Ipinuesto nia [an boot sabihon, ni Ezequias] an mga Levita sa harong ni Jehova, na may mga simbalo, may mga instrumentong de kuerdas asin may mga arpa, oyon sa togon ni David asin ni Gad na bisyonaryo kan hade asin ni Natan na propeta, huling ki Jehova naggikan an togon paagi sa saiyang mga propeta.”
6 Iyo, paagi sa mga propeta nia, pinagbotan ni Jehova an mga nagsasamba sa saiya na omawon sia paagi sa awit. An mga parakanta hale sa tribo nin mga saserdote pinalibre pa ngani sa trabaho na kahagadan para sa ibang mga Levita tanganing sinda makadusay nin supisyenteng panahon sa paggibo nin awit asin, posibleng marhay, sa pagpraktis.—1 Cron. 9:33.
7, 8. Kun dapit sa pagkanta kan mga awit na pang-Kahadean, ano an mas mahalaga kisa sa talento?
7 Tibaad sabihon mo, “Kun dapit sa pagkanta, siertong nungka akong mapapabilang sa mga ekspertong parakanta sa tabernakulo!” Alagad bako man eksperto an gabos na Levitang musikero. Segun sa 1 Cronica 25:8, igwa man nin mga “nag-aadal.” Mahalaga man mangnohon na posibleng may ekspertong mga musikero asin parakanta sa ibang tribo nin Israel, alagad mga Levita an inasignaran ni Jehova na mag-asikaso kan musika. Makakaseguro kita na baga man sinda “eksperto” o “nag-aadal,” ginibo kan gabos na maimbod na Levita an pinakamakakaya ninda.
8 Mahilig si David sa musika asin sia eksperto dian. Alagad, talento sana daw an mahalaga sa Dios? Sa Salmo 33:3, si David nagsurat: “Gibohon an pinakamakakaya nindo sa pagtugtog nin mga de kuerdas kaiba kan magayagayang pagkurahaw.” Malinaw an punto: An mahalaga iyo na ‘gibohon niato an satong pinakamakakaya’ sa pag-omaw ki Jehova.
An Kabtang nin Musika Pagkatapos kan Panahon ni David
9. Iladawan an puede kutanang naheling asin nadangog nindo kun yaon kamo sa inagurasyon kan templo durante kan paghade ni Salomon.
9 Durante kan paghade ni Salomon, an musika may dakulang kabtang sa dalisay na pagsamba. Sa inagurasyon kan templo, igwa nin kompletong orkestra, na may sarong seksion na kompuesto nin 120 paratrumpeta. (Basahon an 2 Cronica 5:12.) Sinasabi sa sato kan Biblia na “an mga paratrumpeta [na gabos saserdote] asin paraawit garo saro sa pagpadangog nin sarong tanog sa pag-omaw asin pagpasalamat ki Jehova, . . . ‘huli ta sia marahay, huli ta an saiyang mamomoton na kabootan sagkod sa panahon na daing talaan.’” Kan pumoon an magayagayang tanog na iyan, “an harong mismo napano nin panganoron,” na nagpaparisa kan pag-oyon ni Jehova. Nakakaogma asin nakakapukaw nanggad nin may pagkangirhat na paggalang na madangog an tanog kan gabos na trumpetang iyan kaiba kan rinibong paraawit na nagkakasararo sa pagkanta!—2 Cron. 5:13.
10, 11. Ano an nagpapaheling na an musika ginamit sa pagsamba kan enot na mga Kristiano?
10 An musika ginamit man sa pagsamba kan enot na mga Kristiano. Siempre, an mga parasamba kan enot na siglo nagtiripon, bakong sa mga tabernakulo o templo, kundi sa pribadong mga harong. Huli sa pagpersegir asin iba pang dahelan, sa parate bakong marahay an kamugtakan kan pinagtitiriponan ninda. Pero, an mga Kristianong idto nag-omaw nanggad sa Dios paagi sa pag-awit.
11 Sinadol ni apostol Pablo an Kristianong mga tugang sa Colosas: “Padagos kamong . . . magpasaradolsadol sa lambang saro paagi sa mga salmo, mga pag-omaw sa Dios, espirituwal na mga awit na may marahay na boot.” (Col. 3:16) Kan ibilanggo si Pablo asin Silas, sinda ‘namibi asin nag-omaw sa Dios paagi sa awit,’ minsan ngani mayo sinda nin libro nin mga awit. (Gibo 16:25) Kun kamo mabilanggo, gurano kadakol sa satong awit na pang-Kahadean an tuom asin kaya nindong kantahon?
