Padagos na Hanapon Nguna an “Saiyang Katanosan”
Padagos na Hanapon Nguna an “Saiyang Katanosan”
“Padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”—MAT. 6:33.
1, 2. Ano an katanosan nin Dios, asin basado iyan sa ano?
“PADAGOS na hanapon nguna an kahadean.” (Mat. 6:33) An konsehong ini ni Jesu-Cristo sa saiyang Sermon sa Bukid aram na marhay kan Mga Saksi ni Jehova ngonyan. Sa kada aspekto kan satong buhay, naghihingoa kitang ipaheling na namomotan niato an gobyernong Kahadean na iyan asin gusto tang magin maimbod dian. Alagad dapat man niatong girumdomon an ikaduwang kabtang kan tekstong ini—“asin an saiyang katanosan.” Ano an katanosan nin Dios, asin ano an boot sabihon kan paghanap nguna kaiyan?
2 An mga termino sa orihinal na lenguahe para sa “katanosan” puede man itradusir na “hustisya” o “pagigin tanos.” Huli kaini, an katanosan nin Dios pagigin tanos oyon sa sadiri niang mga pamantayan asin prinsipyo. Bilang Kaglalang, si Jehova an may deretsong magtao nin pamantayan sa kun ano an marahay asin maraot, saka sa kun ano an tama asin sala. (Kap. 4:11) Minsan siring, an katanosan nin Dios bakong daing pagmakolog asin estriktong kodigo nin mga ley o halabaon na lista nin mga susundon saka regulasyon. Imbes, iyan basado sa personalidad ni Jehova asin sa saiyang pangenot na kualidad na hustisya kaiba an iba pa niang pangenot na kualidad na pagkamoot, kadonongan, asin kapangyarihan. Kun siring, an katanosan nin Dios konektado sa saiyang kabotan asin katuyohan. Kaiba dian an inaasahan nia sa mga nagmamawot na maglingkod sa saiya.
3. (a) Ano an boot sabihon kan paghanap nguna sa katanosan nin Dios? (b) Taano ta sinusuportaran niato an matanos na mga pamantayan ni Jehova?
3 Ano an boot sabihon kan paghanap nguna sa katanosan nin Dios? Sa simpleng pagtaram, iyan nangangahulogan nin paggibo kan kabotan nin Dios tanganing paogmahon sia. Kaiba sa paghanap kan saiyang katanosan an pagmamaigot na mamuhay oyon sa saiyang mga prinsipyo saka sangkap na pamantayan asin bakong oyon sa mga prinsipyo asin pamantayan niato. (Basahon an Roma 12:2.) Kalabot sa paaging ini nin pamumuhay an sato mismong relasyon ki Jehova. Iyan bakong pagkuyog sa saiyang mga ley huli sa takot na mapadusahan. Imbes, an pagkamoot niato sa Dios nagmomotibar sa sato na maghingoang paogmahon sia paagi sa pagsuportar sa saiyang mga pamantayan, bakong paggibo nin sadiri tang pamantayan. Aram niato na ini an tamang gibohon, asin na kita talagang linalang tanganing gibohon iyan. Arog ni Jesu-Cristo, na Hade kan Kahadean nin Dios, dapat tang mamotan an katanosan.—Heb. 1:8, 9.
4. Taano ta mahalagang marhay an paghanap sa katanosan nin Dios?
4 Gurano kahalaga an paghanap sa katanosan ni Jehova? Isip-isipa an bagay na ini: An basehan kan enot na pagbalo sa hardin nin Eden iyo na kun baga aakoon o dai ni Adan asin Eva an deretso ni Jehova na magtao nin mga pamantayan. (Gen. 2:17; 3:5) Huling iyan dai ninda inako, nagsasakit asin nagagadan kita na mga naggikan sa sainda. (Roma 5:12) Sa ibong na lado, an Tataramon nin Dios nagsasabi: “An nagmamaigot na isagibo an katanosan asin mamomoton na kabootan makakanompong nin buhay, katanosan asin kamurawayan.” (Tal. 21:21) Iyo, an paghanap nguna sa katanosan nin Dios nagreresulta sa matoninong na relasyon ki Jehova, na magiya man sa sato mismong kaligtasan.—Roma 3:23, 24.
