Tabangan an mga Aki na Magin Pamilyar sa Organisasyon ni Jehova

GUSTONG makanood an mga aki. Imahinara an tibaad mga hapot kan mga aking Israelita sa Egipto kan banggi kan enot na Paskua: ‘Taano daw ta kaipuhan na magadan an kordero?’ ‘Taano daw ta naglalaag si Tatay nin dugo sa pinto?’ ‘Saen daw kami maduman?’ Sa ipinagboot ni Jehova sa mga amang Israelita, maririsa na pinahalagahan nia an siring na mga hapot. Mapadapit sa masurunod na selebrasyon kan Paskua, sinabi sa sainda ni Jehova: “Kun an saindong mga aking lalaki magsabi sa saindo, ‘Ano an kahulogan sa saindo kan seremonyang ini?’ dangan magsabi kamo, ‘Iyan an atang kan paskua ki Jehova, na luminihis sa mga harong kan mga aki ni Israel sa Egipto kan paabotan nia nin damat an mga Egipcio, alagad ilinigtas nia an samong mga harong.’” (Ex. 12:24-27) Paghaloyhaloy, ipinagirumdom ni Jehova sa mga magurang sa Israel an kahalagahan nin pagsimbag sa mga hapot kan saindang mga aki mapadapit sa “mga regulasyon asin hudisyal na mga desisyon” na ipinagboot ni Jehova.—Deut. 6: 20-25.

 Malinaw nanggad na gusto ni Jehova na an mga aki makakua nin nakakakontentong simbag sa saindang mga hapot manongod sa tunay na pagsamba—mga simbag na makakamotibar sa sainda na mamotan si Jehova bilang saindang Dios asin Paraligtas. Iyan man an gusto ni Jehova para sa mga aki ngonyan. An sarong paagi na ikakatadom kan mga magurang sa saindang mga aki an odok sa pusong pagkamoot sa Dios asin sa saiyang banwaan iyo an pagtabang sa sainda na magin pamilyar sa organisasyon ni Jehova saka masabotan kun paano sinda nakikinabang sa mga areglo kaiyan. Kaya pag-olayan ta an nagkapirang paagi na matatabangan an mga aki na manodan an dugang pang mga detalye manongod sa organisasyon nin Dios.

An Lokal na Kongregasyon

Kaipuhan na magin pamilyar an mga aki sa kongregasyon na inaasosyaran kan saindong pamilya. Tanganing magibo iyan, bobooton nindo bilang mga magurang na iiba an saindong mga aki sa gabos na Kristianong pagtiripon. Sa paaging iyan, sinusunod nindo an arogan na itinao ni Jehova sa mga Israelita, na pinagbotan: “Tiponon mo an banwaan, an mga lalaki asin an mga babae asin an saradit na aki . . . , tanganing sinda maghinanyog asin tanganing sinda makanood, huli ta dapat sindang matakot ki Jehova na saindong Dios asin maingat na otobon an gabos na tataramon kan ley na ini. Asin an saindang mga aki na dai pa nakakaaram maninigong maghinanyog, asin kaipuhan na makanood sindang matakot ki Jehova na saindong Dios.”—Deut. 31:12, 13.

Poon sa pagkaomboy, an mga aki puede nang makanood manongod sa Tataramon ni Jehova. Sinabi ni apostol Pablo manongod ki Timoteo: “Poon sa pagkaomboy naaraman mo na an banal na mga kasuratan.” (2 Tim. 3:15) Sa mga pagtiripon sa Kingdom Hall, maski an mga akion pa nagpopoon nang makasabot kan impormasyon  na pinag-oolayan asin magin pamilyar sa mga kanta na pang-Kahadean. Dian, nakakanood sindang gamiton asin igalang an Biblia saka mga babasahon na basado sa Biblia. Apuera kaini, mamamatean ninda sa satong mga pagtiripon an sarong kualidad na nagpapamidbid sa tunay na mga parasunod ni Cristo—an tunay na pagkamoot. Sinabi ni Jesus: “Tinatawan ko kamo nin bagong togon, na kamo magkaminorootmootan; siring kan pagkamoot ko sa saindo, na kamo man magkaminorootmootan. Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:34, 35) Makakadagka sa mga aki an mainit na pagkamoot asin tunay na seguridad na risang-risa sa Kingdom Hall, saka makakatabang iyan sa sainda na gibohon na permanenteng kabtang kan saindang buhay an pag-atender sa Kristianong mga pagtiripon.