12. Paano niato ikakapaheling an pagpahalaga sa satong mga awit na pang-Kahadean?
12 Huling an musika may onorableng kabtang sa satong pagsamba, marahay na hapoton niato an satong sadiri: ‘Nagpapaheling daw ako nin tamang pagpahalaga dian? Ginigibo ko daw an sakong pinakamakakaya na makaabot nin nasa oras sa mga pagtiripon, asamblea, asin kombension tanganing makaiba ako sa mga tugang sa pambukas na awit, dangan nagkakanta daw ako nin gikan sa puso? Ipinapaliwanag ko daw sa sakong mga aki na an pag-awit sa pag-oltanan kan Teokratikong Paadalan sa Pagmiministro asin Pagtiripon sa Paglilingkod, o an pag-awit sa pag-oltanan kan pampublikong pahayag asin Pag-adal sa Torrengbantayan, bakong intermisyon, na puede sindang maghale sa tukawan dawa dai man kaipuhan tangani sanang mag-unat-unat?’ An pag-awit kabtang kan pagsamba. Iyo, baga man kita “eksperto” o “nag-aadal,” puede—asin maninigo—niato gabos na pagkasararoon an satong boses sa pag-omaw ki Jehova.—Ikomparar an 2 Corinto 8:12.
Nagbabago an mga Pangangaipo Huli sa Pagbago nin Panahon
13, 14. Ano an halaga kan pag-awit nin bilog na puso durante kan mga pagtiripon kan kongregasyon? Iilustrar.
13 Labing 100 na taon na an nakaagi, ipinaliwanag kan Zion’s Watch Tower an saro sa mga dahelan kun taano ta mahalagang marhay an satong mga awit na pang-Kahadean. Sinabi kaiyan: “An pag-awit kan katotoohan sarong marahay na paagi na ikatadom iyan sa isip asin puso kan banwaan nin Dios.” An kadaklan sa mga liriko kan satong mga awit basado sa Kasuratan, kaya an pagigin pamilyar sa kisiera nagkapira sa mga awit puedeng magin ekselenteng paagi na ikalaog sa satong puso an katotoohan. Sa parate, an saro na primero pa sanang nakaatender sa satong pagtiripon napapahirong marhay kan odok sa pusong pag-awit kan kongregasyon.
14 Sarong banggi kan 1869 mantang papuli si C. T. Russell hale sa trabaho, nakadangog sia nin pag-awit hale sa sarong pinagtitiriponan sa sirong nin sarong edipisyo. Kan panahon na iyan sa buhay nia, nawaran na sia nin paglaom na makukua pa nia an katotoohan manongod sa Dios. Kaya nagdesisyon siang magkonsentrar sa saiyang negosyo, na nangangatanosan na kun sia makakaganar nin kuarta, ikakatao nia minsan paano an materyal na mga pangangaipo nin mga tawo dawa kun dai nia sinda matatabangan sa espirituwal. Naglaog si Tugang na Russell sa maalpog asin madiklom na pinagtitiriponan dangan naheling nia na may ginigibong relihiosong seremonya duman. Sia nagtukaw asin naghinanyog. Kan huri, isinurat nia na an nadangog nia kan bangging idto “igo na, sa tabang nin Dios, tanganing pakosogon an luminuya [niang] pagtubod na an Biblia ipinasabong nin Dios.” Mangnoha na pag-awit an enot na nakadagka ki Tugang na Russell na magduman sa pagtiripon.
15. Anong mga pagliliwat sa pakasabot an dahelan kun taano ta kaipuhan nang bagohon an songbook?
15 Mantang nag-aagi an panahon, nagkakaigwa nin mga pagliliwat sa pakasabot niato sa Kasuratan. An Talinhaga 4:18 nagsasabi: “An dana kan mga matanos kabaing kan liwanag na paorog nang paorog na nagliliwanag sagkod na magin lubos an aldaw.” Huli sa pag-orog nin liwanag, kaipuhan tang gumibo nin mga pagliliwat sa paagi kan ‘pag-awit niato kan katotoohan.’ Sa nakaaging 25 taon, an Mga Saksi ni Jehova sa dakol na kadagaan ikinaogma an paggamit kan songbook na Sing Praises to Jehovah. * Poon kan iyan enot na ipublikar, padagos na nagkaigwa nin orog na liwanag dapit sa dakol na tema, asin an nagkapira sa mga tataramon sa songbook na iyan dai na niato ginagamit ngonyan. Halimbawa, dai na niato ginagamit “an bagong areglo” kundi “an bagong kinaban.” Asin sinasabi na niato na an ngaran ni Jehova “papakangbanalon,” bakong “ibibindikar.” Malinaw nanggad, kun mapadapit sa doktrina, kaipuhan nang bagohon an satong songbook.
16. Paano an bagong songbook makakatabang sa sato na sunodon an hatol ni Pablo na nasa Efeso 5:19?
16 Huli kaiyan asin sa iba pang dahelan, inaprobaran kan Namamahalang Grupo an pagpublikar nin bagong songbook na may titulong Mag-awit ki Jehova. Iyan igwa na sana nin 135 awit. Mantang mas dikit na sana an mga awit na kaipuhan manodan, magigin posible na sa sato na tuomon an mga liriko nin kisiera nagkapira sa bagong mga awit. Kaoyon ini kan hatol ni Pablo na nasa Efeso 5:19.—Basahon.
Puede Nindong Ipaheling an Saindong Pagpahalaga
17. Ano an puedeng girumdomon na makakatabang sa sato na pangganahan an takot na mapasupog kun dapit sa pag-awit sa kongregasyon?