An Peligro nin Pagigin Mapagpakangmatanos
5. Anong peligro an kaipuhan tang likayan?
5 Sa surat ni apostol Pablo sa mga Kristiano sa Roma, idinoon nia an sarong peligro na kaipuhan niato gabos na likayan tangani kitang magin mapanggana sa paghanap nguna sa katanosan nin Dios. Dapit sa mga kapwa Judio, si Pablo nagsabi: “Ako nagpapatotoo na igwa sinda nin kaigotan para sa Dios; alagad bakong oyon sa tamang kaaraman; huli ta, dahel sa dai pakaaram kan katanosan nin Dios kundi naghihingoang patunayan an sadiri nindang katanosan, dai sinda nagpasakop sa katanosan nin Dios.” (Roma 10:2, 3) Segun ki Pablo, dai nasabotan kan mga parasambang idto an katanosan nin Dios huling sinda sibot-sibot sa paghihingoang patunayan an sadiri nindang katanosan. *
6. Anong kaisipan an maninigo tang likayan, asin taano?
6 An sarong paagi na kita puedeng mahulog sa silong ini iyo na kun minamansay niato na an paglilingkod sa Dios sarong kompetisyon, na ikinokomparar sa iba an satong sadiri. An kaisipan na ini madali sanang magpangyari sa sato na magin sobra an kompiansa sa satong mga abilidad. Alagad, an totoo, kun kita magawe nin siring kaiyan, linilingawan niato an katanosan ni Jehova. (Gal. 6:3, 4) An tamang motibo sa paggibo kan tama iyo an pagkamoot niato ki Jehova. Mawawaran nin saysay an pagsabi niato na sia namomotan niato kun poprobaran niatong patunayan an sadiri tang katanosan.—Basahon an Lucas 16:15.
7. Paano rinesolberan ni Jesus an problema dapit sa pagpakangmatanos?
7 Nahadit si Jesus sa mga “nananarig sa sainda man sana na sinda matanos asin ibinibilang an iba na daing halaga.” Rinesolberan nia an problema dapit sa pagpakangmatanos paagi sa pagsaysay kan ilustrasyon na ini: “May duwang tawo na nagtukad sa templo sa pagpamibi, an saro Fariseo asin an saro parasingil nin buhis. An Fariseo nagtindog asin nagpoon na mamibi kan mga bagay na ini sa boot nia, ‘O Dios, ako nagpapasalamat sa saimo na bako akong arog kan iba, mga parakikil, bakong matanos, parasambay, o arog ngani kan parasingil na ini nin buhis. Nag-aayuno ako nin duwang beses kada semana, itinatao ko an ikasampulong kabtang kan gabos na nakukua ko.’ Alagad an parasingil nin buhis na nakatindog sa harayo habo man lamang itingkalag an saiyang mga mata sa langit, kundi padagos na tinutubtob an saiyang daghan, na nagsasabi, ‘O Dios, magin maugayon ka sa sako na makasalan.’” Nagkongklusyon si Jesus: “Ako nagsasabi sa saindo, An tawong ini nagpuli sa saiyang harong na orog na matanos kisa sa tawong iyan; huli ta an lambang nagpapalangkaw ibababa, alagad an nagpapakumbaba ilalangkaw.”—Luc. 18:9-14.
Saro Pang Peligro—Pagigin “Labi-Labi Kamatanos”
8, 9. Ano an boot sabihon kan pagigin “labi-labi kamatanos,” asin ano an puedeng magin resulta kaiyan sa sato?