Kun uugaleon nindong mag-amay sa Kingdom Hall asin magdanay nin dikit na panahon pagkatapos kan pagtiripon, magkakaoportunidad an saindong mga aki na makipagkatood. Imbes na pabayaan sindang makiasosyar sana sa ibang mga aki, taano ta dai sinda ipabisto sa mga tugang ano man an edad? Kun mamimidbid kan saindong mga aki an mga mas may edad na, makakadangog sinda nin kadakol na nakakaogmang eksperyensia asin madonong na mga tataramon. Kun paanong si Zacarias, kan suanoy na panahon, na “paratokdo nin pagkatakot sa tunay na Dios” nagin marahayon na impluwensia sa hoben na si Uzias, na hade kan Juda, nagigin marahay man na impluwensia sa mga aki an mga maimbod na nakapaglingkod ki Jehova sa laog nin dakol nang taon. (2 Cron. 26:1, 4, 5) Mantang nasa Kingdom Hall, puede man nindong ipaliwanag sa saindong mga aki kun para sa ano an libreriya, information board, asin iba pa.

An Pambilog na Kinaban na Organisasyon

Kaipuhan masabotan kan mga aki na an lokal na kongregasyon kabtang nin pambilog na kinaban na organisasyon na kompuesto nin labing 100,000 na kongregasyon. Ipaliwanag an mga aspekto kan organisasyon na ini, kun paano iyan nagpupunsionar, asin kun ano an papel kan mga aki sa pagsuportar sa gibohon kaiyan. Ipaheling sa sainda kun taano ta inaantisipar nindo an mga pansirkitong asamblea, pandistritong kombension, asin pagsongko kan paraataman sa sirkito.—Helingon an kahon na “Mga Temang Mapag-oolayan sa Pampamilyang Pagsamba,” sa pahina 28.

Kun igwa kamong oportunidad, imbitaran na magkakan sa saindong harong an nagbibiaheng mga paraataman, misyonero, miembro kan pamilyang Bethel, asin iba pang naglilingkod nin bilog na panahon. Dai pag-isipon na mayo sindang panahon para sa mga aki. Naghihingoa an bilog na panahon na mga lingkod na ini na arogon si Jesus, na pirmeng inaako an mga aki asin kinakaolay sinda. (Mar 10:13-16) Kun nadadangog kan saindong mga aki an siring na mga lingkod ni Jehova na nag-eestorya nin mga eksperyensia asin naheheling ninda an kaogmahan kan mga ini sa sagradong paglilingkod, tibaad magin pasohan man ninda an paglaog sa bilog na panahon na ministeryo.

Ano pa an puede nindong gibohon bilang pamilya tanganing tabangan an saindong mga aki na magin mas pamilyar sa organisasyon ni Jehova? Uya an nagkapirang suhestion: Gibohon na proyekto kan saindong pamilya na pag-adalan an librong Jehovah’s Witnesses—Proclaimers of God’s Kingdom. Idoon an debosyon, kapakumbabaan, asin kaimbodan na ipinaheling kan mga lingkod ni Jehova. Ipaheling kun paano sinda ginamit ni Jehova tanganing ikalakop an maogmang bareta sa bilog na daga. Gamiton an mga video na ginibo kan organisasyon ni Jehova tanganing magtokdo nin mahahalagang leksion kaidto asin sa presente. Kun kaya nindo, magpasyar sa sangang opisina asin erokan na Bethel sa saindong nasyon o tibaad maski sa ibang nasyon. Sa pagpasyar na iyan kan saindong mga aki, matatadom sa isip ninda kun paano inoorganisar an daganon na kabtang kan organisasyon ni Jehova—na dinidirehiran kan grupong maimbod na oripon—sa pagtao nin espirituwal na kakanon asin paggiya sa mga tugang sa bilog na kinaban, arog kan enot na siglo C.E.—Mat. 24:45-47; Gibo 15:22-31.