17 Totogotan daw niato an takot na mapasupog na makaolang sa sato na umawit sa Kristianong mga pagtiripon? Isip-isipa ini: Kun mapadapit sa satong pagtaram, bako daw na “kita gabos nasasala nin dakol na beses”? (Sant. 3:2) Pero, dai niato tinotogotan an satong bakong sangkap na pagtaram na makaolang sa sato na omawon si Jehova sa pagharongharong. Kun siring, taano ta totogotan niato an satong bakong sangkap na boses sa pagkanta na makaolang sa sato na omawon an Dios paagi sa awit? Si Jehova, na “nagtao nin ngoso sa tawo,” naoogmang maghinanyog mantang ginagamit niato an satong boses sa pag-awit nin mga pag-omaw sa saiya.—Ex. 4:11.
18. Magtao nin mga suhestion kun paano magigin pamilyar sa liriko kan mga awit.
18 An mga CD na Mag-awit ki Jehova—Vocal Renditions makukua na sa dakol na lenguahe. Igwa iyan nin magayon na koro kan bagong mga awit na sinasabayan nin orkestra. Nakakagayagayang marhay dangogon an pagkaareglar kan mga musikang iyan. Dangogon iyan nin parate; paagi kaiyan madali kamong magigin pamilyar sa mga liriko nin kisiera nagkapira sa bagong mga awit. Isinurat an mga liriko kan dakol sa mga awit sa paagi na kun kinakanta nindo an sarong linya, haros maaantisipar na nindo an kasunod. Kaya kun pinapatugtog nindo an CD, taano ta dai sumabay sa pagkanta? Kun sa harong nindo pamilyar na kamo sa mga liriko asin musika, mayong duda na mas may kompiansa kamong makakaawit sa Kingdom Hall.
19. Anong mga lakdang an kalabot sa paggibo nin orkestrang bersion kan satong mga awit na pang-Kahadean?
19 Madali sanang ipasipara an musikang orkestra na nadadangog niato sa satong mga aldaw nin espesyal na asamblea, pansirkitong asamblea, asin pandistritong kombension. Pinagpapagalan nanggad an paggibo kaiyan. Pagkatapos na makapili nin musika, kaipuhan na maingat na isurat an inareglar na mga notang pang-orkestra para sa 64 miembro kan orkestra kan Watchtower. Dangan, dakol na oras an ginagamit kan mga musikero tanganing adalan an musika na papraktison ninda asin sa katapustapusi irerekord sa istudyo niato sa Patterson, Nueva York. An sampulo sa mga tugang na ini dai nakaistar sa Estados Unidos. Ibinibilang ninda gabos na pribilehio an pagkaigwa nin kabtang sa pagtao nin magayon na musika para sa satong teokratikong mga pagtiripon. Puede tang ipaheling an satong pagpahalaga sa mamomoton na pagpapagal ninda. Kun sabihon na kan tsirman sa satong mga asamblea asin kombension na kita magtukaw na, sunodon tolos niato iyan asin toninong na magdangog sa musika na mamomoton nanggad na ginibo.
20. Ano an determinado nindong gibohon?
20 Si Jehova nagtataong atension sa satong mga awit nin pag-omaw. Mahalaga iyan sa saiya. Mapapagayagaya niato an puso nia paagi sa pag-awit nin bilog na puso kun kita nagtitiripon para sa pagsamba. Iyo, baga man kita eksperto o nag-aadal, ‘mag-awit kita ki Jehova’!—Sal. 104:33.
[Mga Nota sa Ibaba]
^ par. 1 Interesante nanggad, sampulong siglo pagkagadan ni David, an pagkamundag kan Mesiyas ipinaisi nin sarong kaburunyogan nin mga anghel sa mga pastor na nagbabantay sa aripompon ninda sa kalangtadan harani sa Betlehem.—Lucas 2:4, 8, 13, 14.
^ par. 15 An bilog na koleksion na 225 awit trinadusir sa labing 100 na lenguahe. Sa Bicol, an Umawit nin mga Pag-omaw ki Jehova ipinublikar kan 1998.
Ano an Masasabi Nindo?
• Anong mga halimbawa kan mga panahon kan Biblia an nagpapaheling na an musika may mahalagang kabtang sa satong pagsamba?
• Para sa saindo, ano an koneksion kan pagkuyog sa pagboot ni Jesus sa Mateo 22:37 asin kan bilog na pusong pagkanta kan mga awit na pang-Kahadean?
• Ano an nagkapirang paagi na ikakapaheling niato an tamang pagpahalaga sa satong mga awit na pang-Kahadean?
[Mga Hapot Para sa Pag-adal]
[Ritrato sa pahina 23]
Pigsasabihan daw nindo an saindong mga aki na dai maghale sa tukawan durante kan pag-awit kun dai man kaipuhan?
[Ritrato sa pahina 24]
Pinag-aadalan daw nindo sa saindong harong an liriko kan bagong mga awit?