8 An saro pang peligro na kaipuhan niatong likayan iyo an sinasabi sa Eclesiastes 7:16: “Dai ka magin labi-labi kamatanos, ni magin sobra kadonong. Taano ta ipapahamak mo an saimong sadiri?” Tanganing tawan kita nin dahelan na likayan an siring na kaisipan, an pinasabngan na kagsurat sa Biblia nagsabi pa, na mababasa sa bersikulo 20: “Huli ta mayo nin tawong matanos sa daga na padagos na naggigibo nin marahay asin dai nagkakasala.” An tawo na nagigin “labi-labi kamatanos” naggigibo nin sadiri niang mga pamantayan nin katanosan asin hinuhusgaran an iba paagi kaiyan. Pero, dai nia naaaraman na sa paggibo kaiyan, ibinibilang nia na mas halangkaw an saiyang mga pamantayan kisa sa pamantayan nin Dios asin paagi kaiyan sia nagigin bakong matanos sa pagheling Nia.
9 An pagigin “labi-labi kamatanos”—o pagigin “sobra kamatanos,” arog kan pagkatradusir nin nagkapirang Biblia—puede pa nganing magin dahelan na kuestionon niato an pag-asikaso ni Jehova sa mga bagay-bagay. Pero, kaipuhan niatong girumdomon na kun kukuestionon niato an pagigin makatanosan o pagigin tama kan mga desisyon ni Jehova, garo man sana kita nagpopoon nang mag-isip na mas halangkaw an satong pamantayan nin katanosan kisa sa pamantayan ni Jehova. Garo man sana binibista niato si Jehova asin hinuhusgaran sia paagi sa sadiri tang mga pamantayan sa kun ano an tama asin sala. Alagad si Jehova an may deretsong magtao kan pamantayan nin katanosan, bako kita!—Roma 14:10.
10. Arog kan nangyari ki Job, ano an tibaad magin dahelan na husgaran niato an Dios?
10 Minsan ngani habo nin siisay man sa sato na tuyong husgaran an Dios, puedeng magibo niato iyan huli sa satong pagkabakong sangkap. Ini madali sanang mangyari kun kita may sarong bagay na naheheling na para sa sato bakong makatanosan o kun kita mismo nakakaeksperyensia nin kasakitan. Dawa an maimbod na si Job nakagibo kan salang ini. Sa kapinonan, si Job ilinadawan na “daing katuyawan asin tanos, saka natatakot sa Dios asin naglilikay sa maraot.” (Job 1:1) Alagad pag-abot nin panahon, si Job nakaeksperyensia nin sunod-sunod na trahedya na para sa saiya garo baga bakong makatanosan. Ini an dahelan na ipinahayag ni Job na “matanos an saiyang sadiring kalag imbes na an Dios.” (Job 32:1, 2) Kaipuhan kaidto ni Job na itanos an saiyang punto de vista. Kaya dai kita dapat magngalas na, kun beses, tibaad makaeksperyensia man kita nin kaagid na situwasyon. Kun mangyari iyan, ano an makakatabang sa sato na liwaton an satong pag-iisip?
Dai Niato Pirmeng Aram an Gabos na Detalye
11, 12. (a) Kun sa heling niato bakong makatanosan an sarong bagay, ano an kaipuhan tang girumdomon? (b) Taano an saro ta tibaad magsaboot na bakong makatanosan an ilinaladawan sa ilustrasyon ni Jesus dapit sa mga trabahador sa ubasan?
11 An enot na dapat girumdomon iyo na dai niato pirmeng aram an gabos na detalye. Iyan an nangyari ki Job. Dai nia aram an dapit sa mga pagtiripon sa langit kan mga anghel na aki nin Dios na duman sia inakusaran nin bakong totoo ni Satanas. (Job 1:7-12; 2:1-6) Dai aram ni Job na si Satanas an talagang dahelan kan saiyang mga problema. Sa katunayan, dai niato masisierto kun talagang aram ngani ni Job kun siisay si Satanas! Kaya naghona sia na an Dios an dahelan kan saiyang mga problema. Iyo, madali sanang magkongklusyon nin sala kun dai niato aram an gabos na detalye.