Pagbagay kan Impormasyon sa Kada Aki

Sa pagtokdo sa saindong mga aki, tandaan kun paano tinokdoan ni Jesus an mga apostol. Sarong  beses, sinabihan nia sinda: “Dakol pa an sasabihon ko sa saindo, alagad dai pa nindo iyan kaya ngonyan.” (Juan 16:12) Dai binigla ni Jesus nin kadakol na impormasyon an saiyang mga disipulo. Imbes, gradwal nia sindang tinokdoan nin mahahalagang katotoohan tanganing masabotan ninda iyan nin tama. Arog man kaiyan an gibohon nindo sa saindong mga aki. Paagi sa padikitdikit alagad regular na pagtotokdo sa sainda manongod sa organisasyon, mapagdadanay nindo an saindang interes asin maoogma sindang pag-adalan an manongod sa Kristianong kongregasyon. Mantang nagbabago an mga pangangaipo kan saindong mga aki, puede nindong otrohon asin pahiwason an nanodan na ninda.

Sarong mahalagang gikanan nin espirituwal na kosog an Kristianong kongregasyon, asin an mga hoben na maigot na nakikikabtang sa mga aktibidad kaiyan mas andam na labanan an impluwensia kan kinaban ni Satanas. (Roma 12:2) Nagtitiwala kami na makakamate kamo nin dakulang kagayagayahan sa pagtabang sa saindong mga aki na magin pamilyar sa organisasyon ni Jehova. Paagi sa saiyang bendisyon, logod na sinda magdanay na maimbod dian asin sa mamomoton na Dios na satong pinaglilingkodan.

[Kahon/Ritrato sa pahina 28]

Mga Temang Mapag-oolayan sa Pampamilyang Pagsamba

Uni an nagkapirang temang may koneksion sa organisasyonal na mga bagay na puede nindong pag-olayan durante kan saindong banggi nin Pampamilyang Pagsamba.

▪ Repasohon an kasaysayan kan kongregasyon nindo. Kasuarin asin paano iyan nagpoon? Arin na mga Kingdom Hall an ginamit kan kongregasyon? Sa pag-orolay na ini, taano ta dai mag-imbitar sa harong nindo nin haloy nang miembro kan kongregasyon tanganing simbagon an mga hapot kan saindong mga aki?

▪ Ipaliwanag an katuyohan kan manlaenlaen na pagtiripon kan kongregasyon asin kan mas darakulang pagtiripon saka kun paano makikinabang dian an mga aki.

▪ Pag-olayan an katuyohan kan manlaenlaen na paadalan na inestablisar kan organisasyon ni Jehova. Magsaysay nin mga eksperyensia dapit sa marahay na mga resultang nagigibo kan mga naggradwar sa mga paadalan na ini.

▪ Tabangan an mga hoben na maheling an kahalagahan kan pagigin regular na parahayag kan maogmang bareta. Ipaheling sa sainda kun paano sinda magkakaigwa nin kabtang sa pambilog na kinaban na report na ipinupublikar sa Yearbook of Jehovah’s Witnesses.

▪ Pag-olayan an manlaenlaen na klase nin bilog na panahon na paglilingkod na bukas para sa mga hoben sa organisasyon ni Jehova. Makakatabang an impormasyon sa Kapitulo 10 kan librong Organisado sa Paggibo kan Kabotan ni Jehova.

▪ Tabangan an mga hoben na masabotan kun taano ta may mga areglong sinusunod sa kongregasyon. Ipaliwanag kun taano ta dai sinda dapat humiro na bakong kaoyon kan organisasyon ni Jehova, dawa sa saradit na bagay. Ipaheling sa sainda kun paano sinda makakatabang sa marahay na areglo kan kongregasyon paagi sa pagsunod sa paggiya kan kamagurangan.

[Ritrato]

Makikinabang an saindong mga aki sa pakikikatood sa mga haloy nang naglilingkod

[Mga Ritrato sa pahina 26]

Arog sa suanoy na Israel, nagmamaigot man an mga magurang ngonyan na magtao nin nakakakontentong simbag kun hinahapot manongod sa organisasyon ni Jehova