12 Halimbawa, isip-isipa an ilustrasyon ni Jesus dapit sa mga trabahador sa ubasan. (Basahon an Mateo 20:8-16.) Ilinaladawan digdi ni Jesus an sarong kagharong na nagbayad nin pararehong kantidad nin kuarta sa gabos na trabahador nia, baga man sinda nagtrabaho nin bilog na aldaw o sarong oras sana. Ano an saboot nindo manongod dian? Makatanosan daw iyan? Tibaad tolos kamong nakamate nin pagkaherak sa mga trabahador na nagtrabaho nin bilog na aldaw na balad-balad sa saldang. Siertong maninigo sindang bayadan nin mas halangkaw! Basado sa kongklusyon na iyan, an kagharong puedeng ibilang na bakong mamomoton asin bakong makatanosan. Pati an simbag nia sa mga trabahador na nagreklamo garo baga pag-abuso sa autoridad. Alagad, aram daw niato an gabos na detalye?
13. Sa anong ibang punto de vista puedeng saboton an ilustrasyon ni Jesus dapit sa mga trabahador sa ubasan?
13 Analisaron niato an ilustrasyon na ini sa saro pang punto de vista. Mayong duda na aram kan kagharong sa ilustrasyon na kaipuhan kan gabos na tawong ini na pakakanon an saindang pamilya. Kan panahon ni Jesus, aldawan an bayad sa mga trabahador sa oma. An saindang pamilya nag-aasa sa aldawan na bayad. Mantang ginigirumdom ini, isip-isipa an kamugtakan kan mga nanompongan kan kagharong kaidtong pabanggi na kaya sinda nagtrabaho nin sarong oras na sana. Tibaad dai ninda mapapakakan an saindang pamilya paagi sa saro sanang oras na bayad; pero sinda andam na magtrabaho asin naghalat nin bilog na aldaw tanganing makakua nin trabaho. (Mat. 20:1-7) Bako nindang sala na dai sinda pinatrabaho nin bilog na aldaw. Mayong nagpaparisa na habo talaga nindang magtrabaho. Imahinara na kaipuhan nindong maghalat nin bilog na aldaw, sa pakaaram na an iba nakadepende sa gaganaron nindo sa aldaw na iyan. Kamo magpapasalamat nanggad na nakakua kamo nin trabaho—asin masosorpresa nanggad na nag-ako kamo nin igong bayad tanganing mapakakan an saindong pamilya!
14. Anong mahalagang leksion an manonodan niato sa ilustrasyon dapit sa ubasan?
14 Siyasaton giraray niato an ginibo kan kagharong. Dai nia binayadan nin kulang an siisay man. Imbes, an gabos na trabahador trinatar nia na may deretsong magkaigwa nin hanap-buhay. Minsan ngani kadakol nin makukuang trabahador, dai nia sinda inaprobetsaran paagi sa pagbayad nin mas hababa kisa sa kun ano an rasonable. Nagpuli an gabos na trabahador na may igong kuarta tanganing mapakakan an saindang pamilya. Puedeng mabago an satong punto de vista dapit sa ginibo nia kun pag-iisipan niato an dagdag na mga detalyeng ini. An saiyang desisyon mamomoton asin bakong pag-abuso sa autoridad. Anong leksion an manonodan niato? Na posibleng makapagkongklusyon kita nin sala kun nagkapira sanang detalye an tatawan niato nin atension. Iyo nanggad, itinatampok kan ilustrasyon na ini an pagigin nakakalabi kan katanosan nin Dios, na bakong basado sana sa legal na mga regulasyon asin deretso nin tawo.
Tibaad Biribid o Limitado an Satong Punto de Vista
15. Taano ta tibaad biribid o limitado an satong punto de vista dapit sa kun ano an makatanosan?
15 An ikaduwang bagay na dapat girumdomon kun kita napapaatubang sa situwasyon na garo baga bakong makatanosan iyo na tibaad biribid o limitado an satong punto de vista. Iyan puedeng mabiribid huli sa pagkabakong sangkap, pagpalaenlaen, o kultura. Limitado man iyan huling dai niato kayang aramon an motibo asin kun ano talaga an nasa puso nin mga tawo. Sa kabaliktaran, si Jehova asin si Jesus mayo kan siring na mga limitasyon.—Tal. 24:12; Mat. 9:4; Luc. 5:22.
16, 17. Taano ta dai ipinaotob ni Jehova an saiyang ley dapit sa pagsambay kan magkasala si David may koneksion ki Bat-seba?
16 Analisaron niato an pagkasaysay dapit sa pakikisambay ni David ki Bat-seba. (2 Sam. 11:2-5) Segun sa Ley ni Moises, dapat sindang gadanon. (Lev. 20:10; Deut. 22:22) Minsan ngani pinadusahan sinda ni Jehova, dai nia ipinaotob an saiya mismong ley. Si Jehova daw nagin bakong makatanosan? Nagpaheling daw sia nin paboritismo ki David asin binalga an Saiya mismong matanos na mga pamantayan? May mga nagbabasa nin Biblia na arog kaiyan an saboot.
17 Minsan siring, an ley na ini dapit sa pagsambay itinao ni Jehova sa bakong sangkap na mga hokom, na dai nakakabasa nin puso. Sa ibong kan saindang mga limitasyon, nagin posible paagi sa ley na ini na sinda dai magpabarobago sa paghokom. Sa ibong na lado, si Jehova nakakabasa nin puso. (Gen. 18:25; 1 Cron. 29:17) Kaya dai niato maninigong asahan na si Jehova nalilimitaran nin ley na ginibo nia para sa bakong sangkap na mga hokom. Kun iyo, bako daw na iyan siring sa pagpirit sa saro na malinaw an pagheling na magsulot nin salming na para sa mga maluya na an pagheling? Nabasa ni Jehova an puso ni David saka Bat-seba asin naheling nia an tunay na pagsolsol ninda. Sa pagkonsiderar sa siring na bagay, hinokoman nia sinda oyon dian, na may pagkaherak asin pagkamoot.
Padagos na Hanapon an Katanosan ni Jehova
18, 19. Ano an makakatabang sa sato na nungkang husgaran si Jehova paagi sa sadiri tang mga pamantayan nin katanosan?
18 Kaya kun may mga panahon na kita nakakaheling nin sarong bagay na para sa sato si Jehova bakong makatanosan—baga man iyan nabasa niato sa sarong pagkasaysay sa Biblia o personal niatong naeksperyensiahan—nungka niatong husgaran an Dios paagi sa sadiri tang mga pamantayan nin katanosan. Girumdomon na dai niato pirmeng aram an gabos na detalye asin tibaad biribid o limitado an satong punto de vista. Nungkang lingawan na “an grabeng kaanggotan nin tawo dai nagbubunga kan katanosan nin Dios.” (Sant. 1:19, 20) Paagi kaini, an satong puso nungkang ‘maaanggot ki Jehova mismo.’—Tal. 19:3.
19 Arog ni Jesus, pirme niatong akoon na si Jehova sana an may deretsong magtao kan pamantayan sa kun ano an matanos asin marahay. (Mar. 10:17, 18) Pagmaigotan na magkaigwa nin “tamang kaaraman” dapit sa saiyang mga pamantayan. (Roma 10:2; 2 Tim. 3:7) Paagi sa pag-ako kaini asin pamumuhay oyon sa kabotan ni Jehova, ipinapaheling niato na hinahanap nguna niato an “saiyang katanosan.”—Mat. 6:33.
[Nota sa Ibaba]
^ par. 5 Segun sa sarong iskolar, an termino sa orihinal na lenguahe na trinadusir na “patunayan” puede man mangahulogan na ‘magtogdok nin monumento.’ Kaya an mga Judiong idto garo man sana nagtotogdok nin piguratibong monumento para sa sadiri nindang kaomawan imbes na sa Dios.
Nagigirumdoman daw Nindo?
• Taano ta mahalagang hanapon an katanosan ni Jehova?
• Anong duwang peligro an kaipuhan tang likayan?
• Paano niato mahahanap nguna an katanosan nin Dios?
[Mga Hapot Para sa Pag-adal]
[Ritrato sa pahina 9]
Anong leksion an manonodan niato sa ilustrasyon ni Jesus dapit sa duwang tawo na namibi sa templo?
[Ritrato sa pahina 10]
Bako daw makatanosan na bayadan nin parareho an mga nagtrabaho kan ika-11 oras asin an mga nagtrabaho nin bilog na aldaw?